Meeryn ass Traa dy Liooar, Jelhune 5oo Jerrey Fouyir 2026
Haink ny fir va noa-reiht ayns y reihys mooar cadjin cooidjagh son y chied cheayrt Jemayrt shoh chaie, yn 29 Jerrey Fouyir, dy ve currit fo loo, as eisht dy chummal çhaglym yn Chiare as Feed. Va'n chied churrym orroo dy reih Loayreyder yn Chiare as Feed, as cha row agh un ennym currit roish, shen jeh Oltey yn Chiare as Feed aa-reiht son Doolish Hwoaie, v'ec mullagh y teiy 'sy rheynn reihys shen, David Ashford.
She Oltey yn Chiare as Feed son Connaghyn, Rob Callister, ren enmyssey Mnr Ashford, as dooyrt eh, ec toshiaght traa noa yn ard whaiyl, as lesh kuse dy olteynyn noa-reiht çheet stiagh dy ghoaill nyn ynnyd, dy beagh foays ry gheddyn ec yn Chiare as Feed ass Loayreyder vees goaill stiagh chammah's keeayl chionnit as slane toiggalys jeh ny tradishoonyn, jeh ny oardaghyn as jeh ny currymyn bunraghtaoil.
Ren Oltey yn Chiare as Feed son Middle, Jane Poole-Wilson, niartaghey treealtys Mnr Callister. As myr shoh ta Mnr Ashford er jeet dy ve Loayreyder yn Chiare as Feed, as myr Lhiass-Loareyder she'n Oltey noa son Garff, Richard Henthorn, va reiht.
Roish my ren yn Chiare as Feed goaill toshiaght er obbyr elley, shoh myr va Mnr Ashford gra roo. T'eh cheet orroo myr Olteynyn Onnoroil, as t'eh gra, roish my vel ad goaill toshiaght er y Chlaare Obbyr oc, dy by vie leshyn gra fockle ny ghaa. Hoshiaght, t'eh cur booise dauseyn ren enmyssey eh as ren niartaghey shen, agh da dy chooilley oltey, ad dy vel eh gennaghtyn dy feer eh myr onnor, y barrant va currit aynsyn y laa shen. T'eh gra dy vel tradishoon liauyr ec yn Chiare as Feed jeh resooney magh breeoil, jeh persoonidyn lajer, as eisht as nish neesht jeh cur bun crootagh erskyn imraa er Reillyn Beayn, as dy vel ourys er, eer lesh y cheeayl chionnit echey roish nish, dy vel eh er çhee çheet dy ve smoo ainjyssagh rish ooilley yn troor.
Ta Mnr Ashford gra, dy ve reiht ec cumraagey dy hirveishagh myr Loayreyder, she ard chied feer vooar eh, agh dy vel eh çheet lesh currym baghtal. T'eh gra dy nee feer henn ta'n oik hene, as veih ny traaghyn s'moghey dy vel y Loayreyder y er ve, cha nee ynrican y peiagh ta soie harrish ny vees jeant oc, agh loayreyder ass-lieh yn Chiare as Feed as fendeilagh jeh ny ard-chiedyn oc, as dy vel adsyn jannoo seose ayrn jeh undinys jehsyn ta ny recortyssyn scruit echey sheeyney back harrish ny sodjey na shey cheeadyn dy vleeantyn, as ta ny Chiare as Feed echey goll er lorgey back foddey ny sodjey.
Ta Mnr Ashford gimraa dy vel ad nyn soie ayns shamyr as ymmyd jeant j'ee liorish yn Chiare as Feed yn chied cheayrt 'sy vlein 1881, as mygeayrt y moo ta jallooyn jeusyn t'er ve 'sy stoyll shoh roue, as t'eh gra dy nee cooinaghtane niartal dy liooar eh nagh vel ooilley jeu agh meoiryn jeh'n undinys shoh rish tammylt. S'lesh y clane quail ta'n Loayreyder, t'eh dy ghra, as dy bee'n obbyr echey dy choadey y cair ec dy chooilley oltey dy ve clashtynit, dy yannoo shickyr dy vel ny oardaghyn oc goll er cummal dy cairagh as dy kiart, as dy chooney lesh y whaiyl shoh cooilleeney yn obbyr eck dy fondagh ass lieh y phobble er t'ad ooilley ayns shoh dy hirveishagh.
Ta Mnr Ashford gra dy bee, as nagh vod eh ve currit shaghey, traaghyn as ta olteynyn neu-choardail rish briwnys y chaairlagh, as dy jarroo, my vees traa çheet as dy vel dy chooilley pheiagh wheesh cheddin mee-wooiagh lesh, foddee dy jean eh toiggal shen myr cowrey beg dy vel eh jannoo corrym reddyn bunnys dy kiart. T'eh gra dy vel eh geearree cur geill dauesyn ta cooney lesh yn Chiare as Feed 'sy chooylrey, as foddee dy vel y Loayreyder 'sy stoyll, agh dy vel stiurey rea y voayl shoh ny lhie er ymmodee sleih as keirdagh as keeayl chionnit oc, as dy vel fys echey dy bee eshyn ny lhie orroo feer vooar.
