Meeryn ass Traa dy Liooar, Jelhune 12ah Mee Voaldyn 2025
Ta'n Shirveishagh Slaynt as Kiarail y Theay, Claire Christian, gra dy vel lhiassaghey scanshoil noa cheet ayns cur er bun paart chammah son matron as ard vatron harrish Kiarail Vannin, lesh myn-phoyntyn cheusthie jeh plan obbree Kiarail Vannin. T'ee gra dy bee hoght ynnyd, as dy vel ad shoh criticoil, as dy row ad crooit dy livrey eddyr-insh jeant ny share rish surransee, rish y theay as rish cumraagyn, vees jeeraghey ny s'lhea er lughtyn-thie ny surransee, kiarail as sauchys as kiarail as fondid jeh keeayll chionnit ny surransee.
Ta Bnr Christian gra dy vod ny paartyn ve currit er bun cheusthie jeh'n chlaare argidoil t'ayn hannah, my vees peiagh ennagh geearree cur yn feysht shen, as nagh vel feme er argid elley dy chur er bun ny paartyn criticoil ayns leeideilys clinicoil. T'ee gra dy vel ooilley ny hoght paart clinicoil cur tuarastyl dy jeeragh cheusthie jeh fwirranyn obbree as dy vel freggyrtys clinicoil profeshoonagh da stiureyder sheckteragh y Choonceil son Boandyrys as Gerrymyn Slaynt Cochianglt.
Ta Bnr Christian gra dy bee ny matronyn er nyn lhunney ayns ny shiaghteeyn shoh cheet, as dy bee eh eh feer ghreesaghey dy akin shen as dy akin yn aght t'ad goaill toshiaght er eddyr-obbraghey rish y theay ayns lheid yn aght yindyssagh ta shin ooilley oayllagh rish veih ny laghyn t'er n'gholl shaghey, as dy vel ee jeeaghyn roee rish yn aght nee shen lhiassaghey cheusthie jeh Kiarail Vannin choud's t'ee goll er y hoshiaght.
Ren Oltey yn Chiare as Feed son Carbory, Balleychashtal as Malew, Jason Moorhouse, briaght j'ee, vel croo ny matronyn croo keim elley dy reirey, ny bee keim dy reirey goit magh ass, as quoid keim bee ayn eddyr surransee as y matron?
Dinsh Bnr Christian da dy bee y fys shen ry gheddyn tra ta'n paart er ny rolley magh ayns ny shiaghteeyn shoh cheet, dy jean ee shickyr dy vel y fys shen ayn er-e-hon.
---oooOooo---
Ta ny shlee na 6,000 dy leih fuirraghtyn er feeackleyr trooid yn Chirveish Claynt Ashoonagh ec y traa t'ayn. Ta Kiarail Vannin gra dy vel yn earroo dy leih currit da dagh feeackleyr er ve injil rish tammylt son kuse dy oyryn, as yn fer smoo nagh row bishaghey ayns eeckyssyn da feeackleyryn neayr's 2020. Agh t'ee gra dy vel ee credjal dy vel caa jee nish jeeaghyn er cur cooidjagh yn aght ta eeckys currit da feeackleyryn, as t'ee treishteil dy jean shen shareaghey entreilys da shirveishyn as jannoo ny sloo y rolley faarkee t'ayn nish.
Ta'n earroo 'sy rolley faarkee ec y traa t'ayn 6,254 dy leih.
---oooOooo---
Ta mysh £140,000 dy lhiastynys ec y traa t'ayn ec sleih veih cheumooie yn Ellan as va lheiys oc 'sy thie lheiys choud's v'ad ayns shoh. Neayr's y vlein 2017, ta coontyssyn er bunnys £600,000 er ve currit gys keayrtee as va feme oc er kiarail slaynt choud's v'ad ayns shoh. Ayns freggyrt Tinvaal scruit, ren yn Shirveishagh Slaynt as Kiarail y Theay, as Oltey yn Chiare as Feed son Doolish Yiass, Claire Christian, soilshaghey magh dy vel £139,229 foast er-mayrn. Ta ny fysseree son y vlein argidoil 2024-25 soilshaghey magh ny shlee na £99,000 nagh vel eeckit, as ta'n chooid smoo jeh'n towse shen veih'n un chooish vees goll er arganey ayns ny quaiylyn.
Lesh co-choardail eddyr y Reeriaght Unnaneysit as Ellan Vannin, ta'n chooid smoo dy hirveishyn 'sy thie lheiys ry gheddyn nastee liorish keayrtee ass yn Reeriaght Unnaneysit.
---oooOooo---
Ta'n Shirveishagh Tashtee, yn Fer-lhee Alex Allinson, gra dy row eh speeideilagh, cur er bun keesh hugyr. Va tailley er-lheh currit er joughinyn glassey 'sy vlein 2019, lurg skeim gollrish shen ve currit er bun 'sy Reeriaght Unnaneysit.
Ta'n Fer-lhee Allinson gra nagh nee oashyn sleih t'er chaghlaa, dy nee ny janteyderyn ren ny sloo dy mooar yn towse dy hugyr ayns ny joughinyn glassey yinnagh sleih kionnaghey veih skellooyn ayns shapp ny ard-vargey, myr shoh dy ren ad shen dy haghney y cheesh, as dy vel eh dy jarroo er ve speeideilagh dy liooar. T'eh gra ny yeih dy vel yn argid er ny chosney veih'n cheesh goll son kuse dy haaseyn son slaynt y theay ayns Ellan Vannin, goaill stiagh paart jeh sheeyney magh ny shirveishyn feeacklagh gys scoillyn, as son kuse jeh ny troddanyn ayns shen.
