Meeryn ass Traa dy Liooar, Jelune 5oo Mee Luanistyn 2024
Ta'n Shirveishagh Slaynt as Kiarail y Theay, Lawrie Hooper, gra dy vel yn Rheynn jeeaghyn er jannoo ny sloo yn rolley echey jeh oyryn son ve seyr veih eeck son oardrailyn lhee, as t'eh gra dy vel y coarys t'ayn nish jannoo seyr ad son shiartanse dy staydyn lhee agh nagh vel eh son sorchyn elley dy staydyn lhee. T'eh gra dy vel shen jannoo seose neu-chormid as neu-chairys.
Haink y fys shoh myr ayrn jeh freggyrt da feysht Tinvaal scruit ec Oltey yn Chiare as Feed son Doolish Hwoaie, John Wannenburgh. Vrie Mnr Wannenburgh cre vees yn smooinaghtyn t'er ve ayn mychione cur oardrailyn lhee nastee da surransee y changhyr.
Myr freggyrt ta Mnr Hooper gra dy vel yn Ellan fakin bishaghey vees goll er as nagh vel ry chummal seose ayns costys ny druggaghyn currit magh 'syn Ellan, as ec y traa t'ayn ta ny sloo na 5% jeh'n chooid ayns oardrailyn lhee as feme er sleih eeck er-nyn-son. T'eh gra dy vel yn argid vees ry gheddyn veih shen cur stiagh ny sloo na £1 villioon punt jeh'n chostys ooilley cooidjagh 'sy vlein son druggaghyn vees £18 millioon.
Ta Mnr Hooper gra dy vel shiartanse dy staydyn lhee as ta sleih reihalagh dy gheddyn yn oardrail lhee oc nastee, agh dy vel shoh goaill stiagh cooid elley, nagh vel cochianglt rish y stayd beayn oc, nastee. Agh t'eh gra dy vel sleih elley, jeh'n lheid as sleih as kanghyr jannoo orroo, as feme oc er eeck son ny oardrailyn lhee oc mannagh vel ad reihalagh rere oyr elley son geddyn ad nastee.
Ta Mnr Hooper gra dy by vie lesh yn Rheynn jeeraghey er cummal seose adsyn nagh vel abyl dy eeck, shaghey jeeraghey er eash ny stayd lhee er-lheh. T'eh gra dy vel yn dean dy aa-chummey y polasee dy ve smoo ny s'cormey vees cooney dy yannoo shickyr dy vod yn Ellan freayll rish eeck y costys son druggaghyn vees bishaghey. T'eh gra, myr ayrn jeh polasee aa-chummit, dy beagh peiagh erbee ta geeck son oardrailyn lhee cur cagliagh er y chostys 'sy vlein lesh teisht eeckys rolaue.
Ta Mnr Hooper gra dy vel eh fo'n Rheynn cur er bun caa da sleih dy skeaylley magh y costys son teisht eeckys rolaue car ny bleeaney. Ta teisht eeckys rolaue ec y traa t'ayn costal £54 rish 12 vee, ny £19 rish kiare meeaghyn, as foddee cummaltagh erbee ny shinney ny 16 blein (ny 19 my vees ad nyn studeyryn lane-hraa) cur stiagh yeearree son teisht eeckys rolaue. T'eh gra dy vel yn Rheynn greinnaghey peiagh erbee ta geeck son oardrailyn lhee reiltagh dy gheddyn magh vel ad freggyrtagh da ny criteria son ve seyrit, ny dy chionnaghey treisht eeckys rolaue dy yannoo ny sloo builley y chostys.
Ny s'moghey 'sy vlein shoh ren yn Rheynn caghlaa y policy echey bentyn da cooid vees ry gheddyn harrish y voayrd coontee, as magh ass shen cha nel lheeghyn as boandyryn nish cur oardrailyn lhee my vees stoo lheiys ry gheddyn dy chionnaghey.
---oooOooo---
Ta kied phlannal goll er shirrey son lheelann feeacklagh ayns Straid y Traie ayns Doolish. Veagh kiare shamyr lhee ayn, veagh troggeyder lesh entreilys son caairyn queeylagh, premmeeyn, as shamyr son olteynyn y wirran dy gheddyn rey rish sollaghar. Ta'n yeearree cheet neesht er cur stiagh ayn pumpyn chiass ass yn aer as panelyn greiney, as t'eh gra dy beagh entreilys gys y hroggal jeant ny share lesh cooylley skirrey automatagh, dy beagh cassanyn as dorryssyn jeant ny s'lhea, as dy beagh premmee son anlheiltee er laare ny thallooin.
---oooOooo---
Ta Kiarail Vannin gra nagh vel peiagh erbee er choayl startey 'sy chirveish audioaylleeagh ayns Thie Lheiys Cheerey Ard Rhumsaa. Va sheiltynys er y chooish lurg reaghys dy beagh arryltagh gobbraghey 'sy lheelann. Ta Kiarail Vannin gra dy by vie lesh aa-hickyraghey y theay dy jean y lheelann clashtynys tannaghtyn ayn as goll er 'syn aght cadjin, lesh ablid dy yannoo karraghey neu-chramp my vees feme er shen.
Va aa-scrutaght jeh'n chirveish as haink shen magh dy row eh sauchey son shirveish dy gholl er cooilleeney liorish arryltee traenit gyn feme er audioaylleeaght. Ta Kiarail Vannin gra dy row yn audioaylleeaght v'ayn ayns shen rere conaant as kied da dagh parteeays faagail, traa erbee, liorish cur fys shiaghtin roish shen, as haink eh magh dy row shen myr v'eh.