Ta Mnr Ashford gra, myr yn eie s'jerree echey son olteynyn dy smooinaghtyn er roish my vees ad goaill toshiaght, choud's foddee resooney magh 'sy çhamyr, as dy lhisagh eh y ve, breeoil, dy vel eh treishteil dy vod ad dy kinjagh cooinaghtyn er, nagh vel mee-choardail yn oyr son mee-chooyrtoilid, as dy jean ad cooilleeney foddey ny smoo tra t'ad cur doolane fo ny arganeyn na fo y cheilley, clashtyn chammah's loayrt, as toiggal dy vod olteynyn glackey ymmodee caghlaaghyn barel, choud's ta brod oc veih'n un vian dy yannoo ny t'ad credjal dy ve kiart son yn Ellan ain.
Ta Mnr Ashford gra dy vel y cheeayl chionnit echey 'sy Chiare as Feed ayns ny jeih bleeaney t'er n'gholl shaghey er nynsaghey da dy vel y whaiyl shoh gobbraghey 'syn aght share eck tra t'ee gobbraghey cooidjagh: dy vod mee-choardail ve oc, lane-ennaghtagh ny keayrtyn, agh dy vel pobble nyn Ellan er chur ad ayns shen son un oyr, dy obbraghey cooidjagh dy yannoo ny share co-voodeeys yn Ellan ain, as dy row shen çhaghteraght va currit dy feer 'sy reihys mooar cadjin er y gherrid. T'eh cur booise reesht son y treisht t'ad dy chur aynsyn, as dy jean eh e chooidshare dy ve freggyrtagh da, dy chummal seose ny cliaghtaghyn as seyrsnyn y whaiyl shoh, as dy hirveishagh orroo ooilley dy cairagh.
Bentyn da'n phaart echey myr Loayreyder yn Chiare as Feed, ta Mnr Ashford gra dy nee keim noa eh, red ennagh elley, agh nagh vel eh er chor erbee jerrey jeh coorse politickagh, as dy row yn Reejerey Chalse Kerruish 'syn oik rish ymmodee bleeantyn, as son shickyrys nagh row eh jerrey y choorse politickagh echey, dy row eh roish dy yannoo dy chooilley horçh dy reddyn as ayns rieughid dy mooar dy loayrt magh ayns Quaiyl Tinvaal. T'eh gra dy vel paart y Loayreydery t'ain ayns shoh 'syn Ellan neu-chosoyley rish veg elley, as choud's ta'n Loayreyder ny er oik reill harrish yn Chiare as Feed, dy vel paart dy loayrt magh dy mooar ayns Tinvaal, as dy vel eh tannaghtyn çhaghter feer vreeoil son y rheynn reihys.
Ta Mnr Ashford gra dy by vaghtal eh dy vel eh neu-chosoyley rish ny paartyn t'er ve echey trooid y choorse politickagh echey choud's nish, agh dy vel eh onnorit dy dowin dy vel Olteynyn yn Chiare as Feed er chur nyn dreisht aynsyn dy chooilleeney ny currymyn shoh. T'eh gra dy vel y smooinaghtyn echey yn red cheddin as shen ec y fer roish, yn Loayryder Watterson, as dy vel girrid ny keayrtyn - my vees peiagh ennagh goll er rour, myr rish Loayreyderyn roish nish, bee ad currit ayns cooinaghtyn dy heet gys bun ny cooish, as fy yerrey dy nee Traa Feysht t'ayn, myr shoh dy lhisagh eh ve feysht as freggyrt, as nagh lhisagh eh ve caa dy yannoo oraidyn – dy vel shen er ve barel ny fir roish, as dy bee shen y barel echey neesht.
Va oltey noa, Richard Henthorn (Garff) reiht dy ve ny Lhiass-Loayreyder.
---oooOooo---
Obbyr elley son yn Chiare as Feed noa, bee shen dy reih yn Ard Shirveishagh, agh choud's ta shin fuirraghtyn er Ard Shirveishagh as Coonceil ny Shirveishee noa, ta Shirveishee y lught-reill Alfred Cannan foast cooilleeney obbyr femoil erbee cochianglt rish ny oikyn shen. As er yn oyr dy row Mnr Ashford ny Hirveishagh son Oik Coonceil ny Shirveishee, as nagh vod eh ve oltey y lught-reill nish t'eh er jeet dy ve Loayreyder yn Chiare as Feed, v'eh ersyn irree ass yn oik shen myr Shirveishagh.
Ta Mnr Cannan, myr fer toshee y lught-reill vees tannaghtyn ayn derrey vees fer noa currit er bun, er veeraghey, ayns coardail rish cliaghtey y vunraght dy vel y Loayreyder gaghtey gyn bai as scarrit veih'n sheckter, dy ren Mnr Ashford cur stiagh screeuyn dy ghra dy row eh irree ass myr Shirveishagh son Oik Coonceil ny Shirveishee, as dy row eh er hoiaghey jeh. Ta Mnr Cannan gra, lesh lught-reill çheet dy ve ayn ayns ny shiaghtinyn shoh çheet dy vel eh er reaghey dy ghoaill ersyn hene y currym shen ayns aght interim. T'eh gra dy vel eh cur moylley as soylley da Mnr Ashford ayns ve reiht dy ve Loayreyder, as dy vel eh cur booise da son ooilley va jeant echey 'sy traa echey myr Shirveishagh son Oik Coonceil ny Shirveishee.
