Traa dy Liooar 26oo Jerrey Fouyir 2026

Meeryn ass Traa dy Liooar, Jelune 26oo Jerrey Fouyir 2026

Jemayrt yn 20 Jerrey Fouyir, haink yn chied soie Tinvaal neayr's y reihys mooar cadjin da'n Chiare as Feed, ren cur-lesh 15 oltey noa da'n whaiyl. 

Hoshiaght ren yn Eaghtyrane Tinvaal noa-reiht, Juan Watterson, gra fockleyn ayns cooinaghtyn jeh John Wannenburgh, hooar baase dy doaltattym roish y reihys mooar cadjin, tra v'eh ny hirreyder reesht ayns Doolish Hwoaie. Ren Mnr Watterson loayrt neesht ayns cooinaghtyn George Waft, va Oltey yn Chiare as Feed son Connaghyn veih 1991 gys 1994, as eisht va Oltey y Choonceil Slattyssagh veih 1994 gys 2010.   

Eisht ren Mnr Watterson fogrey magh dy row Kied Reeoil er ve currit da nuy meeryn dy clattys, as ny mast'oc Slattys Geddyn Baase lesh Cooney. Bee tooilley veih'n soie Tinvaal ny s'anmee.

---oooOooo---

Va Slattys Geddyn Baase lesh Cooney currit roish myr Oltey Billey Preevaadjagh ec eear Oltey yn Chiare as Feed son Rhumsaa, yn Fer-lhee Alex Allinson. Va cumrail liauyr er geddyn Kied Reeoil da'n clattys shoh, 

Ta'n Fer-lhee Allinson gra dy row relief mooar echey ny smoo na veg elley, er yn oyr dy row eh ny oardagh feer liauyr, dy row eh goll er rish mysh yn daa jeih-bleeaney shoh chaie, dy row sleih 'sy cho-voodeeys ain shirrey geddyn baase lesh cooney, shirrey y reih shen as y çhymmey son kiarail ec jerrey y vea, as dy row eshyn feer aighoil dy ve abyl myr oltey Tinvaal dy chur-lesh shoh er oai 'sy lught-reill shoh chaie, myr shoh dy vel relief mooar echey dy vel shin er jeet gys yn ynnyd, as she'n leigh t'ayn, agh dy vel feme nish er mooarane jeh'n obbyr doillee goaill toshiaght bentyn da jeeaghyn er y chreatlagh t'er ve currit er bun, as er yn aght fod mayd cur shirveish hauçhey, fondagh, freggyrtagh son y traa ry heet.

Ta'n Fer-lhee Allinson gra, tra ta sleih jeeaghyn er lughtyn-reill elley t'er chur-lesh shoh stiagh ayn, er mean dy vel eh goaill red ennagh mysh 18 meeaghyn gys daa vlein dy yannoo ayns rieughid mooarane jeh'n obbyr bunnidagh, y traenal, yn ynsagh, ny linnaghyn stiuree vees femoil, myr shoh nagh vel shoh red ennagh t'er ve jeant ayns driss, nagh vel eh red ennagh lhisagh y ve jeant ayns driss, agh dy vel eh goaill cree veih fys ve echey dy vel y Rheynn Slaynt as Kiarail y Theay jeeaghyn er shoh nish, dy vel eh cur paart dy chouyryn ry hoi goll gys y nah cheim dy chur shoh ayns rieughid da sleih 'syn Ellan.

Ga nagh vel yn Fer-lhee Allinson ny Oltey Tinvaal nish, t'eh gra dy vel eh agh maynrey dy chooney ayns aght erbee oddys eh, bentyn da'n obbyr bunnidagh as feme er ve jeant. T'eh gra dy vel eh neesht – as she fer jeh ny oyryn hie eh back myr fer-lhee cadjin, dy beagh eh neesht feer jeean dy chooilleeney paart ayns shirveish 'sy traa ry heet tra vees shen çheet dy ve ayn, as dy ynsaghey veih lughtyn-reill elley, dy eaishtagh rish surransee as dy eaishtagh rish ny lughtyn-thie oc, as dy jarroo dy chur daue y chiarail as y çhymmey t'ad feme.   

Lesh fir-lhee elley 'syn Ellan gra nagh vel ad geearree çheet dy ve cochianglt rish lheid y hirveish, ta'n Fer-lhee Allinson gra dy vel shen yn oyr dy vel y clattys ain feer neu-chasley rish slattys elley mygeayrt y theihll. T'eh gra dy ren ad obbraghey feer çhionn rish yn Sheshaght Lhee Ghoaldagh, as dy vel ny t'ad er n'yannoo, shen dy chur shirveish aynjee dy reih dy ghoaill ayrn son fir-lhee as son boandyryn as son potacareeyn, liorish ny ronnaghyn bentyn da shassoo noi rere cooinsheanse, dy vel eh ynrican yn sleih shen ta geearree goaill ayrn 'sy çhirveish shoh vees goll er shirrey er dy ve paart jeh'n shirveish shoh.

Ta Eaghhtyrane Sheshaght Lhee Ellan Vannin, t'er jeet gys jerrey y traa echey 'syn oie shen nish, yn Fer-lhee Martin Rankin, gra dy vel feme foast er y theay geddyn fys baghtal er yn aght veagh geddyn baase lesh cooney goll er livrey. Ta creear jeh olteynyn y heshaght soilshaghey magh dy vel 74% jeu noi geddyn baase lesh cooney. 