Rish yn daa vlein t'er n'gholl shaghey ta audiogrammyn er ve jeant ayns Thie Lheiys Noble er yn oyr nagh vel, ta Kiarail Vannin dy ghra, 'chymmltaght cooie' er-nyn-son ayns Thie Lheiys Cheerey Ard Rhumsaa. Haink shoh tra va briwnys jeant nagh vod jannoo prowalys as cur stiagh clashtaganyn goll er jannoo ayns coardail rish linnaghyn stiuree Sheshaght Ghoaldagh yn Audioaylleeaght.
Ta ymmyrkey ry gheddyn ec surransee t'ayns feme jeh cooney cosney gys Thie Lheiys Noble, as foddee reaghys ve jeant son keayrt da'n thie er-nyn-son nagh vod faagail y thie oc.
---oooOooo---
Ta'n sheshaght cheirdey Prospect cur eam reesht son bishaghey smoo ayns faill son sharvaantyn y theay as sharvaantyn y stait, chammah's son failleydee Kiarail Vannin. Shoh lurg briwnys Reiltys y Reeriaght Unnaneysit dy hoiaghey jeh moyllaghyn veih sheshaghtyn neu-chrogheydagh er faill son bishaghey er mean jeh 5.5%. Roish nish ren Mnr Hooper cur raaue dy voddagh bishaghyn jeh'n sorch cheddin cur Ellan Vannin ayns stayd doillee.
Agh cha nel oaseir barganey Prospect, Mick Hewer, ayns coardail rish shen. T'eh gra ayns Ellan Vannin ec y traa t'ayn dy vel ny chebbyn ec 2.5% son obbreeyn chiarail slaynt as ec 3.25%, tuittym gys 2% ayns blein 3 jeh cheb three blein veih Commishoon ny Shirveishyn Theayagh.
Ta Mnr Hewer er n'ghra roish nish dy vel ec y traa t'ayn doilleeid lesh cleayney sleih gys yn Ellan dy yannoo ny startaghyn shoh as cummal ad ayns shoh, as er-lesh Mnr Hewer ayns rieughid dy lhisagh y varney eddyr faill 'sy Reeriaght Unnaneysit as 'syn Ellan ve ny s'lhea, as feme er faill ve foddey ny syrjey ayns yn Ellan, dy ghoaill tastey jeh'n chostys beaghee syrjey ta ry akin. T'eh gra, ec y traa t'ayn, dy vel ny neu-chaslyssyn cribbey, as er-lesh dy vel shen cur gys y doilleeid ayns cooishyn bentyn da cur faill as cummal sleih vees ry akin trooid yn Ellan, myr shoh er-lesh dy vel feme er cur back ayn ny neu-chaslyssyn, as magh ass shen yn eam oc son bishaghey faill ec y chooid sloo yn red cheddin as 'sy Reeriaght Unnaneysit, as ny share dy beagh ad ny syrjey.
Choud's ta'n Tashtey gra nagh vel argid dy liooar dy eeck son bishaghey, ta Mnr Hewer gra dy row shen rieau y skeeal va goll er insh ec yn Tashtey, as er-lesh dy vel feme er yn Tashtey cummal aa-scrutaght dy chooilley haase keesh, ny coaryssyn t'ayn 'syn Ellan, as caglieeyn er yn urryssaght ashoonagh, dy chur keesh smoo orroosyn ta cosney argid syrjey. T'eh gra nagh vel eh loayrt mychione veg agh barney jeh cubbyl dy housaneyn dy phuint, agh dy vel eh loayrt my-nyn-gione shen as ta barney vooar as ta cosney thousaneyn as thousaneyn dy phuint, as t'eh gra reesht dy vel feme er aa-scrutaght jeh'n choarys keesh.
Ta'n Shirveishagh Slaynt as Kiarail y Theay, Mnr Hooper, er n'ghra, lesh ny sheshaghtyn keirdey ayns shoh 'syn Ellan fakin bishaghey ayns faill 'sy Reeriaght Unnaneysit as shirrey y bishaghey cheddin ayns shoh, dy vel ad jarrood dy vel ad jannoo seose daa lught-reill er-lheh. Agh er-lesh Mnr Hewer dy lhisagh Mnr Hooper ve jeeraghey er y voayl veih nee failleydee noa cheet, cheet stiagh 'syn Ellan, dy chummal seose ny shirveishyn slaynt, ny meoiryn shee, ny pryssoonyn, yn ynsagh. T'eh gra, mannagh vel y faill cleayney ad foddey ny smoo 'syn Ellan, as cur geill da ny bishaghyn mooarey ayns costyssyn as er-lheh bentyn da thieyn as costyssyn ayns eeck mayll, cre veih vel eh smooinaghtyn dy jean sleih cheet gys yn Ellan, dy obbraghey ayns rieughid ayns ny ardyn lane-scanshoil dy obbyr.
Ta Mnr Hewer cur eam er olteynyn Tinvaal dy heet back 'sy tourey dy resooney magh chebbyn er faill treealit ec yn Chommishoon son Shirveishyn Theayagh. T'eh gra, cosoyley rish ny vees taghyrt 'sy Reeriaght Unnaneysit, dy vel ny chebbyn 'syn Ellan ayns rieughid giarrey faill ny obbreeyn, er coontey bolgey argidoil as bishaghey ayns keesh.