---oooOooo---
Lesh 15 olteynyn noa, ta earroo smoo dy leih myr shen na ta olteynyn va aa-reiht. Ta'n Oltey noa son Doolish Hiar, Andy Saunders, gra dy by vie leshyn smooinaghtyn dy vel ad er n'gheddyn paart dy wirran cooidjagh hannah, as dy nee baghtal eh dy row eam feer vooar son caghlaa veih pobble Vannin, as er-lesh nagh row agh un Oltey yn Chiare as Feed va çheet back ren bishaghey yn rheynn oc dy heiy-yn, as er-lesh dy feme ocsyn er goll stiagh ayn myr ny fir dellal lesh yn aigney son dellal t'ec yn chooid smoo jeu, as ynrican dy chur eab er gleashaghey, er geddyn momentum, vees feer scanshoil, er yn oyr nagh row y momentum shen ain, as dy vel yn traa er jeet son shen.
Va Stephen Broad ny Oltey noa-reiht ayns Ayrey as Maayl, as t'eh gra dy vel 15 fir noa ayn, as fir yindyssagh ad neesht, as kuse jeu veih cooylrey jeerit dy çhionn er dellal, as dy vel eh treishteil dy bee ad geddyn reddyn jeant as jannoo caghlaa. T'eh gra dy row eshyn jeeraghey 'sy vanifesto echey, nagh row eh cur screeuyn gys Jishig ny Nollick, er yn oyr dy vel fys ain er erree screeunyn gys Jishig ny Nollick, agh dy jean eh ny v'eh dy ghra 'sy vanifesto, dy jean eh cur roish ny treealtyssyn shen, dy jean eh troggal neese ny aghinyn shen, as dy vel eh ayns shen dy obbraghey rish ny 14 Olteynyn noa elley yn Chiare as Feed as dy chur eab er geddyn kuse dy eiyrtyssyn elley son yn Ellan shoh, as er-lesh dy vel eh cho scanshoil dy vel ad jannoo shen.
Ta Mnr Saunders gra dy vel cooylrey ec dy chooilley pheiagh – shen dy ghra ny Olteynyn noa-reiht – jeh ve feer vie ayns ny va jeant oc, as er-lesh dy vel keeayl chionnit oc ooilley jeh bea, dy vel ad ooilley feaillee slane-aasit, eer Daniel aeg – shen dy ghra Daniel Davison, vees y peiagh saa rieau dy ve reiht myr Oltey yn Chiare as Feed, as eh 18 bleeaney dy eash, as fer ny ny olteynyn noa son Glionfaba as Purt ny Hinshey – as ta Mnr Saunders gra dy vel eshyn feer vie er bastal. T'eh gra, myr shoh, dy bee ad ayns shen, as dy vel keeayl chionnit oc dy chur-lhieu, as dy vel fys oc er ny vees neu-chiart lesh yn Ellan, as t'eh treishteil dy vod ad jannoo ny caghlaaghyn shen dy chur er goll reesht.
Er-lesh Mnr Broad dy vel co-hoiggalys dy row y lught-reill s'jerree – son shickyrys er-e-hon v'eh'n lught-reill s'jerree, as foddee y fer roish shen neesht – dy ren eshyn fakin yn Ellan goll drogh raad, as dy jarroo nagh row eh coontey monney jeh shen, as dy daink yn ard shen dy mee-houyr cho boiragh dy ren eh, tra haink eh gys y traa, cur roish yn ennym echey, as dy row eh ayns shen y laa shen v'ayn, myr shoh er-lesh dy vel feallee mie ayn as dy jean ad caghlaa.
Bentyn da Coonceil ny Shirveishee, va coontey giare clouit dagh mee jeh ny cooishyn va ny olteynyn loayrt mychione, agh cha nel y lheid er ve clouit rish tammylt, lesh y choontey giare s'jerree bentyn da cooishyn va Coonceil ny Shirveishee loayrt mychione Mee Voaldyn. Er-lesh Mnr Saunders foddee dy lhisagh smoo baghtalys ve ayns Coonceil ny Shirveishee, ny yeih dy nee baghtal eh dy vel feme er kuse dy choloayrtyssyn ta feer jeeragh, as foddee nagh vel ad geearree coontey giare jeant jeh dy chooilley red, agh er-lesh dy lhisagh ad son shickyrys jeeaghyn er fakin ny eiyrtyssyn jeh ceau teiy-yn çheusthie jeh Coonceil ny Shirveishee goll er clou, as smoo foshlit, dy vel shen red ennagh yinnagh eshyn son shickyrys smooinaghtyn er.
Ta Mnr Broad smooinaghtyn nagh lhisagh Coonceil ny Shirveishee cur gobbane er peiagh erbee vees ayns shen, ny ve ayns paart jeh oltey na veg jeh'n lheid shen – shen dy ghra, ve ny oltey politickagh jeh rheynn y reiltys ny jeh boayrd slattyssagh – as er-lesh dy vel sleih ayns shen dy yannoo nyn gooidshare son Ellan Vannin, agh dy vel ad ayns shen dy chur orroo cur coontey jeh ny t'ad dy yannoo. T'eh loayrt mychione geddyn rey rish y dullyraght shoh jeh'n reiltys, as dy vel sleih geearree baghtalys, dy vel sleih geearree fys y ve oc er ny vees taghyrt, as dy vel sleih shinney t'ayn as v'ad jannoo eh dy neu-chiart, as dy vel feme ain er caghlaa shen as jannoo kiart eh.