Ta'n Sheshaght gra dy vel ny imneaghyn mastey olteynyn bentyn da kiare ardyn smoo:

• imnea mychione ymmyrkey co-eignagh er sleih t'ayns gaue 'sy cho-voodeeys, jeh'n lheid as shanstyryn, fir er-lheh anlheiltagh as er-nyn-son as drogh-staydyn inçhynagh jannoo orroo;
• imnea mychione ny reillyn bentyn da'n shirveish, goaill stiagh ny druggaghyn jeu veagh ymmyd jeant, as ny aghtyn coadee veagh ayn son fir-lhee;
• imnea dy vod shirveish son geddyn baase lesh cooney jannoo neu-hickyr shirveishyn lane femoil 'syn Ellan son slaynt as kiarail y theay; as
• imnea mychione barrant shickyr ve ry gheddyn ec sleih vees shassoo noi'n çhirveish nagh bee eh orroo goaill ayrn aynjee.

Ta'n Fer-lhee Rankin gra dy vel ad soiaghey jeh dy vel Kied Reeoil jannoo y reaghys slattyssagh, agh nagh vel eh jehsyn hene cur freggyrt da ny feyshtyn ayns rieughid mychione livrey shirveish hauçhey. T'eh gra, er nyn son, dy vel yn aght ta surransee toiggal shoh çheet 'sy chied ynnyd, as nagh vel ny imneaghyn oc mychione preays, aghtyn coadee as aghtyn dy reayll sauçhey er n'gholl ersooyl, as dy vel y theay feme freggyrtyn baghtal er yn aght nee ny gaueyn shen goll er goaill ayns laue. T'eh gra dy vel feme neesht er coadey kiarail slaynt t'ayn nish, dy vel feme oc er baghtalys mychione reaghey fwirran, mychione cur argid as mychione freggyyrtys – c'red veagh femoil, as cre'n aght veagh ny shirveishyn shen t'ayn nish goll er coadey?

Ta'n Fer-lhee Rankin gra dy vel feme oc neesht er ve cleeir bentyn da currym profeshoonagh, er y fa, roish my vees bree currit da, dy vel fir chlinicoil ayns feme jeh baghtalys mychione reillyn as mychione ny currymyn orroosyn, as mychione aghtyn coadee son shassoo noi rere cooinsheanse, chammah's reddyn rieugh t'ayn. Myr sampleyr, t'eh gra nagh vel medshinyn as teisht oc son shoh 'sy Reeriaght Unnaneysit as nagh vel protocolyn coardit, as son Ellan Vannin, nagh vel eer yn Slattys Ablid Inçhynagh currit ayns bree dy slane,  vees tayrn  feyshtyn  mychione yn aght foddee peiagh erbee cur coardail as slane toiggalys ayn gyn Slattys  Ablid Inçhynagh ve ain.

Ec y traa cheddin ta Eaghtyrane noa-reiht y Heshaght, y Fer-lhee Vanina Finnochi, gra dy nee oyr son imnea dy feer da ny fir-lhee, as dy vel eh orroo ve biallagh da, ayns rieughid dy nee'n chied leigh ee, vees ny jean assee erbee, as dy vel shoh goll dy bollagh noi eck, as dy vel ee geearree gra, as dy b'loys jee gra, foddee dy vel ad ny fir smoo chochianglt rish yn oardagh.

Ta'n Fer-lhee Finnochi gra dy vel ad gennaghtyn nagh row ad goll er goaill stiagh 'sy chooish dy liooar, myr Sheshaght, nagh row y caa oc dy ghra ny ta ny barelyn oc ayns aght jarrooagh, as dy vel ee smooinaghtyn dy vel shoh oyr son imnea da ymmodee, ymmodee fir-lhee. T'ee gra nagh vel ee shickyr quoid jeu veagh arryltagh dy ghoaill ayns laue y çhirveish shoh ec y traa t'ayn.

Agh ta troddaneyr son geddyn baase lesh cooney, Sue Biggerstaff, gra, tra cheayll ee y naight dy vel Kied Reeoil er ve currit da'n Villey, dy vel ee gennaghtyn yindyssagh dy bollagh, as dagh cheayrt t'ee clashtyn eh goll er gra dy vel ee geearree shilley jeïr, as nagh vel ee agh feer, eer ennaghtagh, as dy vel ee jeant magh as magh dy vel eh ain fy yerrey. T'ee gra dy vel ee treishteil dy jean Sostyn geaishtagh, agh nagh vel eh agh red yindyssagh dy smooinaghtyn er, nagh bee peiagh erbee eignit dy gholl trooid shen va'n dooinney sheshey eck eignit dy gholl trooid, er yn oyr nagh lhisagh peiagh erbee. T'ee gra dy vel eh ro anmagh er-e-hon, agh t'ee cur booise da Jee nagh bee peiagh erbee elley eignit dy gholl trooid shen – dy bee'n reih oc, dy vel shen y red mooar, dy vel reih ayn, as my vees eh noi dty chredjue nagh vel eh ort jannoo eh, agh dy beagh y reih shen er ve ayn, as dy lhisagh eh er ve echey, dy ren eh shirrey eh, agh nagh dod eh ve echey.

Ta Bnr Biggerstaff gra dy row ee smooinaghtyn dy row y dooinney sheshey eck, Simon, yn un pheiagh 'sy stayd shoh as dy row eh feer neu-aighoil, agh nish dy vel ee er loayrt rish boandyryn  ynnydoil neayr's shen, as dy vel eh ayns rieughid cadjin dy liooar, as nagh lhisagh sleih arragh baghey trooid shen. T'ee gra dy vel sleih çheet er kiarail vie dy veelaghey, spital, ny boandyryn ynnydoil, y fer-lhee, as dy row ad ooilley yindyssagh magh as magh, agh nagh row veg ry yannoo oc, yn un red oddagh ad jannoo, veagh shen dy chur eh magh ass y treihys echey, as nagh row kied oc dy yannoo eh, as nish ta kied oc.

Agh ta oltey jeh troddan noi geddyn baase lesh cooney, yn Fer-lhee Graham McAll jeh'n phossan, Currym Kiarail Vannin, ren baggyrt dy jinnagh eh goaill cooish leigh noi Reiltys Ellan Vannin my va Kied Reeoil currit da'n clattys, gra dy vel eh nish sur-smooinaghtyn er ny reihyn echey. 