---oooOooo---
Ta'n Fer-lhee Allinson gra dy bee costyssyn mooarey ry eeck 'sy traa ry heet choud's ta'n reiltys reaghey dy chosney aghtyn dy ghientyn bree vees aa-noaghey. T'eh gra dy vel bishaghyn doaltattymagh er coontey taghyrtyn dowanagh soilshaghey magh dy vel feme er shickyrys bree.
Ta'n cochianglys lectragh rish y Reeriaght Unnaneysit nish bunnys 20 bleeaney dy eash, as bee paart scanshoil echey ayns plannyn dy gheddyn rey rish carbon ayns gientyn lectragh liorish y vlein 2030. Agh s'cosoylagh dy bee'n costys jeh shoh ny shlee na £100 millioon.
Ta'n Fer-lhee Allinson gra, er-lesh neayr's tuarastyl yn Olloo Curran, dy row y caghlaa shen ayns barelyn bentyn da tosheeaghtyn rieugh y reiltys mychione costyssyn bree, ymmyd jeh bree, troggal son shickyrys bree, as va geill currit da shen dy mooar ayns Plan yn Ellan. T'eh gra dy vel costyssyn mooarey choud's ta shin goll er nyn doshiaght. T'eh gra dy dug shin ooilley yn argid shen ayns troggal mwyllin phooar Poyll Roish, agh dy vel shen er n'gholl y raad echey, as fy yerrey dy bee feme er red ennagh ayns ynnyd jeh, as t'eh briaght, jinnagh sleih cur myllin phooar noa immanit ec gass ayns ynnyd j'ee, ny jinnagh ad ymmyd jeh saaseyn vees aa-noaghey.
Ta'n Fer-lhee Allinsongra, ny t'ad dy yeeaghyn er, shen mestey jeh'n daa jeu, cur-rish y laad bunnidagh, agh jeeaghyn neesht er saasyn vees aa-noaghey, vel shen pooar ny geayee er y thalloo, as neesht pooar ny greiney er y thalloo, as neesht cur stiagh ayn bree, edyr veih pooar ny geayee mooie veih'n choose ny veih fer jeh ny naboonyn ain. T'eh gra dy vel eddyr-chochianglys ain ec y traa t'ayn vees cheet dy vel mysh 20 bleeaney dy eash nish, myr shoh dy bee feme ain er jannoo ny share shen, agh ec y traa cheddin er jeeaghyn er y chostys ooilley cooidjagh da'n chionneyder.
Ta'n Fer-lhee Allinson gra dy vel ymmodee jeh ny obbraghyn liorish Lught-reill Bun-shirveishyn Vannin, vel shen dy hareaghey stundayrt yn ushtey ain mygeayrt ny baieaghyn ain liorish troggal buill vooynlee, ny dy vaih argid 'sy voggyl lectragh, goll er eeck magh ass yn Tashtey Eeasaght Currit Ry-cheilley, vees eisht aa-eeckit back ayns ny tashtaghyn freillt ain trooid ny taillaghyn t'ad cur er bun.
---oooOooo---
Nee Oltey yn Chiare as Feed son Carbory, Balleychashtal as Malew, Jason Moorhouse, cur feysht Jemayrt yn 13 Mee Voaldyn mychione y chostys jeh'n ghowaltys geayee treealit, as t'eh shirrey fysseree gys y date shoh as faaishnys er y chostys fy yerrey, my vees y shalee cooilleenit.
Jerrey Souree 2023, ren Lught-reill Bun-shirveishyn Vannin faaishnys dy beagh slane costys y ghowaltys geayee Cair Vie mysh £40 millioon. Ta fysseree er y gherrid er hoilshaghey magh dy vel ny shlee na £3 millioon er ve ceaut hannah ynrican er taillaghyn son fir oayllee choyrlee.
Ta Mnr Moorhouse gra dy vel eh credjal dy vel gennid dy hickyrys mychione y halee as t'eh gra dy vel baghtalys jeeaghyn dy heet dy ve ny sloo. T'eh cur eam er Coonceil ny Shirveishee dy scuirr veih'n shalee as dy ghoaill ayns laue sess cheumooie vel eh foast yn reih kiart son yn Ellan.
Ta Mnr Moorhouse gra, eer bentyn da cooish vunnidagh gollrish yn chostys jeh'n lectraght, nagh vel baghtalys ayn, as my vees sleih goll gys ynnyd eggey Lught-reill Bun-shirveishyn Vannin mychione nheeghyn, as dy nee lane vaghtal nagh bee costys y lectraght veg ny sloo costallagh, agh dy bee eh smoo costallagh, agh tra hug yn feysht shen da'n Ard Shirveishagh, dy row eh shickyr dy voddagh eh y ve sloo costallagh. T'eh cheet er cooishyn bunnidagh ec y chree gollrish shen vees cur ersyn cur feyshtyn, quoi vees jannoo ny reaghyssyn shoh, ny vel eh rere auto-stiuredyer, as she ny fir oayllee choyrlee ta geddyn y vondeish smoo ass shoh.
