Meeryn ass Traa dy Liooar, Jelune 16oo Mean Fouyir 2024
Bentyn da'n emshyr, foddee dy jig yn emshyr share t'er ve ayn car ny bleeaney, lurg sourey va fliugh as sterrymagh, as 'sy chiaghtin shoh dy bee emshyr vraew chirrym ayn dagh laa,.
Ta George Shimmin jeh'n Oik Emshyraght gra dy vel shin dy cadjin geddyn traa ec toshiaght yn ouyir tra t'eh cheh ass yn imbagh, as dy vel yn feysht, cuin hig eh? T'eh gra dy vel eh jeeaghyn dy ve cheet dy leah mleeaney. T'eh gra dy bee eh beggan ny s'choe na'n aght cadjin, gyn ve ro cheh, as dy vel eh jeeaghyn dy jean eh tannaghtyn ayn, son shickyrys son y chooid smoo jeh'n shiaghtin obbree. T'eh gra, choud's ta shin cheet gys y kione-shiaghtin dy vel eh jeeaghyn dy bee tooilley bodjalyn ayn, agh foast tannaghtyn chirrym, myr shoh ta'n coyrle echey dy ghoaill vondeish smoo jee.
---oooOooo---
T'a Kiarail Vannin er voghraghey magh dy vel faaishnys echey dy jean eh ceau £16.8 millioon erskyn y chlaare argidoil echey. Shen ny share na'n faaishnys va jeant Jerrey Souree tra va Kiarail Vannin jerkal rish ve £18.7 millioon punt erskyn y chlaare argidoil echey.
Ta'n chlaare argidoil son yn chirveish claynt mleeaney beggan ny sloo na £347 millioon punt. Ec chaglym s'noa y Voayrd ta olteynyn gra dy vel reaghyssyn noa er faill er chur preays er y chlaare argidoil echey. Agh ta Stiureyder Argid Kiarail Vannin, Jackie Lawless, gra dy vel Kiarail Vannin nish er caaghyn elley dy spaarail argid, as foddee dy yannoo ny sloo eh liorish £11 millioon punt.
Ta'n Ard Shirveishagh, Alfred Cannan, gra dy vel y stayd bentyn da ceau rour er kiarail slaynt jannoo seose oyr feer, eer vooar son imnea, as dy bee feme er goaill ayns laue eh, dy bee feme er cassey mygeayrt shen, as dy bee feme er cur-rish shen chelleeragh. T'eh gra dy jean eh baghtal da dy chooilley pheiagh ny veagh cummey y chassey mygeayrt shen cho leah's ta coardail oc er ny ta ny deanyn jeh as cuin haghyrys eh, agh dy bee feme er shen taghyrt bunnys ass-laue.
Ta Mnr Cannan gra nagh vod mayd ceau agh shen fod mayd fordrail dy cheau, as dy vel feme dy bieau er goaill ayns laue y toiggalys ain nagh vel yn argid vees goll er cur goll er ymmydey cho cooie as cho fondagh as vees possible, as neesht dy vod yn sheshaght, kiarail slaynt, Kiarail Vannin, gobbraghey rere smaght argidoil, as magh ass shen dy jean ad tannaghtyn cheusthie jeh'n chlaare argidoil echey.
Ta Mnr Cannan gra nagh vel eh ry chummal seose er chor erbee dy vel Kiarail Vannin freayll rish ceau erskyn y chlaare argidoil echey, as er-lheh fakin y towse dy argid hooar eh 'sy chlaare argidoil nurree, as er-lheh lesh y nhee dy row shen goaill stiagh neesht bishaghey 'sy cheesh, myr shoh dy vel shen dy ghra dy row eh er dy chooilley pheiagh cur tooilley ayns keesh ayns yn 12 vee shoh chaie, as dy dooar Kiarail Vannin £20 millioon punt elley myr keesh yeeragh, chammah's £23 millioon ny mysh shen va currit da myr lowanse frea veih'n Tashtey veih argid t'er jeet stiagh ayn.
Ta Mnr Cannan gra, mannagh vel eh currit-rish, dy jean eh cur builley feer trome jiooldagh er yn argid freillt ain 'sy traa feer ghiare, as dy bee shen, ny lomarcan, oyr son imnea feer vooar. T'eh gra dy nee cooish feer trome ta'n argid ceaut er kiarail slaynt, as dy bee feme er goaill ayns laue ee chelleeragh.
Ta Mnr Cannan gra, lesh shen, dy vel eh nish er yn Reiltys jeeaghyn dy geyre er ny plannyn argidoil ain son y traa meanagh, as ny vees shen bentyn da fondid y Reiltys as aa-chummey neesht. T'eh gra dy jean eh goaill ayns laue ny cooishyn shoh.