---oooOooo---
Ta fir lhee chadjin ayns Sostyn er cheau teiy ayns foayr jeh cheet cooidjagh ayns immeeaght jeadyssagh bentyn da conaantyn noa, lesh cagliagh er yn earroo dy hurransee t'ad fakin 'sy laa. Agh ta Kiarail Vannin gra nagh vel shen yn aght 'syn Ellan, ny yeih dy vel eh gra dy vel barganaghyn foast goll er lesh Sheshaght Lhee Ellan Vannin mychione bishaghey ayns conaantyn ny fir lhee chadjin. Agh ta Kiarail Vannin gra dy vel y cheb ec y traa t'ayn foddey ny smoo na shen vees goll er chebbal liorish Shirveish Claynt Ashoonagh Hostyn ec y traa t'ayn.
---oooOooo---
Ta Caairlagh y Board son Thieys as ny Co-voodeeyssyn, David Ashford, gra dy vel ymmyrkey y Reiltys bentyn da cur aaght fud ny hoie myr cooish egin cochianglt rish eh ve ry chummal seose 'sy traa sodjey. Ren olteynyn Tinvaal coardail rish Strateish son Sleih gyn Thie Mee ny Nollick shoh chaie, as v'eh reaghit dy beagh saase jeant ec Kiarail Vannin liorish jerrey Jerrey Souree dy beagh boayl ayn veagh caa da peiagh erbee tannaghtyn gyn aaght. Haink shoh lurg da'n cheshaght ghiastyllagh dooney y fastee oie ec er yn Raad Lhean ayns Doolish.
Ta Mnr Ashford gra dy vel yn cassan son cur aaght myr cooish egin ayn nish, as dy vel earroo chellvane nastee foddee sleih cur eam er my vees ad gyn thie ny my vees imnea oc mychione sleih ayns gaue jeh ve gyn thie, as dy vel shen yn earroo son claare chaghlaaee yn Thie Lheiys Noble, vees 650000, as dy vel shen eisht cochiangley ad rish fo-rheynn shickyrys y theay as rish y wirran nee ayns rieughid feddyn aaght er egin er-nyn-son.
Ta Mnr Ashford gra dy by vie lesh jannoo ymmyd jeh'n chaa dy chur booise neesht da ooilley ny sheshaghtyn 'sy trass cherroo t'er ve gobbraghey marish y Voayrd dy chur yn cassan shoh er bun : Cooishyn Thieyn; Armee yn Taualtys; jus dy heet er cubbyl jeu, as ayns rieughid t'er nobbraghey dy creoi erskyn cadjinys dy yannoo shickyr dy vel paart dy chummal seose ayn.
Ta Mnr Ashford gra dy vel y doilleeid lesh fastee dy vel eh cur eab er ve freggyrtagh da dy chooilley pheiagh, as nagh vel shen yn aght, as dy vel feme er cur enn er dy vel sleih mooie ayns shen ayns gaue jeh ve gyn thie ayns staydyn feer eer neu-chosoyley rish y cheilley. T'eh gra dy vel sleih as dy chooilley red jannoo orroo veih doilleeidyn lesh ve currit da red ennagh, gys lughtyn-thie ta mooie er y straid, as shen ny vel oo geearree, shen cur 'syn un thie mestey dy leih ooilley cooidjagh. T'eh gra dy vel kuse dy ir er-lheh dy mooar ayns gaue mooie ayns shen, agh dy vel eh scanshoil dy vel ad jeeraghey er ny fir er-lheh as ny femeyn oc, myr shoh dy vel shen yn oyr dy vel ad er stiurey ersooyl lesh y strateish shoh er ve gyn thie hie roish Tinvaal nurree, veih goll son un fastee shickyr, as jeeaghyn er geddyn aaght vees kiart son fir er-lheh.
Ta Mnr Ashford gra, bentyn da Kiarail Vannin, she red cochianglt rish kiarail y theay, as dy vel eh ayns rieughid leeideil bentyn da. T'eh gra dy vel Kiarail Vannin y boayl kiart dy yanno shen er y fa foddee ad sessal feme tappee dy liooar, agh myr v'eh gra, dy vel eh goaill stiagh ymmodee shirveishyn, myr shoh, ny yeih veih cheu yn ymmydeyr, as eh currit da'n chassan, foddee dy jean eh jeeaghyn dy ve yn un red, agh dy vel ymmodee sheshaghtyn 'sy chooylrey goaill ayrn ayns jannoo shickyr dy vel shin geddyn yn aaght kiart son y pheiagh shen.
Ta Mnr Ashford gra, ny vees scanshoil neesht, as vees yn clane oyr son ny cassanyn shoh, shen dy yannoo shickyr nagh vel eh ynrican reaghys shallidagh t'ayn, dy yannoo shickyr dy vod sleih eisht jeeaghyn er geddyn ayns rieughid shen currit ayn vees femoil dy chooney lesh sleih geddyn aaght smoo shickyr. T'eh gra dy vel fys ain veih lughtyn-reill elley, ny ny vel sleih geearree jannoo, shen geddyn boayl ennagh son y pheiagh shen rish yn oie shen ny rish y chiaghtin shen, as eisht, lurg da shen cheet gy kione, dy vel ad back 'syn un stayd as t'ad cheet dy ve goit 'sy chymshal cheddin gyn scuirr. T'eh gra dy vel ad jeeaghyn er ny cassanyn oc ayns aght rish foddey ny sodjey, bentyn da ayns rieughid geddyn cormid son sleih dy beayn.