Stephen Broad, v'ec mullagh y teiy myr Oltey yn Chiare as Feed son Ayrey as Maayl, as ayns Ayrey as Maayl, 'sy nah ynnyd va'n Ard Shirveishagh, Alfred Cannin. Ren yn Shirveishagh son Gastid Dellal, Tim Johnston, coayl yn ynnyd echey ayns shen.
Va Andy Saunders ec mullagh y teiy myr Oltey yn Chiare as Feed son Doolish Hiar. 'Sy nah ynnyd 'sy teiy ayns Doolish Hiar va Joney Faragher jeh Partee Obbraghys Vannin, as ren yn Shirveishagh son Çhymmyltaght, Bee as Eirinys, Clare Barber, coayl yn ynnyd eck.
Ec mullagh y teiy ayns Glionfaba as Purt ny Hinshey va Katryna Baptist, as t'ee gra dy vel dy chooilley pheiagh er ve mooie, loayrt rish cummaltee ny rheynnyn reihys, myr shoh er-lhee dy vel eie mie jeh ny vees feme er ve jeant, as dy vel kuse dy reaghyssyn doillee ayn as feme er jannoo ad, as dy vel ish jeeaghyn roee dy ghoaill toshiaght er obbyr, ayns rieughid.
'Sy nah ynnyd 'sy teiy ayns Glionfaba as Purt ny Hinshey va Daniel Davison, t'er jeet dy ve Oltey saa yn Chiare as Feed er dy rieau ec 18 bleeaney dy eash.
Ec mullagh y teiy ayns Carbory, Balleychashtal as Malew va Kirrie Jenkins, t'er ve Caairlagh Boayrd Barrantee Carbory as Rushen. T'ee gra dy vod lughtyn-reill ynnydoil as y reiltys meanagh jannoo seose niart feer lajer my vees ad gobbraghey ry cheilley, as er-lhee dy vel ad ayns ynnyd mie 'syn aght shen, lesh sclate glen, goaill toshiaght ass y noa, as dy jarroo cur er cooishyn goll er y toshiaght myr vondeish da co-voodeeyssyn ynnydoil.
'Sy rheynn reihys shen 'sy nah ynnyd va Jason Moorhouse aa-reiht.
Ec mullagh y teiy ayns Doolish Veanagh va Peter Shimmin, as 'sy nah ynnyd 'sy teiy shen va'n Shirveishagh Tashtee, Chris Thomas. Ta Mnr Shimmin gra dy vel shin baghey ayns traa as she eddyr-insh vees foshlit feer lhean, dy vel eshyn ayns shen er y radio ec toshiaght y voghrey, dy vel ny meanyn sheshoil poltal dy chooilley voayl, as dy vel feme er cur freggyrt da ooilley jeh shen feer tappee, as er-lesh dy vod shen ve doolane fo'n reiltys dy chur freggyrt dy tappee, ga dy vel eh goll trooid kuse dy chaghlaaghyn keim dy choardail roish my vees çhaghteraght currit magh ayns shen, myr shoh dy vel fys echey dy vel Mnr Thomas er loayrt mychione reiltys cummit smoo fondagh roish nish, as er-lesh dy vel feme ain er goll back gys shen.
Cha daink eh 'sy teiy shen lesh yn eear oltey, Ann Corlett, ren coayl yn ynnyd eck. Roish nish ta Mnr Shimmin er nobbraghey myr fer oik cur bree da cooishyn Slaynt y Theay, as t'eh gra dy vel aa-hroggal seose treisht ayns Shirveish Theayagh jannoo seose tosheeaght er-e-hon.
Ta Oltey yn Chiare as Feed son Garff, Vicki Hewison, gra, mastey ooilley ny olteynyn noa, dy vel whilleen eie oc as feme er cur er y hoshiaght ad dy tappee, myr shoh nagh vel ish geearree cur roish veg elley ec y traa t'ayn, agh dy jean ee pohlldal sleih elley, agh dy by chronnal eh dy vel feme oc er jeeaghyn er y tarmaynys, dy vel feme oc er jeeaghyn er kiarail slaynt, dy vel feme oc er jeeaghyn er thieys, as er whilleen cooish. T'ee gra dy nee quaiyl ee vees jeeaghyn dy mooar dy gholl er oai dy tappee, er-lhee dy jean sleih fakin ymmodee caghlaaghyn, as dy bee traa feer anaasagh eh.
---oooOooo--
Bentyn da parteeyn politickagh, cha daink eh agh lesh Partee Obbraghys Vannin, as Bnr Faragher çheet dy ve aa-reiht ayns Doolish Hiar, as Sarah Maltby ec mullagh y teiy ayns Doolish Yiass. Cha daink eh lesh daa oltey elley Partee Obbraghys Vannin. Va kiare shirreyderyn ass-lieh Partee Libraalagh Vannin, agh cha row fer erbee jeu reiht, goaill stiagh Lawrie Hooper, va ny oltey son Rhumsaa, agh chaill eh yn ynnyd echey. Va kiare shirreyderyn ass-lieh y Ghleashaght son Caghlaa, agh cha daink eh lesh fer erbee jeu, as va daa oltey ass-lieh Cur Harrish Ellan Vannin, agh v'ad 'syn un rheynn reihys as va'n derrey yeh y fer s'jerree 'sy teiy, as y jeh elley y fer s'jerree agh nane.