Ta Mnr Moorhouse gra dy vel eh jeeaghyn dy vel cultoor politickagh ain, cultoor sharvaantyn y steat, ayn nagh vod briwnyssyn ve jeant ec y pheiagh 'syn oik shen, shegin da ve jeant, soit er tuarastyl neu-chrogheydagh as feanish neu-chrogheydagh, as dy vel eh oyr son ve cho tarmestit dy vel wheesh argid goll er baarail ayns rieughid er feddyn magh aghtyn feayslee cummyssagh da reddyn.
Ta Mnr Moorhouse gra nagh vel ny offishearyn geearree cur reddyn ayns gaue bentyn da'n phaart oc, nagh vel ny politickeyryn geearree cur reddyn ayns gaue bentyn da ny reihyssyn, as fy yerrey my vees feme er jannoo briwnys jeh mooadys erbee, ta feme oc er tuarastyl er y voayrd vees ayns rieughid pohlldal ad.
Ta Mnr Moorhouse gra dy vel eh jannoo sloo yn freggyrtys, as dy jean eh shareaghey y barrant ayndaue 'sy chied ynnyd, nagh row eh er ny ooley ayns aght garroo, dy vel shoh red ennagh t'er ve jeant ec fer er-lheh as keeayll chionnit echey, ec colught as keeayll chionnit echey. T'eh gra, dy mennick, dy beagh eh jeant sthie, dy beagh tooilley feyshtyn, dy beagh tooilley myn-vrishey jeh, choud's ta'n shalee goll er lhiassaghey, as dy vel imnea echey dy vel shoh sampleyr jeeragh jeh gra, ayns rieughid, dy jean mayd ceau ny smoo er ny fir oayllee choyrlee myr dy beagh eh dy niartaghey y barel oc.
Ta Mnr Moorhouse gra dy vel feme dy feer er scuirr veih'n skeim. dy yeeaghyn vel shoh ayns rieughid y skeim kiart, shaghey veg agh seiy er lesh as smooinaghtyn dy vel y nah cheim dy gheddyn kied phlannal, dy vel y nah cheim son shoh, dy vel y nah cheim son shen. T'eh gra dy vel yn seihll er chaghlaa, as dy vel feme ain dy firrinagh er jeeaghyn vel shoh yn skeim share bentyn da'n chostys jeh, as neesht bentyn da'n chymmyltaght.
---oooOooo---
Ta'n Shirveishagh Ynsee, Spoyrt as Cultoor, Daphne Caine, gra dy vel feme er tooilley obbyr dy ve jeant roish my vees plannyn dy hroggal bunscoill noa ayns Balley ny Sallee 'syn ynnyd jeh'n Ghowaltys y Chrossag. T'ee gra nagh vel briwnyssyn erbee er ve jeant, as nagh vel yn Rheynn currit da'n shalee shoh dy hroggal bunscoill noa 'sy jiass.
Va feyshtyn er Bnr Caine ayns soie yn Chiare as Feed Jemayrt shoh chaie mychione cur argid dy cummyssagh son troggal bunscoill noa er y Chrossag. T'ee gra dy vel yn rheynn foast aarloo dy loayrt mychione seyraad noa my vees bunscoill noa coardit myr paart jeh'n phlan son ard y jiass. Agh t'ee gra dy vel feme er tooilley obbyr roish my vees veg jeant dy chur y shalee er e hoshiaght.
T'ee gra dy bee sur-smooinaghtyn er, beagh Gowaltys y Chrossag dy jarroo yn ynnyd kiart, roish my vees lhiassaghey ny barrant erbee jeant.
---oooOooo---
Ta cuirrey er y theay dy rheynn ny barelyn oc er ny plannyn s'noa dy yannoo ass y noa as dy yannoo noa-emshiragh yn leigh bentyn da'n ynsagh. Ta'n Rheynn Ynsee, Spoyrt as Cultoor er lhunney co-choyrle derrey Jedoonee yn 15 Mean Souree mychione Billey Ynsee (Lhiassaghey). Ta'n dean jeh dy chur yn leigh rere yn date vees freggyrtagh da ny ta'n Rheynn cheet er myr jerkalyssyn ec y traa t'ayn as femeyn son y traa ry heet.
Ta nuy ardyn scanshoil 'sy villey draghtit vees cheet er goaill stiagh ooilley, coadey sauchys as cur saaseyn son femeyn ynsee erskyn cadjinys, as ta feme er creatlagh leighoil gys yn date dy yannoo shickyr dy vel dy chooilley phaitchey as fer aeg goll er chummal seose dy vishaghey, cre erbee y cooylrey ny'n stayd oc. Ta'n billey treealit cheet er aghtyn jantagh dy aa-chummey yn ynsagh, as t'eh goaill stiagh aghtyn dy chur er y hoshiaght yn ynsagh son paitchey fo chiarail; saaseyn elley dy chur ynsagh; ynsagh crauee; entreilys as yn towse dy phaitchyn ayns ny scoillyn; tooilley saaseyn son coadey sauchys; scoillyn cheet dy ve dooint myr egin; paitchyn nagh vel kionfenish; toyrtyssyn as cur argid son yn ynsagh; as femeyn ynsee sodjey.
---oooOooo---
Ta'n Shirveishagh Bun-troggalys, yn Dr Michelle Haywood, gra nagh vel coloayrtyssyn formoil er ve ayn foast rish lughtyn-reill ynnydoil mychione cooney argidoil dy chur er bun reesht yn shirveish varroose gys Cregneash as yn Cheyllys. Dinsh ee da Olteynyn yn Chiare as Feed Jemayrt shoh chaie, choud's ta coloayrtyssyn er ve ayn cheusthie jeh'n reiltys bentyn da'n aght dy chur argid son y choorse, nagh row veg er ve coardit.