Ta Mnr Ashford gra dy row yn cassan currit stiagh ayn mysh jerrey ny bleeaney nurree, agh dy row eh caghlaait beggan neayr's shen. T'eh gra dy row ad gynsaghey choud's v'ad goll rhymboo, as dy vel reddyn vees gobbraghey as reddyn nagh vel, as ta barelyn cheet back veih, as lesh sheshaghtyn yn trass cherroo goaill ayrn, myr dimraa eh ny s'moghey, er ve lane-scanshoil dy bollagh ayns gimman er y hoshiaght ayns rieaughid ny caghlaaghyn. T'eh gra dy vel eh shickyr dy liooar dy bee y cassan caghlaait beggan reesht 'sy traa ry heet, er yn oyr dy vel ad gynsaghey dagh keayrt ta peiagh cheet roish. T'eh gra dy vel ad soie eh er cooishyn rieugh mooie ayns shen, as yn cooney foddee ad cur daue.
Er-lesh Mnr Ashford dy vel mysh 30 dy leih as v'ad er nyn gur-rish trooid y chassan as dy nee saase dy reayll bio ad v'eh, agh dy jean yn aggyrt caghlaa ayns traa, myr shoh dy bee mulleeyn as sloghyn ayns aggyrt, choud's ta shin goll roin. Bentyn da ny t'eh er jeet er myr nish myr stay follit dy leih gyn thie, as cadley er aashagyn sleih elley, t'eh gra dy vel feme er sleih ve oney roosyn hene, as er-lesh nagh jean mayd arragh geddyn rey rish shen dy bollagh. T'eh gra dy vel ad jeeaghyn er y nhee nagh vel shinyn, myr Ellan, dy cadjin fakin sleih mooie er ny straiddyn, as dy vel beoyn er dy ve smoo follit.
Ta Mnr Ashford gra dy row yn chaghteraght v'eh rieau er chur magh, nagh vel shen dy ghra nagh lhisagh shin soaighey jeh dy vel doilleeid ain bentyn da sleih gyn thie, vees nagh vel aaght shickyr ec sleih, as dy vel shoh ny ta ooilley ta'd dy yannoo cur eab er cur-rish. T'eh gra dy vel ad cur eab, cha nee ynrican dy chur daue yn shickyrys shen 'sy traa giare, agh yn shickyrys 'sy traa sodjey.
---oooOooo---
Ta'n Rheynn Bun-Troggalys gra dy vel eh foast freayll rish sessal yeearree y cholught ta gearree ronsaghey son gass, Crogga Cagleeit, dy chaghlaa ronnaghyn y chied echey liorish jannoo ny s'moghey tarrarey chibbyr phrowallagh. Ta paart giare dy hraa elley er ve currit da'n cholught dy chur fys bentyn da'n yeearree echey son caghlaa. Ta'n dean jeh sheeyney maghy traa liorish three meeaghyn dy chur traa son sur-smooinaghtyn dy slane er caghlaa da'n chied. Ayns soie Tinvaal Toshiaght Arree dooyrt yn Shirveishagh Bun-Troggalys, as Oltey yn Chiare as Feed son Glionfaba as Purt ny Hinshey, Tim Crookall, dy beagh briwnys jeant er yeearree Crogga dy chaghlaa y chied echey liorish jerrey Mean Souree ec y date s'jerree, as er y gherrid dooyrt eh dy row eh jerkal rish briwnys liorish jerrey Jerrey Souree.
Ta'n chied ec y traa t'ayn cur er y cholught goaill ayns laue claare obbree myr ayrn jeh Keim B, vees goaill stiagh creear seismagh 3-towshanagh roish my vees eh goll er y hoshiaght gys tarrarey prowallagh ayns Keim C. Yinnagh y yeearree son caghlaa cur kied da'n cholught dy harrarey lurg creear 2-towshanagh.
Ta chibbyr phrowallagh jeant dy hessal y scailley as ablid tarmaynagh jeh poagaghyn gass.
Ta'n Shirveishagh Cooishyn Sthie, Jane Poole-Wilson, gra dy vel obbyr fo raad dy lhiassaghey ny smoo yn aght ta'n Ellan plannal dy chur-rish cooishyn egin. Va resooney magh er y chooish shoh ayns soie s'jerree Tinvaal roish y varney son y tourey, tra va ny politickeyryn loayrt mychione aa-scrutaght Kate Brunner, Leighder yn Ree, er yn aght ghow y Reiltys ayns laue cur-rish y pandemagh Covid-19 as ny coyrlaghyn 'sy tuarastyl eck.
Ta Bnr Poole-Wilson gra dy vel ymmodee aghtyn ayndaue oddys stayd egin cheet dy ve ayn. T'ee sheiltyn dy vel yn aght ain dy son cooishyn egin gobbraghey feer vie er bastal bentyn da reddyn oddagh sleih gra roo cooishyn egin cochianglt rish 'soilshey gorrym', ta ny smoo, myr dy beagh eh, laa er laa, as foddee dy jean mayd fakin ad shen, agh mennick dy liooar dy vel beoyn ocsyn ve ny sorchyn s'girrey dy chooishyn egin. Er-lhee dy vel yn imnea s'lhea bentyn da traaghyn as foddee dy jean mayd fakin cooish egin vees tannaghtyn ayn, as foddee dy bee dy chooilley horch dy eiyrtyssyn cummyssagh son Ellan Vannin.
Er-lesh Bnr Poole-Wilson dy vel shen yn oyr dy row kuse dy voyllaghyn ayn mychione jannoo ny share yn ablid ain ayns saaseyn plannal son cooishyn egin. T'ee gra dy row ee jeant booiagh dy row sleih goaill ayrn ayns aght jarrooagh 'sy resooney magh Jerrey Souree er shoh, agh dy row olteynyn ayns Tinvaal cur enn er, er-lhee, dy vel obbyr er ve, ayns rieughid, fo raad dy lhiassaghey ny saaseyn ain son plannal son cooishyn egin, agh dy vel feme er tooilley obbyr.