Ta Mnr Cannan gra dy vel eh er yn Reiltys nish cur trimmid mooar er kiartaghey y plan argidoil echey, dy ve freggyrtagh da ny doolaneyn t'er ve currit fo'n Reiltys er coontey ceau rour, as cowraghyn jeh ceau rour ta cheet er y hoshiaght veih Rheynn elley, ny yeih nagh vel veg kiart cho mooar as Kiarail Vannin, as dy vel feme er yn Reiltys cur barrant ayn dy vel y plan argidoil kiart echey son yn Ellan choud's ta shin goll er y hoshiaght.
Ta Oltey yn Chiare as Feed son Connaghyn, Julie Edge, er chur eam son olteynyn Tinvaal dy heet cooidjagh roish jerrey y varney houree echey dy loayrt mychione cooishyn preayssagh t'ayn, agh va shen bentyn da boirey mooar 'sy voggyl dy arraghey theayagh er y gherrid. Tooilley mychione shen ayns minnid ny ghaa.
Nish ta Oltey yn Chiare as Feed son Carbory, Balleychashtal as Malew, Tim Glover, gra dy vel feme er yn Chiare as Feed cheet cooidjagh dy loayrt mychione ny vees taghyrt bentyn da faaishnys Kiarail Vannin dy bee £16.8 millioon elley ceaut echey erskyn y chlaare argidoil echey. Ta Mnr Glover er chremmey y bishaghey 2% ayns keesh cheet stiagh mleeaney, as yn dean jeh shen dy chosney argid er-lheh son yn chirveish claynt as chiarail y theay, gra dy ren shen failleil. T'eh cur yn feysht, vel claare argidoil ro veg goll er cur da'n chirveish claynt, shaghey ceau rour, as haink eh reesht er y varel echey dy vel feme er aa-reaghey yn aght ta'n Chlaare Argidoil jeant.
Ta Mnr Glover gra neesht dy jean eh freayll rish shirrey barney s'girrey, as y barel echey dy vel yn ablid dy chur-rish cooishyn preayssagh caillt choud's ta'n varney ayn.
Ta Ard Sheckter Kiarail Vannin, Theresa Cope, gra dy vel Kiarail Vannin er chur stiagh plannyn 'sy traa giare gys yn Rheynn Slaynt as Kiarail y Theay dy yannoo ny sloo reesht yn varney mleeaney, agh dy yannoo shen veagh feme er scryssey magh ny jannoo foddey ny sloo shiartanse dy hirveishyn 'sy chied linney.
Ta Bnr Cope gra, neayr's va Kiarail Vannin currit er bun, dy row eh er reaghey dy spaarail ny sloo na £10 millioon dagh blein, liorish shareaghey stundayrtyn lurg sessyn formoil jeant liorish reilleyderyn mooie, agh dy row bishaghey mooar ayns costyssyn son druggaghyn as ta faill er n'gholl seose liorish £30 millioon punt neesht.
Ta Bnr Cope gra dy vel ee toiggal dy vel imnea mychione yn towse dy argid vees goll er ceau er kairail slaynt, agh t'ee gra foddee dy vel feme er coloayrtys politickagh mychione tosheeaghtyn y Reiltys as dy chur enn er ny ta'n Reiltys geearree Kiarail Vannin dy yeeraghey er.
Ta Bnr Cope gra dy vel Kiarail Vannin currit da'n churrym ard-viandagh echey, agh nagh vel y chlaare argidoil jeh £346 millioon punt freggyrtagh da'n towse dy argid va er ny choyrlaghey son Kiarail Vannin tra v'eh currit er bun 'sy vlein 2021. Rere formula 'syn aa-scrutaght jeant ec yn Reejerey Jonathan Michael, veagh Kiarail Vannin er n'gheddyn £155 millioon elley dy argid harrish three bleeaney, as dy beagh shen er ve'n aght, nagh beagh sleih loayrt mychione ceau rour ny giarrey shirveishyn.
Ta Bnr Cope gra dy vel Kiarail Vannin jannoo e chooidshare, agh dy vel y currym echey feer ard-viandagh.
---oooOooo---
Va briwnys jeant liorish bingyn baaish 'sy vlein 2023 dy ren 14 peiagh reih dy chur kione er y vioys oc hene. Ta ny data shoh bentyn da ny briwnyssyn va jeant 'sy vlein shen, shaghey yn earroo dy leih hooar baase 'sy vlein shen hene.
Veih'n 1 Jerrey Geuree as yn 24 Mee Luanistyn mleeaney, ta briwnys er ve jeant dy ren shiaght peiagh reih dy chur kione er y vioys oc hene.
Ta Oik Coonceil ny Shirveishee gra foddee traa liauyr dy liooar ve ayn veih'n traa ta peiagh ennagh geddyn baase as yn traa ta briwnys jeant er yn aght haghyr eh as ta recortys jeant jeh'n vaase shen. Shen yn oyr dy vel ny earrooyn shen goaill stiagh kuse dy chooishyn veih'n traa roish 2023 ny 2024. Cha nel ad goaill stiagh kuse dy chooishyn tra hooar sleih baase ayns ny bleeantyn shen, agh nagh vel briwnys er ve jeant orroo foast.