Va ooilley ny queig shirreyderyn jeig noa va reiht gra dy row ad neu-chrogheydagh, as ass yn Chiare as Feed nish, cha nee agh Bnr Faragher as Bnr Maltby ta nyn olteynyn jeh partee politickagh, myr shoh t'eh soilshaghey magh dy vel pobble 'syn Ellan ceau teiy bentyn da persoonid, shaghey rere sorçh dy pholitickaght stiurit ayns parteeyn.
---oooOooo--
As myr shoh, gys y nah chooish son olteynyn yn Chiare as Feed, as shen reih Ard Shirveishagh. Hig yn laa s'jerree son sleih dy ve enmyssit dy chur stiagh son ve'n Ard Shirveishagh laa ny vairagh, Jemayrt yn 6 Jerrey Fouyir. Cho leah's va Rob Callister er jeet dy ve Oltey yn Chiare as Feed son Connaghyn reesht, as eh aa-reiht, agh 'sy nah ynnyd, lesh yn Dr Rachel Glover ec mullagh y teiy 'sy rheynn reihys shen, ren Mnr Callister cur mygeayrt da olteynyn elley manifesto as 16 duillagyn ayn, soilshaghey magh ny eieyn echey as y yeearree echey dy ve'n Ard Shirveishagh. V'eh gra dy row eh ceau paart dy hraa lurg shen ayns loayrt rish sleih as feddyn magh row ad arryltagh dy obbraghey marish ayns Coonceil ny Shirveishee.
Va Oltey yn Chiare as Feed son Middle, Jane Poole-Wilson, ny Lhiass Ard Shirveishagh fo Mnr Cannan, ga nagh vel ee er n'ghra veg mychione cur stiagh dy ve'n Ard Shirveishagh y cheayrt shoh. Fer elley as ta sleih smooinaghtyn dy by lickly eh dy jinnagh eh cur stiagh dy ve'n Ard Shirveishagh, shen yn Oltey son Doolish Veanagh, Chris Thomas.
Llaa ny vairagh, Jemayrt yn 6 Jerrey Fouyir, bee sleih enmyssit ec oltey as yn enmyssey shen niartit ec oltey elley, as myr shoh bee fys ain er ny shirreyderyn ayns rieughid, as eisht shiaghtin laa ny vairagh, yn 13 Jerrey Fouyir, bee oraidyn liorish ny shirreyderyn as caa da olteynyn elley dy chur feysht orroo, roish my vees teiy goll er cummal dy reaghey y chooish.
Agh ec y traa t'ayn, choud's ta shin fuirraghtyn er shen, she Alfred Cannan ta foast yn Ard Shirveishagh. Cha ren yn Fer-lhee Alex Allinson shirrey ynnyd 'sy reihys mooar cadjin y cheayrt shoh, as rish tammylt ve'n Shirveishagh Tashtee 'sy lught-reill Cannan, derrey va'n raad currit da doaltattymagh Toshiaght Arree mleeaney. Ta'n Fer-lhee Allinson gra, er-lesh, dy vel Mnr Cannan ayns ynnyd feer doillee, as dy vel eh er quoi erbee vees Ard Shirveishagh dy yannoo reaghyssyn doillee mychione echeysyn. T'eh gra nagh vel eh shickeyr vel eh eer geearree cur stiagh as cur nah eab er y chooish, ny vel eh geearree goll back 'sy Tashtey, as dy beagh foddey ny smoo pooar echey na va echey myr Ard Shirveishagh, agh cre erbee t'eh dy yannoo, dy cummyssagh, dy vod eh jannoo corragh nah Choonceil ny Shirveishee er yn oyr dy vel eshyn er ve'n Ard Shirveishagh.
Va Chris Boyde reaghey creearyn ass-lieh Radio Vannin as soilshaghey magh ny data jeh teiyderyn choud's v'ad faagail. T'eh gra dy nee cooish scanshoil ee yn cheayrt shoh, reih Ard Shirveishagh as eisht son y pheiagh shen dy reaghey Coonceil ny Shirveishee, agh t'eh gra, cho leah's vees Coonceil ny Shirveishee reiht, dy by chosoylagh eh dy jean shen ymmyd jeh'n chooid smoo dy pholitickeyryn as keeayl chionnit oc ta mooie ayns shen, myr shoh dy bee ooilley jeu vees çheet dy ve olteynyn ny rheynnyn son y chooid smoo Olteynyn yn Chiare as Feed thalk noa, as dy jean ad shen çheet stiagh ayn as cur eab er ynsaghey as geddyn y cheeayl chionnit jeh obbraghey ayns rheynn ass y noa harrish y clane reiltys.