Myr cheayll shin y cheayrt s'jerree ayns Traa dy Liooar, ta'n Dr Haywood hene, as ish Oltey yn Chiare as Feed son Rushen, ayns foayr jeh cur er bun yn shirveish reesht. Agh dinsh ee da Olteynyn yn Chiare as Feed dy by chosoylagh eh dy vel eh feer bentyn da'n shirveish varroose harrish y clane Ellan nagh vod ee shirveishagh er dy chooilley valley as er dy chooilley thie, ga dy vel ad cur eab er jannoo nyn gooidshare, ny yeih dy vel paart dy hur-smooinaghtyn ayn mychione yn earroo dy hieyn rish coorse, nagh row shen yn oyr scanshoil 'sy chooish shoh.
Ta Oltey yn Chiare as Feed son Carbory, Balleychashtal as Malew, Tim Glover, er chremmey yn aght ta'n Ellan cur-rish y turryssid, as t'eh cur raaue nagh vel yn Ellan jeeaghyn er y cherroo 'syn aght trome-chooishagh t'eh toilliu. Er-lesh dy vel y reaghys dy gheddyn rey rish y choorse barroose gys Cregneash cur magh chaghteraght neu-chiart, as t'eh cheet er y valley beg cheerey shenndeeagh shen myr fer jeh ny cliegeenyn ayns crooin yn Ellan.
Roish nish ta'n Rheynn Bun-troggalys er n'ghra nagh vel y coorse ry chummal seose er yn oyr nagh vel eh vondeishagh ayns aght argidoil. Ta Mnr Glover nish er chur feysht ayns Claare Obbyr yn Chiare as Feed, mychione ny coorseyn barroose as ta vondeish ry gheddyn magh assdaue.
Ta Mnr Glover gra nagh vel eh vondeishagh rere yn argid, 'naght cheddin as yn chooid smoo jeh ny coorseyn ayns Ellan Vannin, dy nee shirveish t'ayn, as dy vel y fockle ard-scanshoil ayns shen shirveish. T'eh gra dy nee shirveish as feme mooar urree, cha nee ynrican son cummaltee 'syn ard, agh myr coorse son turryssee.
---oooOooo---
Er y gherrid, ren Colleish Olloo-Scoill Vannin feailley jeh 50 blein neayr's ren eh fosley 'syn ynnyd Homefield echey, as ta Fer toshee y Cholleish, Jesamine Kelly, gra, neayr's v'eh currit er bun, dy vel eh er vishaghey ny vees goll er chebbal da studeyryn, as dy vel eh loayrt rish failleydee as rish jantyssyn y Reiltys dy gheddyn magh fys mychione ny vees femoil 'sy cho-voodeeys, as dy vel eh lhiassaghey coorseyn bentyn da shen.
Ta Bnr Kelly dy row ish hene er ve ny studeyr ayns shen, as dy vel whilleen sleih er n'gholl trooid y cholleish, dy vel caarjyn mie er ve jeant oc, dy vel ad er nynsaghey schleiyn noa, er chosney qualleeaghtyn as fys er caaghyn son coorseyn as foddee nagh ren ad rieau eer smooinaghtyn er, as er chooney dy chummal seose tarmaynys yn Ellan as dy lhiassaghey tarmaynys yn Ellan, vel ad er jeet dy chur faill daue hene ny er n'gholl dy obbraghey, ny eer ny sodjey mooie. T'ee cheet er y jeeanid son ynsaghey trooid magh laghyn sleih, as dy vel ymmodee sleih cheet back daue son aa-hraenal, son coorse soccar, dy vel ad jeean dy lhiassaghey ny schleiyn oc, dy yrjaghey ny keimyn oc, jeeaghyn er caghlaaghyn qualleeaght – myr sampleyr, dy vel ad chebbal keimyn as studeyrys ec keim mainstyr ayns shen neesht.
Ta Bnr Kelly gra dy vel ad freayll rish aa-scrutaghey ny vees goll er livrey, dy yannoo shickyr dy vel freggyrtagh da femeyn ynnydoil, cummal seose ny failleydee ynnydoil ain as y cho-voodeeys, as myr sampleyr ayns y chubbyl dy vlein shoh chaie dy vel ad er chur er bun coorseyn coyrlee. T'ee gra dy ren ad cur er bun boandyrys feeacklagh blein ny ghaa er dy henney, as mleeaney ren ad cur er bun keim noa ayns oaylleeaght sheshoil feamagh, vees cur fys da sleih er socioaylleeaght, kimeeoaylleeaght, as yn lheid, as dy nee keim feer feeu eh foddee cur peiagh er ymmodee raaidyn son faill.