---oooOooo---
Ta cassan noa bentyn da attyn inchynagh er ve currit er bun dy chooney dy yannoo shickyr dy vel surransee ceau traa sodjey sthie na 'sy thie lheiys. Ta'n Olloo Andrew Brodbelt y fer toshee son kanghyr-oaylleeagh neuro-obbraidagh ayns Ynnyd Walton Treisht Undinagh y Hirveish Claynt Ashoonagh ayns Leyrphoyl. T'eh er ninsh da Radio Vannin, er coontey saaseyn dy hareaghey reaghyssyn eddyr Kiarail Vannin as thieyn lheiys 'sy Reeriaght Unnaneysit er y gerrid, dy nee sloo-vennick eh dy vel feme er sleih troailt ersooyl veih'n Ellan.
Ta'n Olloo Brodbelt gra dy vel yn chooid smoo dy leih as att inchynagh oc goll stiagh 'sy rheynn drogh-haghyrt as egin, vees bunnys y boayl smessey dy ve ayn, dy ve goit stiagh 'sy thie lheiys, dy ve dty hoie er lhiabbee y thie lheiys, fuirraghtyn er caghlaaghyn prowalys dy ve jeant, foast neu-hickyr mychione ny haghyrys. T'eh gra, myr shoh, ny t'er jeant oc, ny v'ad cur eab er jannoo, as veih cheu Ellan Vannin, ny t'ad er n'yannoo, shen cur er bun saase dy chur eab er jannoo ny s'tappee ny ronsaghtyn, as dy yannoo ynrican ny ronsaghtyn kiart, myr shoh nagh jean peiagh erbee geddyn dy chooilley red.
Ta'n Olloo Brodbelt gra dy vel eh er chur leaght ny ghaa da fir lhee 'syn Ellan, dy vel beggan dy yss elley oc er ny vees taghyrt, as dy vel oc nish caa chammah's dy akin sleih eddin ry eddin ny liorish feeshan, myr shoh dy vod loayrt rish sleih. T'eh gra dy vel eh ny s'jeshey dy akin sleih eddin ry eddin, agh ta fys echey dy vel eh doillee cheet veih Ellan Vannin, agh son shickyrys son yn chied whaaltys shen, as dy vod ad jannoo quaaltyssyn sodjey-churrymagh liorish feeshan. T'eh gra dy vel yn red elley t'er chaghlaa ayns rieughid ayns ny bleeantyn jeieanagh, shen dy vel arryltys foddey ny smoo son Ellan Vannin dy chooilleeney ny scannyn sodjey-churrymagh, myr shoh dy vod sleih reaghey son scan dy ve jeant dy hynnydoil, dy vod yn Olloo as e chumraagyn jeeaghyn er, dy vod ad loayrt via feeshan, gyn feme er sleih goll noon as noal son scannyn as quaaltyssyn.
Ta'n Olloo Brodbelt gra dy vel mooarane jeh'n chooish freayll recortys jeh'n sleih dy hynnydoil, dy yannoo shickyr dy vel ny ronsaghtyn jeant; vod sleih cosney thie beggan ny s'tappee, shaghey ve nyn soie ayns thie lheiys. T'eh gra dy vel mysh 30 cooish 'sy vlein, myr shoh nagh vel earrooyn mooarey t'ayn, shen sleih noa cheet stiagh ayn, agh dy nee baghtal eh dy vel ad fakin ymmodee sleih, er yn oyr, my va att inchynagh ec peiagh ennagh, dy vel ad dy mennick fakin sleih rish traa feer foddey ny lurg. T'eh gra dy vel ny earrooyn shen foddey ny syrjey, as ta sleih va lheiys currit daue lioroo as t'ad fo churrym sodjey ny geddyn lheiys elley.