Ta Bnr Poole-Wilson gra, ayns rieughid, ayns freggyrt y Reiltys, dy ren eh soilshaghey magh nish harrish yn daa vlein shoh cheet, paart dy obbyr caghlaaee dy yannoo ny sassey yn ablid ain dy phlannal ny share as dy vel plannyn ain, as dy yannoo roortys jeh ny plannyn shen, dy smooinaghtyn trooid caghlaaghyn stayd egin oddys cheet er yn Ellan. T'ee gra, myr shoh, dy jean yn obbyr shen, obbyr caghlaaee bunnys, goll er y hoshiaght nish harrish yn daa vlein shoh cheet, as dy vel ee treishteil dy jean shen cur shin ayns stayd foddey ny shickyr son yn reayn dy chooishyn egin cummyssagh.
---oooOooo---
Ta Bnr Poole-Wilson gra nagh vel y chlaare argidoil son Ynnyd son Cur Dreihyn jeh Soaigh-er Keintyssagh er chaghlaa neayr's v'ee coardit ec Tinvaal ny s'moghey 'sy vlein shoh. Va imnea ec Oltey yn Chiare as Feed son Connaghyn, Julie Edge, ayns soie Tinvaal Jerrey Souree.
Ta Bnr Edge gra dy dooyrt yn Shirveishagh y 3 Mee Vayrt 2022 dy beagh yn ynnyd troggit son £800,000, lesh £314,000 elley currit ry lhiattee ec y toshiaght son shirveishyn fillit mygeayrt shoh, as v'ee briaght er Bnr Poole-Wilson dy hoilshaghey magh y bishaghey mooar jeh £3.38 millioon. As t'ee gra dy row ny shirveishyn fillit mygeayrt ayns 2002 £314,000, agh nagh row ee er chur harrish £311,000, 24-25, gys Kiarail Vannin, as dy nee baghtal eh dy vel red ennagh aggair.
Ta Bnr Edge gra nagh row eh agh ayns Toshiaght Arree 2024 dooyrt Ard Sheckter yn Rheynn dy beagh ee ny shirveish share jeh'n lheid v'ayn, as dy beagh troggal eh jerkit dy chostal £830,000, as dy row shen Toshiaght Arree 2024, as t'ee gra dy row ad ayns shen Jerrey Souree as dy row olteynyn goll er insh dy row eh £3.38 millioon, lesh ooilley ny costyssyn elley. T'ee briaght cre er nagh row fys ec yn Rheynn Toshiaght Arree tra v'ad roish Bing Tinvaal, cre er nagh row fys oc y traa shen as ta fys oc er nish?
Ta Bnr Poole-Wilson gra dy vel troggal yn Ynnyn noa son Cur Dreihyn jeh Soaigh-er Keintyssagh red jarrooagh goll er y hoshiaght, myr shoh dy row ee goltaghey y feysht er yn oyr dy dug eh jee caa, cha nee ynrican dy chur cooinaghtane da olteynyn Tinvaal, agh da'n theay s'lhea, mychione oyr y teyraad noa shoh, as yn scansh jeh, cho leah's t'eh troggit, dy jean eh cur buill chooie dy chur, cha nee ynrican cooney quaiylagh as clinicoil dauesyn t'er hurranse liorish raghlid keintyssagh, agh neesht cowraghey magh shirveishyn coonee elley, chammah's shamyryn coloayrtyssagh vees goll er leeideil ec ny meoiryn shee. T'ee gra, myr shoh, dy nee skeeal feer jarrooagh ee.
Ta Bnr Poole-Wilson gra dy vel eh lowal jee, er-lhee, neesht dy chur sleih er cooinaghtyn dy vel yn shirveish shoh ayn hannah, myr shoh choud's ta troggal y seyraad noa fo raad, ta'n shirveish vees goll er leeideil ec fir chlinicoil son sleih t'er hurranse liorish raghlid keintyssagh fo raad feer vooar, as dy vel ee fakin, s'treih myr t'eh, sleih ta dreihyn ayns Ellan Vannin.
Ta Bnr Poole-Wilson gra dy row y feysht va currit ayns rieughid mychione y chostys bun-argidoil jeh troggal yn Ynnyd son Cur Dreihyn jeh Soaigh-er Keintyssagh, myr shoh dy dooyrt ish dy vel y costys bun-argidoil £3.383 millioon, as va'n feysht currit urree, as va'n feysht currit urree dy row shen dy bollagh anchasley veih earroo va currit myr feanish roish Bing Tinvaal, Toshiaght Arree 2024.
Ta Bnr Poole-Wilson gra, ec y traa shen, nagh dod ee aa-scrutaghey shen, agh lurg shen dy ren ee aa-scrutaghey eh, as ayns rieughid va'n sym bun-argidoil jeh £3.383 millioon coardit y chied cheayrt liorish Tinvaal, Toshiaght Arree 2023, myr ayrn jeh'n chlaare argidoil 23-24, as va clouit reesht 'sy Lioar Jiarg-bane son y chlaare argidoil 24-25. T'ee gra dy vel ee er screeu rish olteyn Tinvaal dy yannoo cleeir shen, er yn oyr dy vel ee smooinaghtyn dy nee scanshoil eh dy vel ny reddyn shoh jeant cleeir, as ren eh goaill urree dy yannoo shen.