Staddystaghteyr ta Francesca Signorio, as t'ee gra dy vel ee smooinaghtyn dy vel oik yn ard Shirveishagh cho scanshoil dy vel shin feme peiagh ennagh as keeayl chionnit ec y pheiagh shen jeh'n reiltys, as dy vel feme ain er peiagh erbee vees toiggal ny cooishyn veih'n chied laa, shaghey goaill kuse dy veeaghyn - as t'ee gra ayns shen dy vel shen ve feoiltagh, as foddee dy vleeantyn - dy hoiggal yn aght ta'n reiltys gobbraghey bentyn da ny myn-phoyntyn, as myr shoh dy vel ee treishteil dy bee'n Ard Shirveishagh peiagh ennagh dy cheeayl chionnit.
Ta Mnr Boyde gra dy vel daa jeh ny olteynyn noa t'er jeet stiagh ayn as ta cheeayl chionnit oc jeh ve çheusthie jeh'n shirveish theayagh, as obbraghey ayns shen, myr shoh dy vel y fys shen oc, myr shoh nagh vel ad çheet stiagh ayn gyn eie erbee ve oc, agh er-lesh, eer tra ve ny hoie foddey çheumooie, dy vel eh agh geaishtagh rish Tinvaal as rish yn Chiare as Feed as dy vel eh smooinaghtyn dy vel ooilley ny myn-phoyntyn jeh'n reiltys cho mooar, son peiagh ennagh dy heet stiagh ass-y-noa, dy beagh eh jerkal rish rour dy jarroo, as my vees peiagh ennagh gennaghtyn dy vod ad çheet stiagh ayn, as dy row teiy kiart er ve ayn son slane caghlaa 'sy raad ta reddyn goll, as dy vel ad smooinaghtyn dy vel ad y caghlaa shen 'sy raad dy gholl, eisht, dy cummyssagh, foddee ad cur eab er shen, agh er-lesh dy beagh shen jerkal rish red feer vooar jeh peiagh ennagh.
Er-lesh Oltey yn Chiare as Feed son Doolish Veanagh, ta'n Shirveishagh Tashtee derrey vees lught-reill noa pointit, Chris Thomas, dy bee palçhey dy olteynyn noa nyn shirveishee, agh er-lesh dy vel y theay ouryssagh mychione oltey thalk noa ve'n Ard Shirveishagh, agh dy nee mayd feddyn magh. T'eh gra dy nee doillee eh sheiltyn dy beagh eh myr shen, agh dy vel eh smooinaghtyn dy bee earroo mooar jeh olteynyn noa ayns Coonceil ny Shirveishee.
Ta Francesca Signorio gra, my vees sleih jeeaghyn er colughtyn, nagh vel eh gyn cosoyley son stiureyder reiree noa, ard sheckter noa, dy heet stiagh ayn gys cochorp mooar as dy ghoaill harrish eh, agh dy cadjin dy vel keeayl chionnit oc jeh çheusthie jeh'n sorçh shen dy jeadys, myr shoh nagh vel eh mychione peiagh ennagh thalk noa çheet stiagh ayn gyn keeayl chionnit erbee jeh'n pholitickagh.
---oooOooo--
Cooish son y nah lught-reill, bee shen bentyn da plannyn ren Preeu-airey y Reeriaght Unnaneysit, Andy Burnham, soilshaghey magh bentyn da'n ghlass three-filley er pensionyn. Er y gherrid, loayr Mnr Burnham mychione aa-reaghey yn aght ta bishaghey jeant ayns pension y steat, agh cha jig shen çhelleeragh. T'eh loayrt mychione cooilleeney shen beggan ny slhiurey na kiare bleeaney woish nish 'sy vlein 2030.
Ta'n ghlass three-filley jannoo shickyr dy vel bishaghey da pension y steat liorish yn rate dy volgey argidoil 'sy vlein, yn towse ta argid faill er mean er vishaghey 'sy vlein, ny liorish 2.5%, cre erbee jeu vees yn fer syrjey. Tra va'n Fer-lhee Alex Allinson ny Hirveishagh Tashtee, v'eh loayrt, gollrish Mnr Burnham er y gherrid, mychione plan dy yannoo glass dooble eh, shaghey glass three-filley, agh va'n eie shen currit ry lhiattee lurg da politickeyryn cremmey eh.
---oooOooo--
Ta Sheshaght Lught-traghtee Ellan Vannin greinnaghey olteynyn yn Chiare as Feed dy obbraghey rish dy chur er y hoshiaght aase 'sy tarmaynys. Ta'n Sheshaght çheet er three tosheeaghtyn erskyn ooilley – aase tarmaynagh vees ry chummal seose; gennid dy schleiyn as doilleeidyn ayns failley; as jannoo noa-emshiraght yn aght ta reaghyssyn jeant. Ta Eaghtyrane y Heshaght, Claire Watterson, gra dy vel dorrys y Heshaght foshlit, as dy vel ee soit harrish y raad veih ny Troggalyn Slattyssagh, as dy vel ee feer vaynrey son fer erbee jeh olteynyn noa yn Chiare as Feed dy hooyl stiagh 'sy dorrys shen, dy hoie sheese lesh cappan dy hey as dy chur feyshtyn.