Ta Bnr Kelly gra dy vel ad loayrt rish failleydee, dy vel ad loayrt rish jantyssyn y reiltys, rish possanyn 'sy trass cheim, dy yeeaghyn er ny vees cheet magh, ny vees ny femeyn, as dy vel ad lhiassaghey ny coorseyn oc, as dy vel ymmodee jeh ny studeyryn oc geddyn vondeish jeh ve currit stiagh dy yindyssagh ayns obbyr, as myr sampleyr dy vel ooilley ny studeyryn oc son slaynt goll stiagh son obbyr rish Kiarail Vannin rish yn daa vlein jeh'n choorse oc, vees cur daue fys dy feer er y reayn lhean dy startaghyn vees ry gheddyn ayns thieyn lheiys as 'sy cherroo kiarail, myr shoh dy vel eh jeeaghyn dy ve speeideilagh lesh ny caaghyn shen, cha nee ynrican dy yannoo rere y date as cur coorseyn noa, agh dy reayll rish jannoo ny coorseyn oc eer ny share choud's t'ad goll er nyn doshiaght neesht. T'ee cheet er cur-lesh yn seihll obbree stiagh ayns keeayll chionnit ny studeyryn, agh jannoo shickyr neesht dy vel yn ynnyd ny voayl gennal as breeoil dy heet stiagh ayn neesht.
---oooOooo---
Ta kuse dy gharaghyn biljagh as glionteenyn foast dooint choud's ta'n Rheynn Chymmyltagh, Bee as Eirinys gobbraghey dy yannoo sauchey ad lurg sterrymyn feer tromey 'sy gheurey, goaill stiagh Sterrym Éowyn, Jerrey Geuree, lesh gardaryn gys 107 mso recortit er Sniaull. Myr eiyrtys jeh shen as sterrymyn elley, va jeeill jeant da ymmodee biljyn.
Choud's ta ymmyd goll er jannoo jeh paart dy foiee ayns troaryn ayns shoh 'sy Wyllin Sauee ayns Balley Keeill Eoin, ta palchey dy kip goll er cur ersooyl trooid puirt Ghoolish as Rhumsaa gys margaghyn 'sy Reeriaght Unnaneysit.
Tra ta ny biljyn lhieggit er ve goit magh ass, nee yn Rheynn goaill toshiaght er settal biljyn noa, lesh paart dy viljyn juys son oyryn traghtee as lesh biljyn lesh duillagyn lhean son bio-chaghlaays as dy chur vondeish da'n chymmyltaght 'sy traa sodjey.
Ta'n foster, Andy Neil, gra dy vel yn obbyr vees goll er jannoo ec y traa t'ayn ayns Keyll Archallaghan, myr sampleyr, dy bunnidagh dy ghlenney magh y cragh lurg ny sterrymyn Mee ny Nollick as Jerrey Geuree. T'eh gra dy vel ad er reaghey dy chreck y foiee v'ayns shen gys colught 'sy Reeriaght Unnaneysit ta faillt myr conaanteyder dy heet noal, dy lhieggey ny biljyn, dy chur-lesh ny biljyn, dy chreck y foiee er margaghyn y Reeriaght Unnaneysit, as eer cummal paart jeh'n foiee er-nyn-son hene.
Ta Mnr Neil gra, dy neu-aighoil, dy vel yn chooid smoo jeh ny garaghyn biljagh ain 'syn Ellan son y chooid smoo jeh'n eash cheddin, myr shoh lesh y phaart jeh myr troar traghtee dy nee chymshal 50 bleeaney t'ayn, as dy vel yn stoo shen ayns Archallaghan ny shinney na 60 bleeaney ny 70 bleeaney, erskyn yn chymshal nish, myr shoh t'ad erskyn yn traa lhisagh ad ve lhieggit. T'eh gra lesh ny smoo as ny smoo earish trome as geayaghyn as fliaghaghyn as reddyn gollrish shen, dy vel ad cheet dy ve smoo ayns gaue jeh jeeill veih'n gheay, er yn oyr dy vel ad harrish as erskyn yn yrjid criticoil shen, myr shoh dy vel feme oc er jannoo red ennagh lhieu roish my vees ad cheet dy ve ny smessey.
Ta'n Stiureyder son Keylljyn, Seyraadyn as Thallooyn da'n Rheynn, Andy Lees, gra nagh vel agh fwirran beg dy liooar ec yn Rheynn, lesh dy feer daa cheylleyder, myr shoh dy nee fwirran feer, eer veg eh, as dy vel ad nyn lhie er oayllys y cholught Euroforest dy chooney lhieu reirey y clane ynnyd choud's t'ad goll er nyn doshiaght, agh dy nee fwirran beg eh as nagh vel cheeadyn dy leih oc. T'eh gra dy vel towse mooar dy obbyr ry yannoo, as dy nee lickly eh dy jean ad goll stiagh ayns Baarool Jiass son yn traa post TT, as dy vel plannyn oc son troarey choud's t'ad goll er nyn doshiaght, myr shoh nagh nee un startey ynrican eh, as er-nyn-son dy reirey y cheyll dy fondagh, dy vel feme oc er reirey eh rere shiaghtin as rere mee.
Ta Mnr Lees gra nagh vel shoh red ennagh as nee ad eh as faagail eh rish 50 bleeaney elley, she red beayn eh. T'eh gra, raad va sleih fakin biljyn rish 50 bleeaney ny 60 bleeaney, dy vel ny biljyn shen er n'gholl, as t'eh briaght jeh sleih dy ve aarloo ayns rieughid son fakin yn aght ta reddyn foshlit, dy vod ad fakin cruink Vannin as dy chooilley red elley. T'eh gra, yn red mychione ny garaghyn biljagh, dy nee troar traghtee eh, t'eh cur argid son yn Rheynn Chymmyltaght, Bee as Eirinys, agh dy vel eh cur neesht ceau emshir mooie as dy chooilley pheiagh elley, myr shoh choud's dy vel canvas follym oc ec y traa t'ayn, myr ta ry akin ayns Archallaghan, dy vel caa daue cur stiagh ayn raaidyn roar noa as cassanyn coshee, dy vod ad fosley magh eh beggan ny smoo.