Ta Bnr Poole-Wilson gra, ny yeih, dy nee red ennagh feer eer scanshoil eh dy vel yn theay, my va peiagh erbee geaishtagh rish shen, toiggal dy row y sym v'ee cheet er ayns ayns soie Tinvaal Jerrey Souree, er ve coardit, Toshiaght Arree 2023. T'ee gra, myr ta'n aght dy mennick tra ta shaleeyn bun-argidoil cheet rhymboo, ny keayrtyn ayns ny vees goll er gra ny s'moghey mychione oardagh y chlaare argidoil, dy jean sleih fakin gloutyn dy argid cheet trooid as cur stiagh gys yn sym ooilley cooidjagh.
Ta Bnr Poole-Wilson gra dy row ee geearree ve baghtal dy bollagh, cha nee ynrican rish ny cumraagyn eck ayns Tinvaal, agh er-lhee dy vel eh cooney dy hoilshaghey magh shoh ayns aigney y theay, dy row y sym 'sy chlaare argidoil ec y traa t'ayn coardit ec Tinvaal, Toshiaght Arree 2023. T'ee gra, er-lhee dy vel cooish elley ee, dy vel eh fer jeh ny reddyn feer doillee er-nyn-son ooilley jeu ayns Tinvaal, er yn oyr dy vel kied, er-lhee, feer vooar as ablid oc dy loayrt 'syn ard-whaiyl, agh dy vel eh cooney dy kinjagh, as t'ee sheiltyn dy vel eh red ennagh shegin dooin ooilley cur geill da, dy kinjagh dy chur eab er goll back gys y farrane, vel shen yn Lioar Jiarg-bane, y chlaare argidoil, ny ta Hansard oc, as ta'n seyraad Eaisht Reesht oc dy chur eab er jannoo shickyr dy vel farrane yn yss ain cho kiart as vees possible.
---oooOooo---
Ta cuirrey er sleih cur stiagh nyn marel er treealtyssyn dy yannoo ny sloo oikagh y coarys plannal as jannoo ny sassey eh son sleih dy yannoo ymmyd jeh. Ta co-choyrle theayagh er ve lhunnit rish 12 hiaghtin dy yeeaghyn er aghtyn dy yannoo ny share yn cassan son shellooderyn thieyn as troggalyn as dy yannoo ny stroshey aghtyn dy choadey y chymmyltaght troggit. Ta'n co-choyrle goaill stiagh 'oardyr cur y bun er lhiassaghey', vees cheet er ny saaseyn smoo cadjin son shareaghey thieyn as vel feme er shirrey kied er-nyn-son ny dyn.
Rere yn Shirveishagh Chymmyltaght, Bee as Eirinys, as Oltey yn Chiare as Feed son Doolish Hiar, Clare Barber, yinnagh ny caghlaaghyn jannoo shickyr dy vel cassanyn cleeir, dy vel entreilys daue as dy vel ad fondagh ayns croo buill as t'ad cleayney sleih dy chummal ayndaue, vees coadey y chymmyltaght as cur caa son aghtyn dy vishaghey y tarmaynys vees ry chummal seose. T'ee gra dy vel palchey goll er bentyn da plannal ec y traa t'ayn, as dy beagh yn eiyrtys jeh ny t'ee cheet er myr 'caghlaaghyn jarrooagh' dy vel sleih abyl dy ghoaill ayns laue treealtyssyn neu-chramp gyn feme er yeearree plannal, as dy jinnagh shen spaarail traa as argid.
Hig kione er y cho-choyrle Jecrean yn 23 Jerrey Fouyir.
---oooOooo---
Ta'n Rheynn Chymmyltaght, Bee as Eirinys er choardail rish daa yeearree va currit stiagh da liorish colughtyn va shirrey cur vannyn stiagh ayns three garaghyn biljagh, Chibbanagh, Archallaghan as Conrhenny, dy chreck bee as jough. Bee conaant oc rish blein, agh cha nel fys er ve currit mychione yn date nee ad goaill toshiaght.
Rere yn soilsheen va cur cuirrey er yeearreeyn, va'n Rheynn shirrey colughtyn dy obbraghey van bee ayns boayl aalin ayns Chibbanagh, Archallaghan ny Conrhenny, as v'ad laccal treealtyssyn va goaill stiagh feeaghan son kied; plan dellal; kaart bee; coardail dy row y colught currit da saaseyn ta ry chummal seose; as photograph jeh'n van bee hene.
Va'n soilsheen gra dy beagh adsyn as va speeideilagh ayns geddyn kied feme cummal seose glennid as jeshid yn ard currit daue as ve lane-viallagh da ronnaghyn y chonaant.
Agh ta'n Rheynn er veeraghey neesht nagh vel plannyn echey dy chur stiagh premmeeyn theayagh ayns ny garaghyn biljagh.
---oooOooo---
Ta co-hellooderyn y vagher liorish yn ynnyd reiht dy hroggal boayl mooynlee noa ayns Purt ny Hinshey er chur stiagh aghin noi'n chied phlannal va currit da'n chalee er y gherrid. Ren y ving phlannal coardail rish y chalee y vee shoh chaie, agh va aghin currit stiagh lurg imnea mychione yn oardagh plannal. Ta co-hellooderyn y vagher gra dy row ymmyd jeant jeh'n oardagh plannal neu-chiart, as dy row fys neu-chiart currt stiagh da'n ving phlannal.