Ta'n Olloo Brodbelt gra dy vel yn chooid smoo dy lheiys foast tannaghtyn ayn, ta'n lheiys cadjin foast goll fo skynn yn er-lhee vees goll er jannoo ynrican ayns shiartanse dy vuill 'sy cheer, agh dy vel yn chooid smoo dy leih cheet gys Leyrphoyl er-e-hon. T'eh gra dy vel radio-therapy jeant ayns Clatterbridge, agh foddee chemo-therapy as shiartanse jeh ny sorchyn shen dy lheiyssyn ve jeant 'syn Ellan. T'eh gra dy vel cassan ec yn Ellan nish, as dy vel shoh goll rish y chassan, dy gheddyn ny ronsaghtyn cooie jeant da sleih, dy vod ad ve sthie, myr ta'n reih, rish wheesh traa as vees possible – nagh vel ad geearree ve nyn soie ayns rheynn drogh-haghyrt as egin ny ayns lhiabbee thie lheiys, as, ayns rieughid, nagh vel yn chooid smoo dy hieyn lheiys laccal sleih ve nyn soie ayns lhiabbeeyn thie lheiys
Ta'n Olloo Brodbelt gra dy vel y cassan kiart er n'ghoaill toshiaght, as dy vel reddyn foddee ve jeant dy chur sleih dy valley eer ny s'tappee, reddyn enmyssit warden soyllee, shen red ennagh dy smooinaghtyn er son y traa ry heet, as dy vel earroo dy reddyn as foddee obbyr ve jeant orroo dy hareaghey shen eer ny smoo, dy chur eab er cooney lesh yn eddyr-insh shen. T'eh gra dy vel ymmodee reddyn mie goll er 'syn Ellan, bentyn da jannoo scannyn ayns shoh, bentyn da saaseyn sodjey-churrymagh ayns shoh, nagh vel eh dy kinjagh er sleih cheet back gys ny t'eh cheet er myr yn cheer vooar, dy gheddyn magh ny dy hoiggal ny vees goll er.
---oooOooo---
Ta Boayrd Kiarail Vannin er chremmey ny t'eh cheet er myr soaighyn-er 'persoonagh as jannoo ymmyd jeh enmyn' er olteynyn y wirran leeideilys echey ayns ny meanyn sheshoil. T'eh gra nagh vel shoh agh posteyrys.
Ta Lhiass-Chaairlagh y Voayrd, Sarah Pinch, gra, myr Boayrd, dy by vie lhieu chebbal dy phohlldal dy clane ooilley ny sheckteryn oc, ta cooilleeney job feer doolaneagh ayns staydyn ta ard doolaneagh. T'ee gra dy vel fys ec dy chooilley pheiagh ta baghey ayns Ellan Vannin toiggal ny preayssyn ayns shoh, nagh vel ynrican er yn Ellan, agh dy vel yn aght ta shin cur-rish y cheilley myr sharvaantyn theayagh ec yn chooid sloo, lhisagh shen dy chur arrym daue.
Ta Bnr Pinch gra dy jean ee screeu rish yn Ard Sheckter dy hoilshaghey magh slane pohlldal y Voayrd, cha nee ynrican 'syn aght t'ee livrey ass-lieh Kiarail Vannin, as er n'yannoo shen ayns ny three bleeaney shoh chaie, agh neesht 'syn aght t'ee gymmyrkey ee hene as yn livrey shen jeh'n obbyr. T'ee gra dy by vie lhee jannoo cronnal eh ayns giare-hennaghys y Voayrd oc roish y theay dy vel shin pohlldal dy slane y cheilley, as er-lheh ny sheckteryn ain ayns strane toshee yn obbyr ain.
Ta Bnr Pinch loayrt mychione livrey slaynt as kiarail y theay 'sy chymmyltaght geyre post Covid, lesh aggyrt vees bishaghey, lesh sorch ymmodee-fillit yn aggyrt vees bishaghey, as ooilley ny lhiettrimmyssyn argidoil orroo, agh dy vel dy chooilley coarys slaynt as kiarail y theay cur-rish shen yn sorch cheddin dy lhiettrimmyssyn, cha nee ynrican preayssyn bentyn da'n vun-troggalys as bun-argid, agh neesht ny preayssyn er leeideilys.
Ta Bnr Pinch gra nagh vel Kiarail Vannin goaill aggle roish cur freggyrt da feyshtyn, feyshtyn doillee, as dy vel ad ard-viandagh myr sheshaght. T'ee gra dy vel ad cur enn er dy vel caghlaa dy kinjagh doillee, as bentyn da aase, nagh vod ad jannoo dy chooilley red ta dy chooilley pheiagh geearree ec yn traa t'ad dy gheearree, as dy vel Kiarail Vannin foshlit da goll er cremmey, son shickyrys. Agh t'ee gra nagh vel eh kiart dy vel shen persoonagh, shegin da ve mychione yn er profeshoonagh as yn cheshaght.
---oooOooo---
Ta Slaynt y Theay gra dy vel doghan laue, cass as beeal goll mygeayrt Mannin ec y traa t'ayn. She doghan cadjin eh ta jannoo dy cadjin er paitchyn ny saa na jeih bleeaney dy eash, ga dy vel eh jannoo er sleih aasit neesht ny keayrtyn. 'Syn aght cadjin t'eh cheet dy ve ny share er-e-hon hene lurg eddyr shiaght ny jeih laghyn.