Eaghtyrane Sheshaght Lught-traghtee Ellan Vannin, Claire Watterson. Ta Bnr Watterson gra nagh vel sleih jerkal rish ooilley ny aghtyn-feayslee dy ve ec politickeyryn, agh dy vel feme orroo cur ablid er colughtyn dy chooney lhieu jannoo aarloo ny staydyn ayn dy aase.
---oooOooo--
Ta'n Shirveishagh son Bun-troggalys ec y traa t'ayn, ga nagh vel eh oltey yn Chiare as Feed nish, Tim Crookall, er chur leshtal gyn cagliagh lurg da tuarastyl liorish Barrantagh Tinvaal son Reirey, y turneyr, Paul Beckett, vees soilshaghey magh dy row foutyn tromey 'syn aght va reill goll er cooilleeney harrish obbraghyn coadee noi thooillaghyn ayns Ardane Victoria ayns Laksey.
Ayns fogrey gys Tinvaal, ren Mnr Crookall goaill rish dy row obbraghyn ec cooyl jeh thie cur cummaltee ayns ynnyd doillee neu-houyr. T'eh gra dy vel yn rheynn goaill-rish nagh ren ny oardaghyn echey obbraghey 'syn aght lhisagh ad v'er n'yannoo, lesh failleil ayns freayll rick er plannal, kied bentyn da gaue jeh thooillaghyn, cur saraghyn ayns conaant, reillyn argidoil, cur-rish plaiynt as oaseirys.
Ta'n rheynn gra dy row y cummey as aght troggee coardit son boalley ny hawiney caghlaait choud's v'eh goll er troggal, as dy row red ennagh elley troggit nagh row coardail rish ny jallooyn tayrnit son plannal, as nagh row jannoo seose ayrn jeh'n chied phlannal v'ayn.
Ren y Rheynn Bun-troggalys troggal, gyn kied, patio ayns ynnyd jeh boalley coadee noi thooillaghyn ayns thie preevaadjagh, ren costal tackeydee ny smoo na £30,000. Lhisagh caghlaa erbee er chur sthap formoil er yn obbyr, dy chummal aa-scrutaght as dy hirrey kied phlannal da caghlaa erbee roish my row obbyr elley jeant.
Ta Mnr Crookall gra nagh bee eh faagit nish son shellooder y thie dy yannoo yn obbyr femoil, vees dy ghoaill ersooyl y patio t'ayn, as dy lhieggal eh reesht gys grunt ny hawiney, as eisht dy hroggal boalley noa rere y chummey coardit son y voalley coadee noi thooillaghyn. Agh roish my vees obbyr goaill toshiaght, bee baght jeant jeh stayd ny troggalys as ny thallooyn oddys yn obbyr jannoo er. Nee'n rheynn karraghey jeeill erbee vees jeant liorish obbraghyn dy charraghey cooishyn , as hig ny costyssyn er tackeydee.
Ta Mnr Crookall gra dy row eh fo'n rheynn goaill ayns laue obbyr dy charraghey y chooish choud's v'eh cooie dy obbraghey 'syn awin mleeaney, agh er coontey jeh shirrey kied phlannal, reaghey conaantyn as reaghey claareyn traa son obbyr, cha jig toshiaght er yn obbyr derrey Mean Souree 2027.
Ta Mnr Crookall gra dy vel aghtyn share er ve currit er bun dy reirey conaantyn, dy reayll smaght argidoil, dy yannoo recortys jeh reaghyssyn as dy reill harrish shaleeyn. Agh nee tuarastylyn goll er jannoo er aghtyn dy charraghey cooishyn derrey vees kione currit er yn obbyr.
---oooOooo--
Eear oltey elley yn Chiare as Feed ta foast 'syn oik echey derrey vees reaghys noa coardit, shen Caairlagh yn Oik Dellal Cairagh, Tim Glover. Choud's ta diesel nish çheet dy ve cho costallagh, lesh drogh eiyrtys jeh shen er costyssyn elley, ta Mnr Glover gra dy vel Ellan Vannin currit da ny leaystaghyn ayns priosyn, gollrish buill elley 'sy theihll, agh dy vel eh beggan anchasley er-nyn-son er yn oyr dy vel yn ooill as diesel as myr shen çheet stiagh ayn ayns baatey, çheet noal ayns lhong, myr shoh dy vel shin geeck son ny vees y prios ec y traa shen, myr shoh ny keayrtyn shen dy ghra dy vel vondeish da Ellan Vannin, as ny keayrtyn shen dy ghra dy vel shin beggan ny syrjey na 'sy Reeriaght Unnaneysit.
Ta Mnr Glover gra dy vel coloayrtyssyn reiltagh oc rish ny kiareyderyn conney ayns shoh 'syn Ellan, myr shoh dy vel ad dy kinjagh freayll arrey er priosyn. T'eh gra dy vel eh orroo shirrey costys orrin ny t'eh orroo hene geeck, as dy vel y corrillagh cadjin dy vondeish oc, as dy bee shoh ny cooish son y nah lught-reill nish, as dy vel eh er n'ghra, er-lesh dy vel daa jeh ny cooishyn smoo ta taghyrt çhelleeragh, shen Moneyval, as dy vel y scrutaght shen fo raad, agh chammah's shen dy bee eh nish y mullagh doaltattym ayns creoighys y chostys bea, nagh vel ayns rieughid rieau er n'gholl ersooyl, agh dy vel son shickyrys mullagh doaltattym nish choud's ta shin goll stiagh ayns ny meeaghyn s'feayrey.