Ta kied ec ny feallee shoh dy hroggal 21 thie 'sy vagher oc, as t'ad gra dy dug ad stiagh ayn ymmodee screeuyn myr freggyrt da'n yeearree plannal, agh nagh row geill currit da'n varel oc. T'ad cheet er imnea mychione geddyn coip jeh Sess y Vuilley er y Chymmyltaght, as nagh row sur-smooinaghtyn currit da ynnydyn elley, as nagh row ymmyd jeant dy kiart jeh polaseeyn strateishagh 'syn aght kiart.
Nee scruteyr plannal nish sur-smooinaghtyn er yn aghin, roish my vees y briwnys fy yerrey ny lhie er yn Shirveishagh Chymmyltaght, Bee as Eirinys.
Myr freggyrt, ta Bun-shirveishyn Vannin gra dy vel ad mollit dy vel aghin er ve currit stiagh ayn, as dy row towse mooar dy obbyr er ve jeant ayns ny jeih bleeantyn t'er n'gholl shaghey dy chur enn er aght dy eaysley y cront bentyn da Purt ny Hinshey. T'ad gra dy vel shoh goaill stiagh sessal ny shlee na 30 ynnyd, loayrt rish sleih dy ve freggyrtagh da femeyn y cho-voodeeys as cooilleeney Sess y Vuilley er y Chymmyltaght ooilley goaill as y yeearree plannal va geiyrt er shen.
Ta Bun-shirveishyn Vannin gra nagh vel ad currit veih'n chalee, as dy vel ad freayll currit da dy livrey y bun-troggalys ashoonagh lane-scanshoil shoh, as dy chur kione er ny obbraghyn cho leah's vees ry yannoo dy chur kione er cur magh gyn scuirr jeh mooynlagh aw ayns Baie Phurt ny Hinshey.
---oooOooo---
Er y gherrid va caslys cheerey feddynit myr ayrn jeh'n Vrialtys Theayagh er Plan Draghtit Ard y Hwoaie as y Heear, vees soilshaghey magh ynnyd jeh'n wooadys cheddin as Purt Aer John Lennon Leyrphoyll, ayn oddys purt aer son yn Ellan troggit 'sy traa ry heet ayns Jourby, vees goaill stiagh sheeyney magh y bollagh roie t'ayn hannah liorish 2.5 kilomeadar.
Dy beagh kied currit da'n skeim, veagh builley er balley beg cheerey Andreas as er balley Rhumsaa, as beagh builley er earroo dy hieyn as veagh thalloo eirinagh caillt neesht.
Ta cummaltee gaccan nagh row fys erbee oc mychione shoh roish nish as dy vel eh er jeet magh ynrican trooid taghyrt. Ta cummaltagh, Fern Callister, briaght, cre'n aght er chor erbee ta shoh er duittym magh ass yn ether, er-nyn-son dy gheddyn magh 'syn aght shoh, dy vel ny thieyn oc, as ayns shiartanse dy chooishyn yn aght t'ad cosney faill, er ve currit ry lhiattee dy bollagh ec y Reiltys shoh, nagh vel ad eer er loayrt rish sleih ta cochianglt rish, nagh vel ad er chur fys ayns aght erbee er lesh sleih t'eh jannoo er. T'ee gra dy vel eh lunagh dy liooar, ec y chooid sloo, as dy vel eh ass doaie erskyn credjal. T'ee gra dy vel eh soilshaghey magh nagh vel arrys ny ennaghtyn er peiagh erbee 'sy cho-voodeeys shoh.
Ta ny cummaltee gra, my vees purt aer noa dy ve troggit, dy beagh kied ec y Reiltys kionnaghey nyn dhieyn er egin, as myr shoh nagh bee ad feeu veg my vees ad geearree scughey. T'ad gaccan dy row y caslys cheerey freillt follit rish 12 vee roish my row eh currit stiagh ayns Plan Draghtit yn Ard.
Ta Oik Coonceil ny Shirveishee gra ayns fogrey va clouit yn 28 Mean Souree, choud's va'n co-choyrle goll er cummal er y Phlan Draghtit, dy ren yn Rheynn Bun-troggalys gra dy beagh tooilley fys ry heet mychione scansh magher aer Jourby, as neayr's shen dy ren Fo-rheynn ny Puirt Aer cur data mychione ny ardyn dy choadey son ymmyd 'sy traa ry heet myr purt aer. T'ad gra, ga nagh vel shoh purt aer traghtee ec y traa t'ayn, dy vel yeearree 'sy traa sodjey dy choadey eh son ymmyd 'sy traa ry heet myr purt aer ashoonagh, my vees feme er shen.
T'ad gra nagh lhisagh lhiassaghey erbee ve lowit 'syn ard shoh yinnagh cumrail dy beayn ymmyd jeh Magher Air Jourby myr purt aer ashoonagh 'sy traa ry heet, vees goaill stiagh eaghtyryn mygeayrt y mysh.
Nee Barrantee Jourby cummal chaglym theayagh er y chooish ayns Halley Skeerey Yourby Jelune shoh cheet, yn 12 Mee Luanistyn, as dy bee : Stiureyder y Phurt Aer Gary Cobb; yn Ard Shirveishagh Alfred Cannan; yn Shirveishagh Gastid Dellal Tim Johnston; as Shirveishagh Oik Coonceil ny Shirveishee Kate Lord-Brennan, ooilley kionefenish.