Ta Theresa Thornton ny boandyr coadey slaynt, as t'ee gra dy vel ny monnaghyn toshee jeh doghan laue, cass as beeal goaill stiagh as foddee dy vel sleih cur geill daue, t'ad ard tempreilys as scoarnagh ghonnagh, as geiyrt er shen laa ny ghaa ny s'anmee spuitt er ny laueyn as cassyn, ny keayrtyn 'sy vlean, as mammyn 'sy veeal cheet dy ve ayn. T'ee gra dy cadjin dy vel eh cheet dy ve ny share jeh e yioin hene ayns mysh shiaght gys jeih laa. T'ee gra, my vees paitchey cheet dy ve asslaynt, lhisagh eh tannaghtyn sthie, mooie veih'n scoill ny brastyl oikanagh derrey vees ad gennaghtyn ny share. T'ee gra foddee dy jean bee as joughyn feayrey as bee bog cooney lesh ny monnaghyn.
Myr shoh lhig dooin jeeaghyn er ny monnaghyn shen reesht, as foddee ny monnaghyn toshee goaill stiagh :
• scoarnagh ghonnagh;
• ard tempreilys; as
• ve gyn mian dy ghoaill bee.
Ta'n nah cheim dy cadjin goaill toshiaght laa ny ghaa ny s'anmee as foddee eh goaill stiagh :
• mammyn 'sy veeal, oddys ve piandagh;
• bruan dy spuitt ny hassoo magh er ny laueyn as ny cassyn, as ny keayrtyn ayns ard y vlean as y toyn.
Foddee yn bruan dy spuitt jeeaghyn jiarg-bane, ny jiarg, ny ny s'dorraghey na'n chrackan mygeayrt-y-moo, ny lhie er daah yn chrackan t'ec sleih. Foddee ny spuitt cheet dy ve nyn molgan, vees foddee lheeah ny ny s'gilley na'n crackan mygeayrt-y-moo, as foddee ad ve piandagh.
Cha nel stoo noi-vea-agh ny medshin elley dy chur chouyr da, agh dy yannoo ny sloo ny monnaghyn lhisagh sleih :
• giu fliughidyn feayrey dy veeinaghey y beeal as dy chur shaghey jee-ushtaghey, agh gyn giu joughyn geyre, gollrish soo mess);
• gee bee bog gollrish yoghurt as shaghney bee chey, sollanagh, spiosagh erbee;
• goaill paracetamol ny ibuprofen dy chooney dy veeinaghey beeal ny scoarnagh gonnagh.
Foddee sleih shirrey coyrle veih potecaree neesht er aghtyn dy chiunaghey, jeh'n lheid as gelyn son mammyn 'sy veeal, spreihyn as stoo oonlee y veeal, dy veeinaghey pian. Foddee ad coyrlaghey stooghyn vees cooie da paitchyn.
As ta coyrle elley dy gholl son quaaltys rish fer lhee cadjin mannagh vel ny monnaghyn er hareaghey lurg eddyr shiaght ny jeih laghyn. Lhisagh mraane torragh ta surranse liorish doghan laue, cass as beeal reaghey quaaltys rish fer lhee cadjin neesht. Foddee y doghan shoh ve skeaylt magh gys sleih elley, as ta'n coyrle dy chur eam er lheelann yn er lhee cadjin roish my vees sleih goll, as foddee dy jean ad cur coyrle liorish chellvane.
---oooOooo---
Hed Cohaglym Reiltys Ellan Vannin er cummal 'sy Thie Aaght Comis laa ny vairagh, Jemayrt yn 17 Mean Fouyir veih anjeeal ec 8.00am as feiy'n laa gys 5pm, as Jecrean yn 18 Mean Fouyir Jemayrt, goaill toshiaght lesh anjeeal ec 8.00am as goll feiy'n laa gys 4.30pm Jecrean.
Laa ny vairagh eddyr 11.00am as 1pm bee seshoonyn cochianglt rish cochianglyssyn ashoonagh er y vooir as 'syn aer. Dy mennick ta cumrail er ve er turryssyn as shirveishyn scryssit magh dy bollagh, ec y phurt aer as er y cheayn, as er yn Ellan lesh ny barrooseyn, myr honnick shin ec jerrey yn shiaghtin shoh chaie, gyn fys er yn oyr ry gheddyn veih Bus Vannin er-lhimmey jeh gra dy row 'doilleeidyn lesh obbraghey ad'.
Neayr's shen ta Bus Vannin er n'ghoaill rish dy row doilleeid er coonty gennid dy obbreeyn, lesh kuse dy startaghyn follym ayn, as paart dy leih assaaragh rish traa liauyr. Er y gherrid cha dod Bus Vannin cooilleeney 23 shirveish, agh dy row shen earroo sloo na'n earroo jeu v'ad gra hoshiaght dy ve ayns gaue.
Ta Bus Vannin gra dy vel y doilleeid ny lhie er immanee ve arryltagh dy obbraghey ooryn elley harrish yn shayll oc, as er-lheh ec ny king shiaghtin. V'ad gra er y gherrid nagh daink eh lesh geddyn immanee dy liooar dy chooilleeney ny shirveishyn. Ta reih ec immanee cooilleeney ooryn elley, as ta ymmodee imanee er reayll rish cooilleeney shen dy yannoo shirveish ayns ny shiaghteeyn jeieanagh. Agh ta feme er freayll ooryn jeant liorish imanee cheusthie jeh caglieeyn laaoil as shiaghtinoil son oyryn sauchys.