Mean Souree hug yn Fer-lhee McAll raaue, ny yeih ny lhiasaghyn treealit da'n Villey, roosyn ren Tinvaal coardail Jerrey Souree, dy beagh y Clattys, rere y varel echey, noi'n Choardailys Oarpagh son Cairyssyn Pobble, as ren eh screeu rish y reiltys dy chur fys da dy row eh fosyn goaill cooish leigh my va kied currit da. 

Bentyn da'n phossan, Currym Kiarail Vannin, ta'n Fer-lhee McAll gra dy row ad ooilley mollit dy dowin, as dy row treishteil er ve oc dy jinnagh ny myn-phoyntyn ren ad cur roish y Turneyr Theayagh as yn Airaght Cairys er n'gholl noi y Villey, as dy row ad gennaghtyn dy row gennid dy reill mie bentyn da'n Villey shoh, er-lheh er yn oyr dy row ny lhiasaghyn va currit trooid ec y traa s'jerree gyn caa er-nyn-son dy gholl er resooney magh dy kiart, ny dy ve er nyn scrutaghey  ny er nyn lhiasaghey, myr shoh dy row ad mollit dy dowin.

Ta'n Fer-lhee McAll gra dy vel ad foast smooinaghtyn foddee dy bee cooishyn bentyn da'n Choardailys Oarpagh son Cairyssyn Pobble, dy chur er y reiltys dy choadey bioys ny seyraanee gyn aggle ny foayr, myr shoh dy vel ad foast smooinaghtyn nagh vel y Billey ain dy bunnidagh biallagh da'n Choarailys Oarpagh. T'eh gra dy vel ad smooinaghtyn dy vel y Choardailys Oarpagh son Cairyssyn  Pobble son sleih as anlheiltys oc, nagh vel eh er ve currit dy ve freggyrtagh dy liooar da ny cairyssyn shen son sleih as ta anlheiltyssyn oc, as myr shoh dy vod sleih as anlheiltyssyn oc ayns aght kiart goaill aggle roish y Villey shoh.

Ta'n Fer-lhee McAll gra dy vel ad smooinaghtyn neesht dy vel y Billey shoh dy bunnidagh cleiy fo oyr y Hirveish Claynt Ashoonagh. T'eh gra dy vel Slattys Shirveish Slaynt as Kiarail Ashoonagh gra dy jean yn Shirveish Claynt Ashoonagh, y rheynn, cur, ny lhie er couyryn vees ry gheddyn, ny keimyn syrjey dy yss deiney as dy schlei vees ymmyrçhagh dy hauail bioys as dy hareaghey slaynt, myr shoh nagh vel veg ayns Slattys Shirveish Slaynt as Kiarail Ashoonagh, ny ayns Slattys Shirveish Slaynt as Kiarail Ashoonagh lhiasit, vees gra dy lhisagh y Rheynn Slaynt as Kiarail y Theay ve cochianglt ayns aght erbee rish cooney lesh sleih dy chur jerrey er y vioys oc. T'eh gra dy vel ad shoh ny reddyn undinagh, as dy vel ad smooinaghtyn dy vel y Billey shoh streeu dy bollagh rish Slattys Shirveish Slaynt as Kiarail Ashoonagh, as dy vel shen soilshaghey magh y caghlaa mooar nee shen gys y chommynaght ain. 

Ta'n Fer-lhee McAll gra dy vel ad sur-smooinaghtyn er ny dy yannoo, vel ad dy chur er oai  shen, er yn oyr dy beagh eh red feer vooar dy yannoo, myr shoh dy jean ad geddyn coyrle mychione shen. T'eh gra dy vel Tinvaal noa ain, dy vel yn Chiaire as Feed noa ain, dy vel slane cairys oc dy vooghey y billey, my vees ad geearree shen y yannoo, nagh vel slattys erbee soit myr clagh, myr shoh oddys ad jannoo shen, ny yeih nagh vel ad jerkallagh dy jean ad geearree jannoo shen. T'eh gra, choud's va'n reihys goll er cummal, dy row ymmodee coloayrtyssyn  va goll er goaill, as dy vel fys oc nagh jinnagh kuse jeh ny olteynyn noa er cheau teiy son y Villey 'syn aght v'eh jeant hoshiaght, agh beagh ad arryltagh dy vooghey eh, dy vel shen cooish elley.

Ta'n Fer-lhee McAll gra dy jean Currym Kiarail Vannin obbraghey dy chur eab er shareaghey kuse jeh ny lheamyssyn shoh, cur eab er, my vees ad abyl dy choyrlaghey daue dy chur ronney mychione cooinsheanse 'sy fo clattys, my vees ad abyl dy choyrlaghey da'n reiltys dychur eh çheumooie jeh'n Shirveish Claynt Ashoonagh chadjin, son shickyrys dy jean ad troddan son ny reddyn shen, as dy jean ad freayll rish cummal troddan, as bentyn da reddyn jeant rere yn leigh, dy jean ad sur-smooinaghtyn er ny reihyn oc.

---oooOooo---

Haink y fogrey shen dy oikoil liorish yn Eaghtyrane Tinvaal, Juan Watterson, dy row Kied Reeoil er ve currit da meeryn dy clattys, goaill stiagh Slattys Geddyn Baase lesh Cooney, ec toshiaght soie Tinvaal Jemayrt shoh chaie. 

Bentyn da'n phaart echey myr oltey Tinvaal, ta Loayreyder yn Chiare as Feed, David Ashford, gra dy vel eh fosyn cur feyshtyn as goaill ayrn ayns resooney magh cooishyn ayns soieyn Tinvaal. 'Syn oik echey myr Loayreyder, t'eh ersyn freayll eh hene veih goaill ayrn ayns cooishyn ayns yn Chiare as Feed. 