Bentyn da'n voayl ayns Archallaghan v'ad jeeaghyn er, ta Mnr Lees gra dy vel foast 60% ny 70% jeh foast goll er cummal. T'eh gra, choud's ta sleih gimman stiagh ayn veih cheu ny raaidey dy vel eh jeeaghyn ny ard feer vooar dy jarroo, agh dy nee garey biljagh mooar ta Archallaghan, agh dy vel palchey ayn, as bentyn da sleih loayrt mychione bio-chaghlaays as yn lheid, as dy vel ad nyn shassoo ayns shen, dy vel yn eeanlee goaill arrane as dy vel dy chooilley red elley ry gheddyn, myr shoh dy vel bea feie echey, as dy vel ny fosteryn roish veg elley jannoo shickyr nagh vel ushagyn ayns idd, dy vel ad jeeaghyn er lane trome-chooishagh tra t'ad goaill toshiaght er troarey.
Ta Mnr Lees gra dy vel eh dy bollagh jannoo seose caa, as 'sy chied ynnyd dy vel eh cur argid, as 'sy nah ynnyd dy vel eh lhiggey daue reirey y cheyll, as nagh vod ad ynrican settal as faagail eh rish ny 50 bleeaney ny 60 bleeaney ny 70 bleeaney shoh cheet, dy vel eh orroo reirey ayns aght jantagh, agh neesht, buill t'ad troarey, dy vel caa daue caghlaa ny t'ad dy yannoo cheusthie jeh, myr shoh caghlaaghyn keint dy viljyn, caghlaaghyn sorch dy ymmyd soccar, myr shoh dy vel eh gollrish goaill toshiaght ass-y-noa reesht, as dy nee traa greesaghey eh er yn oyr dy jean ad fakin caghlaaghyn, as caghlaaghyn dy yannoo ny share.
Ta Mnr Lees gra nagh vel ad dooney garaghyn biljagh rere skelim, as dy vel kuse dy chullee feer vooar oc, as dy vel sleih shooyl stiagh ayns ynnydyn t'ad troarey, sleih jannoo cosheeaght lesh moddee, roaryn bree, markee roar neesht, as dagh cheayrt ta peiagh ennagh shooyl stiagh ayn ta feme er y wirran scuirr veih ny t'ad dy yannoo as jannoo shickyr. T'eh gra dy vel eh cheet gys traa, as dagh cheayrt ta sleih cheet stiagh ayn dy vel ad cumrail fosley y garey biljagh ayns rieughid, dy vel eh er ny troareyderyn scuirr veih as jannoo shickyr jeh dy chooilley red reesht. T'eh gra, my vees ad lhiggey da ny troareyderyn freayll rish gyn goll er brishey stiagh ayn, dy vod ad geddyn ny glionteenyn as ny garaghyn biljagh shoh foshlit foddey ny s'tappee. T'eh gra, ec y traa t'ayn, raad ta ny biljyn ayns rieughid er duittym, dy vel ad danjeyragh, as t'eh guee er sleih, my sailliu, gyn shooyl fo biljyn t'er duittym, dy vel eh bolvaneagh.
---oooOooo---
Ta Barrantee Oaseirys Carrooagh Ellan Vannin er phointeil Nicola Libreri dy ve Lhiass Sheckter. Ta Bnr Libreri er nobbraghey da'n lught-reill neayr's 2018, as er y gherrid ren ee oaseirey fo-rheynn noa-chrooit noi niee argid as noi cur argid son atchimys, vees goaill stiagh scrutaghtyn, cur bree, policy as cur magh fys.
Ta'n Ard Sheckter Mark Rutherford credjal dy vel Bnr Libreri er ve ard scanshoil ayns niartaghey oaseirys ny Barrantee 'syn ard shoh noi niee argid as noi cur argid son atchimys 'sy vlein t'er n'gholl shaghey, as dy jean ee freayll rish cur er y hoshiaght breeaghyn dy chummal seose y cherroo ayns cur-rish gaueyn vees cheet dy ve ayn. T'eh gra dy jean pointeil ee dy ve ny Lhiass Sheckter cooney dy niartaghey co-obbraghey rish jantyssyn elley dy chur lhiettrimmys er far-vondeish liorish kimmee jeh kerroo carrooagh yn Ellan.
Ta Bnr Libreri er nobbraghey ayns shoh as har-vooir, goaill stiagh ayns cooney lesh Coonceil yn Oarpey ayns lhiassaghey creatleeyn noi niee argid as noi cur argid son atchimys 'sy Terbia.
Ayns fogrey ta Bnr Libreri gra dy vel y baggyrt jeh niee argid as cur argid son atchimys lhiassaghey gyn scuirr, as dy vel vel er lughtyn-reill ve er nyn dwoaie son gaueyn noa as vees ry heet. T'ee gra dy vel eh ard femoil dy chummal seose sauchys y cherroo as y lught-reill, dy vaih argid ayns reillyn lajer as dy obbraghey rish sleih as ta kied er ve currit daue dy chur fo chosh veg erbee vees baggyrt er y sauchys shen.