Ta Mnr Glover gra dy vel y stayd ayns y Cheyllys Hormuz foast goll er, as dy vel eh jannoo er foddey ny smoo na ynrican priosyn son ooill as conney : dy vel eh jannoo er stoyryn bee, er arroo, cre erbee foddee sleih çheet er, dy vel eiyrtys orroo ooilley, myr shoh nagh bee eh y costys bea freillt ynrican da'n stayd shoh bentyn da'n chostys son diesel ec y traa t'ayn, dy bee eh foddey ny smoo skeaylt magh na shen.
---oooOooo--
Hig vondeish da sleih ayns shoh ass reaghys y Reeriaght Unnaneysit dy chur sheese yn rate dy Cheesh Tooilley Feeuid er coontyssyn son lectraghys son thieyn veih 5% gys 0%. Shoh reaghys shallidagh, veih'n 1ed Jerrey Fouyir mleeaney derrey yn 31 Mee Vayrt 2027.
Bee'n un reaghys sheeynt magh gys colughtyn beggey ta reihalagh da'n rate cheddin as son thieyn son bree as nagh vel recortit son Keesh Tooilley Feeuid, as da sheshaghtyn giastyllagh as thieyn kiarail cummalagh vees reihalagh. Dy ve reihalagh, shegin da ymmyd jeh lectraghys liorish colughtyn beggey ve ny sinshley na 1,000 oor-kW ayns mee.
Ta Lught-reill Bun-shirveishyn Vannin gra dy vel eh er n'yannoo gys y date ooilley ny coaryssyn echey, myr shoh nagh vel feme er custymeyryn jannoo veg. T'eh gra dy bee'n caghlaa jeant dy hautomatagh ayns coontyssyn son lectraghys son thieyn ny son troggalyn traghtee vees reihalagh.
Ta Keesh Tooilley Feeuid red ennagh vees currit er cooid liorish y Reeriaght Unnaneysit, agh vees goll er çhymsaghey ayns shoh 'syn Ellan neesht, as yn Ellan cosney feeuid y cheesh vees ry eeck er cooid creckit 'syn Ellan.
---oooOooo--
Ta eear Stiureyder Reiree Keylann Ellan Vannin, Findlay Macleod, ta kiart er jeet dy ve ny haaue veih'n startey shen, er ve pointit myr cleragh da Barrantee Purt Çhiarn, as bee eh toshiaght y ghoaill ayns shen Jelune y 19 Jerrey Fouyir. T'eh gra dy vel shoh çheet ec traa ta aa-scrutaght strateishagh fo raad as dy vel kuse dy ghoolaneyn scanshoil fo'n lught-reill ynnydoil dy ghoaill ayns laue. T'eh gra dy bee mooarane echey dy ynsaghey, agh dy vel eh credjal dy vel ny schleiyn echey as y cheeayl chionnit veih'n choorse echey lane chooie son yn obbyr ry heet.
Ta'n Boayrd gra dy ren ad ymmyd jeh cooney veih fir oik Coonceil Ghoolish dy yannoo shickyr dy row oardagh cairagh as fondagh, lurg daue jannoo brock roish nish lesh oardagh nagh ren cleayney sleih as keeayl chionnit chooie oc, as lesh shirreyderyn loayrt dy jeeragh rish olteynyn y voayrd dy hirrey orroo dy reih ad son y startey, chammah's doilleeidyn lesh matrix dy chur skansh da shirreyderyn tra va coloayrtys roo, as ny keayrtyn nagh row olteynyn kionefenish son çhaglymyn rish shirreyderyn ny dy reih fer jeu fy yerrey. Ta'n Boayrd cur leshtal da shirreyderyn 'syn oardagh ren failleil as da tackeydee keesh valjagh son ny marranyn va jeant oc 'sy chied eab.
Agh lurg oardagh speeideilagh as jeant dy kiart, ta olteynyn goltaghey Mnr Macleod da'n oik.
---oooOooo--
Ta Colught Paggad Bree Ellan Vannin gra dy vel eh gooley dy jean eh costal mysh £5 millioon son karraghey Manninagh, goaill stiagh ny taillaghyn son yn traa echey ayns purt çhirrym Cammell Laird ayns Kione y Veie.
Hie Manninagh stiagh 'sy phurt çhirrym Jerrey Souree son obbyr cadjin dy chummal seose eh, tra ren jeshaghteyryn cur enn er doilleeidyn lesh y chass imman as ny linnaghyn sthie as ny ymmyrkaneyn oc. Va feme er cur ny oltyn shen ersooyl gys colught jeshaghteyrys er-lheh ayns yn Danvarg. Ta'n Colught gra dy vel kione er ve currit er yn obbyr shen, as dy jig ad back gys Cammell Laird dy leah dy ve currit back 'sy lhong.
Ta'n Colught gra dy bee ny costyssyn son ooilley yn obbyr eeckit ass tashtaghyn freillt y Cholught, agh dy jean eh shirrey dy chosney er-ash costyssyn trooid urryssaght as trooid barrant er oltyn liorish ny jeantee.