Bentyn da soieyn Tinvaal, ta Mnr Ashford gra dy vel yn offishear gurneilagh yn Eaghtyrane Tinvaal – as ga nagh vel Mnr Ashford gra shen, she Juan Watterson ta 'syn oik shen myr Eaghtyrane Tinvaal, as eh roish nish Loayreyder yn Chiare as Feed - as ta Mnr Ashford gra, er yn oyr dy vel peiagh ennagh elley ayn myr offishear gurneilagh ayns Tinvaal, 'syn aght shoh dy vel y choraa oc hene – shen dy ghra, ec quoi erbee vees Loayreyder yn Chiare as Feed – dy vel kied oc loayrt ayns resoonaghyn magh, dy vel kied oc dy chur feyshtyn, dy vel kied oc, my vees ad geearree shen, dy chur roish treealtyssyn neesht, myr shoh dy jean eshyn ymmyd, ayns Tinvaal, jeh'n chied echey myr oltey yn ard whaiyl.

---oooOooo---

As dy jarroo, ny three feyshtyn va currit ayns soie Tinvaal Jerrey Fouyir Jemayrt shoh chaie, yn 20 Jerrey Fouyir, va'n troor jeu currit ec Mnr Ashford.

Hoshiaght, va feysht echey er yn Shirveishagh son Ynsagh, Spoyrt as Cultoor, as shen dy ghra Oltey yn Chiare as Feed son Doolish Yiass, Sarah Maltby. Va feysht Mnr Ashford mychione ny reaghyssyn t'ayn son cur enney er qualleeaghtyn fir ynsee va traenit çheumooie jeh ny Hellanyn Goaldagh.

Ta Bnr Maltby gra dy vel yn rheynn jannoo ymmyd jeh Laare Fys Ashoonagh y Reeriaght Unnaneysit son cur enney er qualleeaghtyn eddyr-ashoonagh as ny feeuid jeu, as ta jannoo towse jeh ny stundayrtyn jeu cosoyley rish qualleeaghtyn jeant 'sy Reeriaght Unnaneysit. T'ee gra neesht dy vel fys oc er çaghlaaghyn t'er ve jeant 'sy Reeriaght Unnaneysit er y gherrid as dy jean y rheynn jeeaghyn orroo shen dy yannoo shickyr dy vel ad freggyrtagh da Stayd myr Fer ynsee lesh Qualleeaght, vees feer scanshoil.

---oooOooo---

Hug Mnr Ashford daa eysht er yn Shirveishagh son Slaynt as Kiarail y Theay, as Oltey yn Chiare as Feed son Doolish Yiass, Claire Christian.

Hoshiaght vrie eh mychione plannyn ec Kiarail Vannin dy chur er bun shirveish er-lheh currit da epilepsy. 

Ta Bnr Christian gra dy vel y treealtys son boandyr ynnydoil er-lheh goll er cur er y hoshiaght myr ayrn jeh aa-scrutaght s'lhea jeh shirveishyn neur-oaylleeagh yn Ellan, shaghey myr red scarrit. T'ee gra, liorish niartaghey y cho-chianglys lesh commyn gollrish y Laare Wellcome, nagh jean shen agh shareaghey shirveishyn son sleih 'syn Ellan, as dy nee scanshoil eh dy vel red ennagh noa ynnydoil vees goll er cur, co-reggyrtagh da'n chummey s'lhea shen.

Ec y traa t'ayn ta neur-oayllee coyrlee as sym er-lheh echey er epilepsy çheet gys yn Ellan dagh kegeesh. Ta Bnr Christian gra dy vel y rheynn treishteil dy bee boandyr er-lheh 'sy phaart shen liorish toshiaght y vlein argidoil 2027-28, as dy beagh y costys dy chur er bun yn shirveish mysh £60,000 gys £70,000 'sy vlein.

Ren Oltey y Choonceil Slattyssagh, Kirstie Morphet, briaght, fakin dy vel 661 fer aasit 'sy rolley faarkee son neur-oaylleeaght, as er mean dy row ad fuirraghtyn rish 44 shiaghtin, row cummey er ve jeant dy hoilshaghey magh feanish dy jinnagh boandyr er-lheh ny sloo y preays er shirveishyn neur-oaylleeagh, as veagh lheihys traaoil er-lheh ry gheddyn trooid boandyr er-lheh. Dinsh Bnr Christian jee dy row goaill ayns laue ny doilleeidyn shen son shickyrys  jannoo seose tosheeaght son Kiarail Vannin as son yn rheynn. Dinsh ee da olteynyn dy beagh vondeish dauesyn, as enn lhee currit er dy row epilepsy jannoo orroo, ass tooilley pohlldal ynnydoil.

---oooOooo---

Va nah eysht Mnr Ashford er Bnr Christian bentyn da'n traa er mean va surransee mooie fuirraghtyn er yn chied whaaltys oc son shirveishyn cardi-oaylleeagh. Ta Bnr Christian gra dy vel y traa ceaut roish nish ec sleih fuirraghtyn er mean son y chied whaaltys oc 48 shiaghtinyn, agh er y gherrid dy vel shen er jeet dy ve 23 shiaghtin. T'ee gra dy vel aa-scrutaght er ve fo raad neayr's Mee Luanistyn liorish colught Acumentis, va reaghit ec Ard Sheckter noa Kiarail Vannin, yn Fer-lhee Chris Stockport, dy chur enn er aghtyn dy shareaghey reirey ny rollaghyn faarkee as yn earroo dy hurransee goll trooid ny lheelannyn. T'ee gra dy jig tuarastyl dy gerrid, as dy vel Kiarail Vannin jerkal rish jeeaghyn er shen Mee Houney. 