---oooOooo---
Ayns Balleychashtal, she'n eear Ard Shirveishagh, Tony Brown, t'er ve reiht myr Caairlagh Boayrd ny Barrantee, lurg da ve ec mullagh y teiy er y gherrid. T'eh gra dy ren ny Barrantee goaill toshiaght y fastyr beg jeh'n chied chaglym oc liorish cur er bun strughtoor noa, as eh shassoo er dy lajer dy row feme orroo jannoo, as dy daink eh lesh soilshaghey magh eh da ny cumraagyn echey as dy vel ad er hoiaghey jeh myr raad er y hoshiaght. T'eh gra nagh vel eh ynrican strughtoor noa son bingyn dy vod ad jannoo tooilley dy dowin, as cur-rish cooishyn ta madyral da'n valley, agh dy vod ad eisht cur magh fys da'n theay mychione ny t'ad dy yannoo ayns aght elley, as t'eh treishteil dy bee shen jeh smoo vondeish da'n valley dy hoiggal yn oyr t'ad jannoo shiartanse dy reddyn.
Bentyn da strughtoor ny bingyn, ta Mnr Brown gra dy vel eh cur er bun bing noa dy chur-rish cooishyn strateishagh, as shen dy ghra dy vel bingyn oc currit dy ghoaill ayns laue shiartanse dy churmyn ren ad soilshaghey magh neesht, dy vel sleih cleeir mychione ny curmyn t'orroo, as dy vel eh treishteil dy beagh shen dy ghra eisht dy vel ayns aght politickaght y Boayrd gurneil, dy bee ablid echey cur er reddyn dy jeeragh, vees y paart oc, yn aght ta'n balley goll er e hoshiaght, as ayns paart bee mie lesh sleih as ayns paart nagh bee, dy vel shen yn politickaght. Er-lesh, choud as t'ad dy feer jannoo yn obbyr oc, as jannoo dy kiart eh as dy slane, eisht dy vel eh treishteil dy vel ad jannoo ny reaghyssyn kiart son Balleychashtal.
Ta Mnr Brown gra, my vees sleih jeeaghyn er manifesto-yn currit magh ec ny olteynyn va reiht, as nagh row ad co-oardrailit, v'ad fir er-lheh cur sheese ny v'ad smooinaghtyn dy ve femoil, dy vel cooish chadjin ayn, as dy row fer jeh ny cooishyn cadjin shen dy row feme er y Voayrd gurneil ny smoo yn aght va reaghyssyn jeant vees jannoo er bea cummaltee Balleychashtal, as shen yn oyr ta chaghteryn reiht ain, myr shoh bee caghlaaghyn barel ayn, as dy beagh eh dree dy liooar mannagh row, as dy vel eh mychione resooney magh cooishyn, as dy treishteilagh cheet er yn aght feayslee kiart, as dy scanshoil eh, jannoo reddyn as ta feme orroo ve jeant.
Ta Mnr Brown gra dy vel ymmodee cooishyn as t'adsyn cooidjagh credjal nagh row geill currit daue as dy lhisagh shen er ve'n aght. Er-lesh, choud's ta dy chooilley pheiagh currit dy cleeir dy yannoo shen, eisht dy jean ad goll y raad as er-lesh dy vel sleih geearree, as nagh vel dooyt erbee ayn, veih'n sleih ren ceau teiy, dy ren ad ceau teiy son caghlaa.
---oooOooo---
Nee Barrantee Balleychashtal goaill toshiaght er recortey ooilley ny chaglymyn oc, chammah's freayll coontey giare scruit rish blein ny ghaa shoh cheet. Ta'n Lhiass Chaairlagh, John Cringle, gra dy jean shoh bishaghey baghtalys y lught-reill, as nee eh cur caa da olteynyn y Voayrd as da cummaltee dy gheddyn magh ny va grait dy feer.
Ta ny Barrantee caghlaa traa ny chaglymyn oc neesht, dy chummal ad reesht ec 7pm fastyr beg Jelhune, as ta Mnr Cringle gra dy jean shen caa da tooilley sleih dy ve kionfenish. T'eh gra nagh jean y chullee recortys costal agh mysh £1,000.
Ta Mnr Cringle gra dy vel shoh goll back foddee gys 10 bleeaney er dy henney tra va recortyssyn er ve jeant dy kinjagh, as dy row eh dy bunnidagh immeeaght son dagh chaglym dy beagh rybban currit dy roie as ersooyl lhieu, as dy row imnea mooar dy liooar echey dy row jerrey er ve currit er shen gyn veg ayns ynnyd jeh. Er-lesh dy ren eh brishey, agh nagh vel shen leshtal, as ny va boirey ersyn, lhaih coontaghyn giarey gys y reihys, nagh row ad ooilley goaill er-lheh, dy row eh smooinaghtyn nagh row ad cur enn er ny va goll er loayrt mychione, y resooney magh v'ayn mychione echey, as eisht yn ceau teiy, nagh row eh cur myn-phoyntyn jeh quoi va votal ayns foayr ny noi.
Ta Mnr Cringle gra dy vel feme orroo goaill tastey jeh neesht, myr boayrd, dy vel ny recortyssyn shoh, chammah's y coontey giare as y recortys, jannoo seose y recortys vees tannaghtyn ayn jeh Barrantee Balleychashtal, as she'n aght t'ad gobbraghey. T'eh gra dy vel feme orroo goaill stiagh myn-phoyntyn, nagh vel dooyt erbee ayn mychione shen, as dy vel feme orroo ve feer jeeragh, as my vees, 'sy traa ry heet, my vees veg neu-chooie taghyrt, dy vel feme orroo jeeaghyn back orroo, as lesh recortys verbatim jeh ny vees taghyrt son dagh chaglym y Voayrd, er-lesh dy vel shen scanshoil dy jarroo. T'eh gra dy nee greie, myr dy beagh eh, son jannoo shickyr, as y coontey giare scruit ec sleih, as foddee ad agh goll back as jannoo shickyr dy vel dy chooilley red kiart.