Ta Bus Vannin gra, rere conaantyn t'ayn nish, foddee eh ve ny sloo na 24 oor roish my vees shirveish skedjalit dy vel eh cheet dy ve baghtal vel caa dy chooilleeney ee ny dyn. T'eh gra dy vel troddan fo raad dy chur faill da jeih immanagh lane-hraa, dy gheddyn ny 92 immanagh t'eh feme.
Agh chammah's doilleeid lesh ny barrooseyn, ta sleih fakin turryssyn etlagh as baatey scryssit magh neesht. Ta'n theay as shiartanse dy pholitickeyryn er jeet dy ve tarmestit lesh y neu-hickyrys ass shoh. Ta Oltey yn Chiare as Feed son Connaghyn, Julie Edge, gra dy nee baghtal eh dy vel doilleeidyn strateishagh mooarey ayn, as dy vel shoh jeh scansh ashoonagh, cochianglys yn Ellan ain, as shinyn ooilley cummaltee jeh Ellan. T'ee gra dy vel ee er vaghey ayns shoh ooilley ny laghyn eck, as nagh row rieau fys eck er lheid y voirey, vel shen lesh ny baatyn ain, lesh y phurt aer, ny son shickyrys lesh yn arraghey ynnydoil ain, myr shoh er-lhee dy lhisagh eh jannoo seose tosheeaght son ny cumraagyn eck. T'ee gra dy vel ee er chur eam er earroo jeu, as dy vel paart jeu er chur freggyrt jee, as ny mast'oc e cumraag ayns Connaghyn, shen dy ghra Rob Callister, er n'ghra dy jinnagh eh pohlldal eh my vees shin dy gheddyn yn eiyrtys kiart. T'ee gra dy vel shen ny t'ad ooilley shirrey, yn eiyrtys kiart, raad strateishagh, as barrantoilid, son ny cochianglyssyn ain, ersooyl veih as ayns yn Ellan.
Ta Bnr Edge gra dy by chronnal eh dy vel builley feer vooar ass shoh er ny thieyn dellal ain, er y tarmaynys as er tarmaynys ain bentyn da keayrtee neesht, myr shoh t'eh paart jeh'n chlaare jeh chaglym y Reiltys as dy vel eh gra dy hareaghey cochianglyssyn traaght yn Ellan ain ta lane scanshoil son yn lhiassaghey tarmaynagh as sheshoil ain, as dy jean daa Hirveishagh, son yn Rheynn Bun-troggalys as yn Rheynn Gastid Dellal taishbyney er ard-vianyn strateishagh yn Ellan. Agh t'ee gra dy vel ny smoo na ard-vianyn ain, agh dy vel feme ain er barrantoilid, dy vel feme ain er shirveishyn shoh, as dy vel feme ain er cooid gys Ellan Vannin, son ny thieyn dellal ain, son ooilley y phobble ain, as son peiagh erbee ta jeeaghyn er cheet gys yn Ellan.
Ta Bnr Edge gra dy vel ee gennaghtyn dy lhisagh yn Ard Shirveishagh ve loayrt mychione shoh as lhiggey da'n theay goaill ersooyl shiartanse jeh ny imneaghyn shoh, mannagh vel ad nyn imneaghyn, cha nee fuirraghtyn er cohaglym dy ghra dy ve gra shen. T'ee gra dy lhisagh yn Ard Shirveishagh ain ve leeideil yn Ellan, as ve loayrt magh as aa-hickyraghey y theay, aa-hickyraghey thieyn dellal, dy chur barrant 'syn Ellan ain, dy vel shin ayns shoh, dy vel shin goaill kiarail jeh'n phobble ain, as dy vel shin foshlit son dellal, as t'ee gra nagh vel ee fakin shen. T'ee gra dy vel fys eck nish dy row Mnr Cannan ersooyl 'sy Reeriaght Unnaneysit loayrt mychione traght eddyr-ashoonagh, agh by vie lhee loayrt mychione y traght ain ayns shoh 'syn Ellan.
---oooOooo---
Mastey ny cooishyn bentyn da cochianglyssyn, shen y Stashoon Marrey noa ayns Leyrphoyl. Ta'n Rheynn Bun-troggalys er nobbal dy hoilshaghey magh ny ta feme er charraghey 'sy troggal noa. T'eh gra dy jinnagh clou rolley dy foutyn cur ayns gaue ny ta'n Rheynn goaill ayns laue ec y traa t'ayn bentyn da'n chooish. T'eh gra dy vel feme er coadey ny cooishyn traghtee oc er yn oyr dy vel shoh jannoo seose cooish vees foast goll.