Ta Bnr Christian gra dy vel ee smooinaghtyn dy vel veg erbee t'ad cur-lhieu nish bentyn da bishaghey liorish corillagh per cent erbee, dy beagh veg erskyn shen son shirveishyn noa, as dy vel eh orroo soilshaghey magh dy jean ny shirveishyn noa shen jannoo caghlaa son theay Vannin, as dy vel shen scanshoil, as dy vel kuse jeh ny ardyn elley as t'ee goaill tastey mooar jeu, as dy vel shoh ny ardyn ayndaue t'ad baih argid, myr sampleyr, jannoo ny sloo rollaghyn faarkee as reaghey dy heet stiagh ayn dy leah, nagh vel eh cho aashagh dy ve abyl dy hoilshaghey magh ny vees y vondeish ayns buill elley. 

Ta Bnr Christian gra nagh vel ad fakin y vondeish shen 'sy Rheynn Slaynt as Kiarail y Theay, agh dy jean kishtey y steat fakin y vondeish shen, lesh sleih goll back gys yn obbyr oc ny s'tappee er yn oyr nagh vel ad fuirraghtyn rish blein son goll fo skynn yn er-lhee, nagh vel ad fuirraghtyn agh veih three gys shey mee, vees dy ghra dy vel tooilley argid goll stiagh ayns kishtey y steat, myr shoh dy vel eh bentyn da ve abyl dy hoilshaghey magh shen. T'ee gra, myr shen, dy vel ee jeeaghyn er yn sorçh shen dy obbyr, dy vod y theay fakin dy vel shin ayns rieughid baih argid ayns shoh, dy vel ad jannoo reddyn ny sloo er yn oyr dy jig vondeish argidoil ayns boayl elley.

Ta Bnr Christian gra dy vel staydyn lhee çheet dy ve ny smessey as dy vod ad çheet dy ve smoo costallagh er y fa shen, myr shoh dy vel eh feer scanshoil dy vel shin jeeraghey er shen, as nagh vel ee smooinaghtyn – as son shickyrys tra t'ee er vriaght ny feyshtyn shen 'sy Rheynn - nagh row ad er ve abyl dy hoilshaghey magh y vondeish shen ayns aght argidoil. T''ee gra, myr shoh, dy vel eh feer scanshoil tra t'ad çheet er oai as gra dy vel feme oc er baih argid 'syn ard shoh, dy yannoo ny sloo y rolley faarkee, dy vod ad soilshaghey magh dy vel  shen y vondeish argidoil, agh chammah's shen vondeish da'n pheiagh shen, da'n foays echey, as dy ve abyl dy chur ad dy vaghey dy neu-chrogheydagh, dy ve abyl dy gholl magh 'sy theihll as ayns feer dy cheau bea vie.

Ny s'anmee ayns yn soie Tinvaal va resooney magh er treealtys yn Ard Shirveishagh, Chris Thomas, tra loayr Bnr Christian mychione plan son couyral argidoil harrish three bleeaney, as t'ee çheet er yn oraid shen ayns shoh, as gra dy nee feer scanshoil eh dy vel shin goaill toshiaght er geddyn aghtyn fondagh veih'n phlan shen, dy vel yn ablid oc dy vaih argid ayns ardyn ayndaue ta fys oc er dy vel feme er baih argid. T'ee gra dy vel shen feer scanshoil, as dy vel y plan son couyral argidoil er chur enn er shen, as dy jean mayd goaill toshiaght er fakin ny vondeishyn ass shen ayns yn 12 vee gys 18 meeaghyn shoh çheet, as dy vel ee jeeaghyn roee lesh cur-lhee ad shen, dy hoilshaghey magh da'n theay ny t'ad dy yannoo ayns ny ardyn shen.

Ta Bnr Christian gra dy vel ad er chur er bun fwirran feer vie er bastal, as vel ee cur barrant ayn dy vel ad goll er pohlldal liorish ny fir chlinicoil, dy vel ad goll er pohlldal liorish y Çheshaght Lhee Ghoaldagh, dy vel ad goll ere pohlldal dy gheddyn jeant  yn eh shoh, as dy vel eh ooilley son foays theay Vannin dy obbraghey cooidjagh dy chooilleeney y plan shen son couyral argidoil.

---oooOooo---

Yn chooish smoo roish soie Tinvaal Jerrey Fouyir, yn chooish urree va traa dy liooar ceaut, va shen bentyn da treealtys yn Ard Shirveishagh, as Oltey yn Chiare as Feed son Doolish Veanagh, Chris Thomas, bentyn da claare y reiltys. Va'n treealtys echey –

Dy vel barel Tinvaal eh dy lhisagh Coonceil ny Shirveish clou, liorish jerrey Mee Houney, docamaid y reiltys son resooney magh ayns Tinvaal vees soilshaghey magh a) ny doolaneyn fo as ny caaghyn ec yn Ellan ec y traa t'ayn as b) agenda as tosheeaghtyn ayndaue er polasee, er plan jantys as er claare clattyssagh dy chur-rish ad; lesh aa-scrutaghtyn bleinoil as lesh lhiasaghyn ve currit roish son resooney magh as coardail dagh Jerrey Fouyir lurg shen.