Ta Mnr Cringle gra dy jean shoh lhiggey da ny coontaghyn giarey da'n theay – as dy bee ad clouit er yn ynnyd eggey oc, as dy cummyssagh er y duillag Facebook oc, er ny buird fogrey mygeayrt y valley – dy bee barrant ec sleih dy vel ny coontaghyn giarey jeant ny recortys jeeragh jeh ny vees jeant ec y Voayrd roish y theay.
Ta Mnr Cringle gra dy vel shoh costys cho beg nagh vel plan mooar ayn ny'n lheid shen bentyn da'n argid cummal seose docamadyn, as dy by chosoylagh eh dy vel ad loayrt mychione ny sloo na £1,000.
---oooOooo---
Ayns Connaghyn ta Gabriella Corkish er jeet dy ve ny Barrantagh saa 'syn Ellan, as ish 19 bleeaney d'eash. V'ee mastey ny shiaght feallee hug stiagh dy ve nyn Marrantee, dy lhieeney ny shiaght ynnyd, as cha row feme er reihys. T'ee gra dy ren ee aase lesh mooarane jeh'n pholitickaght 'sy chooylrey: dy row y shaner eck Oltey yn Chiare as Feed rish jeih bleeaney as hie eh stiagh 'sy Choonceil Slattyssagh, myr shoh dy ren ee aase lesh mooarane jeh shen mygeayrt y thie, as dy row rieau sym eck er y pholitickaght, as dy ren ee studeyrys jeh reill as y politickagh son scrutaghtyn ec keim AS. T'ee gra dy daink y caa dy ve ayn, as dy vel ee ayns ynnyd mie 'syn obbyr eck ec y traa t'ayn, syn ynnyd oltaghey, myr shoh dy vel shoh traa mie dy ghoaill ayns laue eh as dy gholl myr Barrantagh son Connaghyn.
Ta'n Inney Chorkish gra dy vel ee geearree jannoo red ennagh ayns cooney lesh y cho-voodeeys, agh neesht dy ve eddin oor son y traa ry heet son sleih aegey, as myr shoh ayns aght cadjin dy vel Barrantee Connaghyn jannoo seose boayl mie dy ghoaill toshiaght roish, fy yerrey, laa ennagh, dy cummyssagh, goll stiagh ayns yn Chiare as Feed, 'sy Choonceil Slattyssagh, as reddyn myr shen.
Ta'n Inney Chorkish gra, as ish ve aeg, dy vod ee jeeaghyn er ny ta sleih jeh'n eash eck geearree; jeeaghyn er Pairk Connaghyn, cre fod mayd jannoo dy yannoo ny share eh son sleih, abbyr, veih three bleeaney jeig gys hoght bleeaney jeig dy eash, jeeaghyn er y phossan shen dy leih shinney. T'ee gra dy vel ooilley yn lught-thie eck baghey ayns Connaghyn, dy vel ny shenn phaarantyn eck baghey ayns aaght fastee ayns Connaghyn, myr shoh jeeaghyn er aght dy yannoo shen ny share, cre'n aght fod mayd shareaghey shen, cre ta ny cummaltee smooinaghtyn, cur coraa dauesyn, mannagh vel fys oc er quoi dy loayrt rish, mannagh vel aght oc dy loayrt rish Barrantagh, rish Oltey yn Chiare as Feed.
Ta'n Inney Chorkish gra dy vel eh treishteil dy vod ee ve coraa son sleih aegey, as er-lhee dy nee feer scanshoil eh, nagh vel agh caa beg da sleih aegey stiurey reddyn 'sy pholitickaght, ynrican er yn oyr nagh vel fys oc er quoi dy loayrt rish, as quoi ta Olteynyn yn Chiare as Feed oc, quoi ta ny Barrantee oc, as yn aght dy chur eam orroo. T'ee gra my shoh dy by vie lhee ve ny peiagh foshlit foddee sleih loayrt rish, foddee jannoo ny vees kiart son y cho-voodeeys as cooney 'syn aght share oddys ee.
Ta'n Inney Chorkish gra dy vel ee treishteil, as ish goaill yn chied chesmad shen dy heet dy ve ny Barrantagh ec eash cho aeg, dy jean shen greinnaghey sleih – my vees shen jeant ecksh, as my oddys ish jannoo eh, foddee dy voddym – er yn oyr dy vel ee smooinaghtyn dy nee scanshoil eh dy vel sleih aegey cheet dy ve cochianglt rish reddyn gollrish shoh, er yn oyr dy vel eh mie dy liooar cur barel er Facebook as reddyn gollrish shen, agh nagh vel shen dy ghra dy vel sleih ry chlashtyn. T'ee gra, my vees sleih jeean mychione cooish erbee as ta kiarail oc son y cho-voodeeys oc as yn aght ta reddyn goll er stiurey as er jannoo, eisht dy vel by Barrantee y raad dy gholl, as dy vel ee treishteil, lioreeish jannoo shoh, dy vel sleih cheet dy ve cochianglt.