Haink shoh myr freggyrt da aghin rere seyrsnys fysseree. Ta'n Rheynn gra neesht nagh vod eh feddyn fys bentyn da'n earroo dy cheayrtyn nagh row y droghad entreilys son troailtee ry gheddyn as ny oyryn nagh row ee.
Nee'n Manninagh cummal prowalyssyn lesh y vurt ayns Leyrphoyl veih jerrey y vee shoh. Ta'n Colught Paggad Bree gra dy jean y lhong goll stiagh purt chirrym myr ayrn jeh cummal seose eh 'syn aght cadjin, chammah's dy charraghey jeeill va jeant da ayns drogh-haghyrt tra v'eh cheet stiagh ayns Heysham y vee shoh chaie. Ta'n Colught gra dy vel ny prowalyssyn anneydagh as dy vel ad jannoo shickyr sauchys ooilley ny troailtee as y skimmee.
Nee Ben-my-Chree cooilleeney ooilley ny shirveishyn veagh jeant ec Manninagh veih 8pm, 29 Mean Fouyir. Ta date son prowalyssyn Ben-my-Chree 'sy Stashoon Marrey noa foast dy ve reaghit, agh er yn oyr dy vel ad gra dy vel cummey cullee voaral as yrjid ardane jerrey Ben-my-Chree cosoylley rish shen ec y Vanninagh, t'ad jerkal nagh bee agh femer er ny prowalyssyn sloo, my vees eh cheet lhieusyn ec y Vanninagh.
Ta Stiureyder Reiree y Cholught, Brian Thomson, gra dy vel sauchys ard-tosheeaght y cholught, as dy vel eh currit da cummal seose ny stundayrtyn syrjey son ooilley ny siyn oc. T'eh gra, liorish cooilleeney saaseyn dy chummal seose dy reiltagh, dy vel y colught jannoo shickyr dy vel Manninagh gobbraghey dy fondagh as dy sauchey, as er lheh ayns jannoo aarloo son toshiaght ny shirveishyn noa echey gys Leyrphoyl. T'eh gra dy vel y colught jeant booiagh dy vod eh cooilleeney prowalyssyn lesh y vurt ayns Leyrphoyl, as dy vel eh jeeaghyn roish da'n Vanninagh goaill toshiaght er yn shirveish echey da'n valley ard y chied cheayrt.
---oooOooo---
Ta'n colught Crogga jannoo faaishnys dy vod £5.3 billioon cheet stiagh gys yn Ellan my vees magher gass mooie veih Kione Vaghal er ny lhiassaghey. Ta data veih towshan seismagh daa-howshanagh 'sy vlein 1996 gooley dy vel y magher cummal mysh un trillioon trie kioobagh jeh gass dooghyssagh, vees jannoo seose mysh un quadrillioon unnid-hiass Goaldagh.
Ta'n colught er chlou y faaishnys shoh er yn oyr dy vel eh jerkal rish feysht Tinvaal scruit ec Oltey yn Chiare as Feed son Connaghyn, Bnr Edge. T'ee briaght jeh'n Ard Shirveishagh mychione y cheet stiagh jerkit veih kied ec y traa t'ayn bentyn da grunt ny marrey; pooar veih'n gheay mooie veih'n choose; as gass as ooill mooie veih'n choose; as bee sessyn jeh'n vuilley tarmaynagh jeh ny coardailyssyn er cur kied as jeh faaishnyssyn shoh clouit son ny bleeantyn gys 2035.
Ec y traa t'ayn ta'n Rheynn Bun-troggalys jeeaghyn er yeearree liorish Crogga son caghlaa da'n chied echey, dy lhiggey da'n cholught tarrarey chibbyr phrowalagh roish my vees eh cooilleeney towshanyn seismagh three-towshanagh. Agh dy harrarrey y chibbyr phrowalagh, ta Crogga gooley dy beagh feme er cosney £32.5 millioon punt, lesh yn jerkalys echey dy jig yn trass ayrn jeh'n sym shoh cheet veih cummaltee Vannin.
Nurree va feme er Crogga cur argid back da sleih v'er vaih argid ayn, er yn oyr nagh row reillyn ec yn Reiltys bentyn da tarrarey.
Choud's ta shiartanse dy leih gra dy lhisagh gass dooghyssagh ve faagit fo halloo, ta Ard Sheckter Crogga, Richard Hubbard, gra dy jean y magher gass cooilleeney paart jarrooagh as scanshoil ayns goll harrish gys net-zero.
---oooOooo---
Yn kione-shiaghtin shoh chaie, shen va'n traa v'eh reaghit hoshiaght dy chummal Feailley Bee as Jough Ellan Vannin ayns garaghyn y Villa Marina, myr t'er ve ayn rish kuse dy vleeantyn. Agh haink eh magh Mean Souree dy ren yn Rheynn Chymmyltaght, Bee as Eirinys er reaghey dy scryssey magh yn Eailley mleeaney. Va'n Rheynn gra dy row caa da troareyderyn as jeantee bee dy ghoaill ayrn ayns ynnyd jeh shen ayns Show Eirinys Ard y Jiass as ayns Show Reeoil Vannin yn Eirinys, agh haink eh magh nagh vod dy chooilley er jeu goaill ayrn er yn oyr dy row conaantyn er-lheh ec bingyn ny showyn rish shiartanse dy cholughtyn, nagh vod troareyderyn ny jeantee bee jeh'n sorch cheddin goaill ayrn.