Loayr Mnr Thomas er y treealtys echey, va er ny niartaghey ec Oltey yn Chiare as Feed son Garff, Richard Henthorn, ren freayll back ny goan echey. 'Sy resooney magh, shoh ny olteynyn ren loayrt :

• Oltey yn Chiare as Feed son Connaghyn, Rob Callister;
• Oltey yn Chiare as Feed son Doolish Yiass, yn Shirveishagh son Slaynt as Kiarail y Theay, Claire Christian; 
• Oltey y Choonceil Slattyssagh, Gary Clueit;
• Oltey y Choonceil Slattyssagh, Tanya August-Phillips;
• Loayreyder yn Chiare as Feed, as Oltey yn Chiare as Feed son Doolish Hwoaie, David Ashford;
• Oltey yn Chiare as Feed son Rhumsaa, Juan McGuinness;
• Oltey yn Chiare as Feed son Middle, as yn Shirveishagh son Cairys as Cooishyn Sthie, Jane Poole-Wilson;
• Oltey yn Chiare as Feed son Doolish Hiar, Joney Faragher;
• Oltey yn Chiare as Feed son Carbory, Balleychashtal as Malew, as yn Shirveishagh son Bun-troggalys, Jason Moorhouse;
• Oltey yn Chiare as Feed son Rushen, Mark Kemp;
• Oltey yn Chiare as Feed son Rhumsaa, Robert Cowell;
• Oltey yn Chiare as Feed son Doolish Yiass, as yn Shirveishagh son Ynsagh, Spoyrt as Cultoor, Sarah Maltby;
• Oltey yn Chiare as Feed son Doolish Hiar, Andy Saunders;
• Oltey yn Chiare as Feed son Garff, Vicki Hewison;
• Oltey y Choonceil Slattyssagh, Paul Craine;
• Oltey yn Chiare as Feed son Ayrey as Maayl, Stephen Broad;
• Oltey yn Chiare as Feed son Connaghyn, yn Dr Rachel Glover; 
• Oltey yn Chiare as Feed son Glionfaba as Purt ny Hinshey, Katryna Baptist;
• Oltey y Choonceil Slattyssagh, Dawn Kinnish;
• Oltey yn Chiare as Feed son Glionfaba as Purt ny Hinshey, Daniel Davison;
• Oltey y Choonceil Slattyssagh, Diane Kelsey;
• Oltey yn Chiare as Feed son Doolish Hwoaie, Damian Ciapelli;

as ec y jerrey, ren Mnr Thomas cur freggyrt da'n resooney magh roish my ren olteynyn ceau teiy. As lesh un choraa ren yn Chiare as Feed ceau kiare teiy-yn as feed ayns foayr jeh'n treealtys, as shen yn aght neesht 'sy Choonceil Slattyssagh, lesh ooilley ny nuy olteynyn as teiy oc ceau eh ayns foayr jeh'n treealtys. 

---oooOooo---

Jeheiney yn 23 Jerrey Fouyir, ren Mnr Thomas clou fogrey mychione olteynyn politickagh ayns rheynnyn y reiltys, ayns buird clattyssagh as ayns co-chorpyn theayagh.

Marish yn Shirveishagh Tashtee, Michael Crowe (Rushen), bee Kirree Jenkins (Carbory, Balleychashtal as Malew), Damian Ciapelli (Doolish Hwoie) as Gary Clueit (Coonceil Slattyssagh).

Ayns yn Rheynn Bun-troggalys, hig stiagh Stephen Broad (Ayrey as Maayl), Richard Henthorn (Garff) as Juan McGuinness (Rhumsaa), dy obbraghey marish yn Shirveishagh, Jason Moorhouse (Carbory, Balleychashtal as Malew).

Myr olteynyn y Rheynn Slaynt as Kiarail y Theay marish yn Shirveishagh, Claire Christian (Doolish Yiass), ta James Cochrane (Middle), Mark Kemp (Rushen), Andy Saunders (Doolish Hiar), Diane Kelsey (Coonceil Slattyssagh) as Peter Reid (Coonceil Slattyssagh) er ve pointit.

She'n Dr Rachel Glover (Connaghyn) ta'n Shirveishagh son Çhymmyltaght, Bee as Eirinys, as nish ta Peter Shimmin (Doolish Veanagh) as Paul Craine (Coonceil Slattyssagh) er jeet stiagh dy obbraghey maree. 

Marish yn Shirveishagh Sarah Maltby (Doolish Yiass) 'sy Rheynn Ynsee, Spoyrt as Cultoor ta Daniel Davison (Glionfaba as Purt ny Hinshey), Vicki Hewison (Garff) as Kirstie Morphet (Coonceil Slattyssagh) er jeet dy ve nyn olteynyn politickagh.

Ta Daniel Davison (Glionfaba as Purt ny Hinshey), Richard Henthorn (Garff), Vicki Hewison (Garff) as Rob Mercer (Coonceil Slattyssagh) er jeet dy ve olteynyn politickagh y Rheynn Gastid Dellal, as ayns shen nee ad obbraghey rish yn Shirveishagh Rob Cowell (Rhumsaa).

Ga nagh ren Mnr Thomas pointeil peiagh ennagh er-lheh dy ve'n Shirveishagh son Oik Coonceil ny Shirveishee, er yn oyr dy jean eshyn hene cooilleeney y paart shen, t'eh er phointeil Katryna Baptist (Glionfaba as Purt ny Hinshey), Mark Kemp (Rushen) as Juan McGuinness (Rhumsaa) dy ve nyn olteynyn politickagh.

Jeeaghyn er buird clattyssagh as oikyn elley nish –

• ta Katryna Baptist (Glionfaba as Purt ny Hinshey) er jeet dy ve Caairlagh Oik Postagh Ellan Vannin; 
• she James Cochrane (Middle) t'er jeet stiagh myr Caairlagh Lught-reill Bun-shirveishyn Vannin;
• myr Caairlagh yn Oik Dellal Cairagh ta Mnr Thomas er phointeil Peter Shimmin (Doolish Veanagh);
• ta Mnr Thomas hene tannaghtyn 'syn oik echey myr Caairlagh Culture Vannin; as
• she Diane Kelsey (Coonceil Slattyssagh) ta Caairlagh y Ving Phlannal. 

Ta Mnr Thomas gra dy vel foast sleih dy ve pointit gys oikyn elley, as dy jig fogrey elley 'sy traa ry heet.

---oooOooo---

Ta Oltey yn Chiare as Feed son Doolish Hwoaie, Damian Ciapelli, cur eam er y reiltys dy yeeraghey er shiartanse dy chooishyn, shaghey jannoo rolley liauyr dy hosheeaghtyn. Ta imnea ec Mnr Ciapelli dy voddagh yn eiyrtys jeh cur eab er goaill ayns laue ymmodee cooishyn ec yn un traa ve coayl toiggalys jeh ny vees scanshoil. 