Ta Fer-toshee son Freayll da Treisht Bea-feie Vannin, David Bellamy, gra dy vel yn ard hannah ny Ard jeh Sym Sheansagh Er-lheh. T'eh gra, ayns y chaslys cheerey jeh ny lhiettrymissyn bentyn da oyryn bio-oaylleeagh jeh'n Phlan Draghtit, dy vel eh soilshaghey magh, lane-chiart, dy vel yn ynnyd ny ard coadit rere clattys jeh sym sheansagh er-lheh son oayllyn eco-oaylleeagh as keintyn er nyn ngeddyn ayns shen, agh ny yeih, er y chaslys cheerey son lhiettrimmysn bentyn da bun-troggalys, v'eh jeant myr ard son purt aer ashoonagh cummyssagh son Ellan Vannin, as dy dooghyssagh cha nod yn un ynnyd ve daa red anchasley.
Ta Mnr Bellamy gra dy row Treisht Bea-feie Vannin geearree cur roish y daa-cheeayllaght bentyn da shen, foddee dy jean obbraghyn cummyssagh vees ry yannoo 'sy traa ry heet 'syn ynnyd co-streeu dy jeeragh rish yn stayd rish tammylt liauyr myr thalloo freillt. T'eh gra dy vel magher aer Jourby coadit dy mooar son yn oayll echey jeh lheeanee thalloo injil, agh neesht son yn chruinnaght echey dy eeanlee troggee.
---oooOooo---
Va kied phlannal currit son shamyryn brastyl shallidagh ec Scoill Ard y Ven-rein Ealisaid ayns Purt ny Hinshey, agh va'n teiy scarrit. Hug yn Rheynn Ynsee, Spoyrt as Cultoor stiagh yn yeearree, gra dy vel reamys 'sy scoill son 898 studeyr, agh dy row eh jerkal rish ny shlee ny 900 studeyr tra ta'n vlein academoil goaill toshiaght reesht Mean Fouyir.
Myr ren ad tra hug yn Rheynn stiagh yeearree bentyn da shamyryn brastyl shallidagh ayns Scoill Ard Cashtal Rushen y vee shoh chaie, ren olteynyn briaght cre'n fa v'eh goll er cur stiagh cho faggys da'n traa veagh feme er goaill toshiaght er jannoo ymmyd jeu. Ren un oltey y ving phlannal cheet er yn traa haink y yeearree stiagh y cheayrt shoh bentyn da Scoill Ard y Nah Ven-rein Ealisaid myr scammyltagh, gra nagh row eh cairagh dy chur y ving 'syn ynnyd shen tra nagh beagh caa daue jiooldey eh er coontey yn feme v'ayn.
Ren three olteynyn ceau teiy ayns foayr as three noi y yeearree, as va coardail currit lesh teiy y Chaarliagh, Oltey yn Chiare as Feed son Connaghyn, Rob Callister.
Ta'n eear ynnyd Ardwhallin ec Injebreck, er ve jeant ass y noa dy vel ny heyraad ynsee mooie nee bishaghey foays studeyryn shinney ny scoillyn, nee goaill ayrn ayns Claare Ynsee yn Aasaagh 'syn ynnyd noa.
Ta'n Shirveishagh Ynsee, Spoyrt as Cultoor, Daphne Caine, gra dy vel plan 'sy vlein academoil shoh cheet dy bee caa ec dy chooilley studeyr ayns Blein Queig dy heet gys y voayl shoh, agh chammah's shen dy bee paart dy ynsagh lhiassee yn aasagh son foays er-lheh, son studeyryn shinney .
---oooOooo---
Bee Raad y Clieau dooint rish kuse dy ooryn dagh fastyr beg yn chiaghtin shoh, veih'n laa t'ayn jiu. Veih 6.30 er y chlag gys 10 er y chlag fastyr beg jiu, Jelune yn 5 Mee Luanistyn, as dagh fastyr beg gys Jeheiney yn 9 Mee Luanistyn, bee Raad y Clieau dooint eddyr Pairk Barrool ayns Rhumsaa as Fo-raad Creg ny Baa choud's ta'n Rheynn Bun-troggalys goaill ayns laue obbyr dy chummal seose y raad mooar.
Nee shoh taghyrt dagh fastyr beg, mannagh vel drogh earish ayn. Ta traa taghyrtagh er ve reaghit neesht veih'n 12 gys yn 16 Mee Luanistyn, my vees drogh earish cur er yn Rheynn cur shaghey yn obbyr.
Ta'n Rheynn gra dy bee foast entreilys gys yn ard pairkal ec y Vungalow and Cafe y Varriaght via Tholt-y-Will.
Ta'n Reiltys gra dy vel eh shirrey leeideilagh lesh keeayl chionnit as ashlish as schleiyn strateishagh ayns cooishyn ny kionneyderyn, dy ghobbraghey da'n Oik Dellal Cairagh ayns ynnyd jeh John Peet, as oik echey ayns Thie Slieau Whallian ayns Balley Keeill Eoin.
Foddee y shirreyder speeideilagh cosney eddyr £68,000 as £80,000 'sy vlein, as my vees peiagh ennagh cheet veih cheumooie jeh'n Ellan ta toyrtys jeh £10,000 dy chooney lesh shen, as ta caa dy ghoaill paart jeh'n aill rolaue, gyn use.
She boayrd slattyssagh Tinvaal ta'n Oik Dellal Cairagh as t'eh cur shirveishyn bentyn da'n clattys, shirveishyn coyrlee, as shirveishyn dy yannoo shickyr dy vel delleyderyn biallagh da'n clattys, dy choadey kionneyderyn as colughtyn veih aghtyn traghtee neu-chairagh.
Ta'n date s'jerree dy chur stiagh yeearree yn 25 Mee Luanistyn.