Va resooney magh liauyr mastey olteynyn Tinvaal mychione tosheeaghtyn y reiltys, as ta Mnr Ciapelli gra dy nee scanshoil eh dy vel yn ymmyrkey kiart oc. T'eh gra dy vel feme er y reiltys jeeraghey, dy chur reddyn ve ayns focus, as my vees rolley dy hosheeaghtyn echey vees rolley feer liauyr jeh reddyn cadjin, dy vel y gaue jeh'n cheeayl jeh ny vees tosheeaght as scanshoil, erskyn cooishyn elley oddys ve currit rish ayns aght smoo jeantagh.

---oooOooo---

Ta Oltey yn Chiare as Feed son Glionfaba as Purt ny Hinshey, Daniel Davison, gra dy vel eh credjal dy vel argid dy liooar ec y reiltys dy hareaghey ny shirveishyn echey, agh nagh vel eh goll er cur 'syn aght kiart. T'eh gra dy vel argid goll er ceau ayns aghtyn neu-chiart, as nagh vel aghtyn coadee kiart dy reayll veih ceau rour. T'eh cur eam son focus smoo er slaynt inçhynagh, er cooishyn bun-earrooagh as er kiarail-chouyr 'sy heear.

Ta Mnr Davison gra er-lesh dy vel ny tosheeaghtyn smoo, chammah's son y rheynn reihys echey as ny sodjey, as my vees sleih jeeaghyn harrish y clane Ellan ayns aght cadjin, dy vel sleih dy neu-chorrym gra nagh row ad mayrney lesh y reiltys shoh chaie, dy row ad smooinaghtyn nagh row y baghtalys ayns shen, nagh row y freggyrtys ayns shen, as dy row ceau rour jannoo seose feanish jeh shen, myr shoh dy row adsyn ny doilleeidyn smoo ayns Glionfaba as Purt ny Hinshey, dy row doilleeid oc lesh ve cochianglt, dy row y doilleeid lesh ve cochianglt er y çheer, dy row shen ny ghoilleeid mooar, as ny linnaghyn çhellvane mooie ayns ny ardyn er y çheer, gyn ve abyl dy chur eam er sleih.

Ta Mnr Davison gra, harrish ooilley neesht, dy vel y heear jeeaghyn dy gheddyn ny  sloo argid na cooid er-mayrn yn Ellan, agh nagh vel eh gra dy vel feme er geddyn rey rish yn argid veih boayl erbee elley, agh dy lhisagh argid ve currit dy kiart da'n heear, dy vel feme ec y heear er geddyn couyryn dy kiart, as dy vel feme er kiarail-chouyr 'sy heear neesht – nheeghyn son sleih jeh dy chooilley eash, ayns rieughid.

Er-lesh Mnr Davison nagh vel eh nagh vel argid dy liooar goll er cur, agh jeeaghyn er reddyn nagh vel goll er reirey dy fondagh, as yn chied red, as t'eh çheet er  taishbynys va goll er cummal çheumooie jeh'n chied soie Tinvaal,  t'eh gra dy vel shen slaynt inçhynagh, as dy feme ain er jeeaghyn urree cho trome-chooishagh as er slaynt chorpagh, ayns rieughid, er yn oyr dy vel ad ny neesht jannoo er y cheilley, as dy vel un chooish, agh 'sy nah ynnyd red ennagh ren ymmodee sleih çheet er 'sy troddan bentyn da'n reihys, veih dy chooilley pheiagh, ooilley mygeayrt yn Ellan, dy row y nhee eh dy vel yn argid ayns shen, as dy vel eh er ve currit gys ny caghlaaghyn ard shoh, agh nagh row eh currit dy kiart, as dy row reddyn goll er ceau dy neu-chiart as nagh vel aghtyn coadee kiart ayn noi ceau rour, as dy neu-aighoil dy vel y mooadys jeh ny ardyn shoh geddyn wheesh argid currit daue son agh beggan beg çheet magh ass.

Ta Mnr Davison gra, my vees sleih jeeaghyn er yn aght ta'n reiltys goll er stiurey, er-lesh dy row eh goll 'naght cheddin as colught dy beagh eh er ve brisht ec y vanc mysh hoght bleeaney er dy henney, as dy vel yn red vees neu-aighoil. T'eh gra dy vel eh stiurey y dellal echey as t'eh jeeaghyn er ny costyssyn as dy vel eh jeeaghyn er quoid t'eh cosney, as dy vel eh cur eab er cur orroosyn shen stroo, my vees eh abyl dy ghientyn tooilley çheet stiagh, myr shoh er-lesh 'syn Ellan nagh vel yn aght share dy yannoo eh, dy vel fy yerrey shen er ta shin ceau nyn argid,  nagh vel eh goll er cur dy kiart, agh dy vel red mooar elley dy heet er, shen cur er y tarmaynys aase. 

Ta Mnr Davison gra, liorish cur er y tarmaynys aase, dy jinnagh shen eh ny voayl smoo fondagh , as dy ve oney rooin hene, dy vel shin goll stiagh ayns eash bun-earrooagh, eash ayn hig far-inçhyn dy ve ny smoo as ny smoo ry akin, myr shoh noi jannoo ro veg lesh shen, dy vel feme ain er yrjaghey shen ayns aght, as dy vel feme ain er lhiggey da colughtyn bishaghey ayns shoh, as colughtyn beggey ayns co-voodeeyssyn neesht, vees cummal seose y chooid smoo jeh tarmaynys Vannin, ta failley y chooid smoo dy leih, dy vel feme ain er jannoo shickyr dy vel ad er nyn phohlldal neesht.

---oooOooo---

Ta fer oayllee ynnydagh er thieys, Chris Lee, ren ceau queig bleeaney stiurey skeim Reiltys y Reeriaght Unnaneysit dy chooney lesh sleih kionnaghey thie, as t'er chur er bun skeim son kionnaghey trooid goaill er mayll, gra dy vel creoighys ayns thieys 'syn Ellan. 'Sy tuarastyl s'noa clouit ec y reiltys, er mean ta costys jeh thie ny shlee na hoght filley y heet stiagh er mean jeh sleih ta gobbraghey 'syn Ellan, as dy vel gennid dy hieyn ayns ny margaghyn son goaill er mayll thieyn 'sy cherroo theayagh as preevaadjagh.

Ta Mnr Lee gra nagh vel monney er ve jeant choud's nish dy ghoaill ayns laue y doilleeid. T'eh gra dy vel creoighys ayns thieys 'syn Ellan, nagh vel thieyn dy liooar ve troggit, dy vel shin coayl y pobble obbree ain, er-lesh dy vod sleih fakin shen 'sy staddystaght ayns ny 12 vee shoh chaie bentyn da'n staddystaght tarmaynagh as dy vel yn aase er duittym ersooyl dy mooar harrish yn earroo dy vleeantyn t'er n'gholl shaghey, as dy vel shin coayl pobble obbree saa veih'n Ellan, dy vel pobble ain vees çheet dy ve shinney, as dy by chosoylagh eh dy vel ain fer jeh ny pobbleyn shinney dy dowanagh, er-lesh. T'eh gra, veih'n aght t'eshyn jeeaghyn er, as er-lheh bentyn da thieys, dy vel doilleeid ayns goaill er mayll,  nagh vel sthock dy liooar er mayll as feme er, dy vel fys ain er dy vel colughtyn geearree arraghey stiagh 'syn Ellan agh reesht dy vel ny doilleeidyn bentyn da thieys, gyn thieys dy liooar ve ayn,  cur lhiettrimmys orroo veih arraghey gys yn Ellan, lesh builley feer vooar ass shen er çheet stiagh bentyn da aase tarmaynagh yn Ellan ooilley cooidjagh.

Choud's ta sleih dy mennick cosoyley yn Ellan rish Sostyn heear-hwoaie, ta Mnr Lee gra, er-lesh, dy vel yn Ellan smoo cosoyley rish y thalloo meanagh ny Hostyn  yiass bentyn da priosyn son thieyn, as er-lesh nagh bee mayd arragh 'syn ynnyd jeh ve cosoyley rish Sostyn heear-hwoaie. Er-lesh dy vel y costys jeh troggal thieyn smoo costallagh 'syn Ellan, as dy by chosoylagh eh dy vel shen goaill stiagh argid elley jeh £30-40,000 ec y chooid sloo er thieyn , er yn oyr dy vel y costys jeh troggal ad, goaill noal ny stooghyn troggee as myr shen, dy vel feme dy kinjagh er cur geill da shen, myr shoh dy beagh eh dy kinjagh smoo costallagh.

Ta Mnr Lee gra, bentyn da ny doilleeidyn roin, dy vel ad feer chosoyley roosyn 'sy Reeriaght Unnaneysit, dy vel pobbleyn bishaghey 'sy Reeriaght Unnaneysit, agh dy vel sthock dy hieyn, thieyn ta ry gheddyn, er duittym feer vooar er coontey yn ablid ec sleih dy gheddyn yeearlys as dy heet dy ve er yn aarey thieys, as yn eiyrtys as beoyn ain fakin eh ayns dy chooilley voayl, dy vel yn un aght foddee sleih faagail thieyn y lught-thie oc tra t'ad shenn dy liooar, shen dy gholl as goaill er mayll, as dy vel tooilley reillyn çheet stiagh 'sy Reeriaght Unnaneysit vees cur preays er y vargey shen, as myr shoh dy vel priosyn er mayll goll seose, as dy vel eh çheet dy ve ny eiyrtys kiarkyllagh bentyn da'n ablid dy spaarail y yeearlys dy chosney gys yn aarey thieys 'sy chied ynnyd.

Bentyn da'n stayd 'syn Ellan, er-lesh Mnr Lee nagh vel dy liooar er ve jeant, dy row caghlaaghyn beggey da'n skeimyn ec y reiltys ec y tra t'ayn ta ry gheddyn, agh reesht er-lesh dy vel yn chooid smoo çheet çheumooie jeh ny caglieeyn er çheet stiagh t'er ve reaghit er ny thieyn shen, as tra ta sleih er nakin harrish ny bleeantyn  neesht nagh vel yn aggyrt er skeimyn ta ry gheddyn 'syn Ellan er ve ro vooar, dy vel feme er jeeaghyn er ny oddys ve jeant ny smoo, as dy vel eh ny smoo bentyn da'n aght dy phohlldal lesh y yeearlys ayns yn traa dy spaarail, vees jeeaghyn dy ve y chooish lane-scanshoil, as dy vel shin fakin shen harrish dy chooilley voayl bentyn da ny noaidyn er-lheh as reddyn t'er er n'yannoo harrish ny 12 vee gys 15 mee shoh chaie.

---oooOooo---

Ta potecaree, Nick Kaye jeh Shapp potecaree Kingsley Muti ayns Balley ny Sallee er jeet dy ve'n chied pheiagh ass ny Hellanyn Goaldagh dy chosney co-heshaghtys Coonceil Poteracaree y Theihll, as veg agh y nuyoo pheiagh er dy rieau dy chosney shen. T'eh gra dy nee traa doolaneagh eh son shappyn potecaree, lesh geulaghyn livrey fo phreays feer vooar, agh dy vel paart y photecaree er jeet dy ve ny smoo ayns traa y choorse echey, lesh goaill ayrn 'sy choarys jeh chied chiarail ayns aght nagh row eh jerkal rish tra ren eh goaill toshiaght.