Ta'n Shirveishagh Chymmyltaght, Bee as Eirinys, Clare Barber, goaill rish, jeeaghyn back er y chooish, dy row lheamyssyn ayn tra hug ad eab er jannoo ymmyd jeh taghyrtyn reaghit ec sheshaghtyn preevaadjagh ayns ynnyd jeh'n Eailley va reaghit ec yn Reiltys hene.
Ta Bnr Barber gra dy row ad smooinaghtyn, mleeaney, lesh yn daa show eirinagh ayns ynnyd jeh'n un Eailley, dy beagh shen jannoo ny smoo, agh ayns rieughid 'sy traa sodjey dy vel red ennagh elley foddee ad chebbal. T'ee gra dy vel ad geearree red ennagh foddee dy jarroo goaill stiagh earroo dy chaghlaayn troareyder, as t'ee gra dy row seshoon ec y Rheynn lesh kuse jeh ny troareyderyn lurg yn show, jus dy loayrt mychione raad ta ny caaghyn nyn lhie, raad ta ny doolaneyn ayn, raad ta reddyn as feme er yn Rheynn jannoo ad beggan ny smoo. T'ee gra dy row fer jeh ny chaghteraghtyn mooarey haink magh ass, shen ayns rieughid dy row feme ec yn Rheynn gobbraghey ny s'chenney rish yn Rheynn Gastid Dellal.
Ta Bnr Barber gra, ec y traa t'ayn dy vel sleih gobbraghey rish yn Rheynn Chymmyltaght, Bee as Eirinys, my vees ad gobbraghey 'syn Ellan, as my vees ad cur ersooyl cooid t'ad scughey gys yn Rheynn Gastid Dellal, as ayns rieughid dy vel shen gennaghtyn dy vel eh ro scarrit ayns daa ayrn, as dy vel feme ain er red ennagh vees smoo lhoobagh. T'ee gra dy vel shen dy mooar red ennagh by vie lesh yn Rheynn goaill ayns laue ayns lhiassaghey yn strane dy haglymyn ta'n Rheynn geearree cummal. T'ee gra dy vel yn chied er vees ry heet, shen dy heet quail y troareyder yn 23 jeh'n vee shoh, as vees caa da paart jeh'n sleih shen nagh vel eh er jeet lhieu cosney stiagh foddee ayns ny shappyn, dy gholl as dy loayrt rish sleih elley, vel ad nyn stiurey thieyn bee, ny nyn myn-chreckeyderyn beggey, ny kuse jeh ny myn-chreckeyderyn smoo ain, dy yeeaghyn ayns rieughid vel caa dauesyn dy chur stiagh y troar oc.
Bentyn da'n reaghys dy scryssey magh yn Eailley Bee as Jough mleeaney, ta Bnr Barber gra dy vel arrys eck nagh ren yn Rheynn cur magh fys da sleih ny s'moghey dy chur daue reih elley. Agh er-lhee nagh row yn Rheynn hene ayns stayd dy livrey shen mleeaney, as dy row doolaneyn mooarey ayn, as dy ren ad loayrt mychione ny gaueyn v'ayn, as daa vlein oc tra v'eh bunnys orroo scryssey magh ee, as dy row reihyn elley er ve currit stiagh ayn son y vlein shoh.
Ta Bnr Barber gra, tra ta'n Rheynn jannoo ymmyd jeh taghyrt nagh vel eh stiurey, dy bee dy kinjagh reddyn ayn as cummys oc dy chur doolane fo'n Rheynn bentyn da'n ablid echey dy hebbal bwaane agh nagh row ry gheddyn ec dy chooilley pheiagh. T'ee gra, veih cheu yn Rheynn, dy row eh cur doolane anaasagh fo, as fer va'n Rheynn cur geill da trooid bargane soiagh lesh y Show Reeoil son yn thalloo, as, myr v'ee gra as er n'yannoo recortys jeh, dy vel arrys eck dy ren yn Rheynn cur shaghey ny coloayrtyssyn oc derrey ro anmagh, as dy jarroo dy ren ad cur sleih ayns staydyn as ayndaue nagh lhisagh ad er chur ad.
Ta Bnr Barber gra dy beagh yn vondeish jeh show ve ayn vees reaghit ec yn Rheynn hene, nagh beagh y doolane shen fo, er yn oyr nagh beagh stayd oc, ayn veagh un troareyder nagh row lowit dy ve ayns shen. Agh er-lhee dy vel caaghyn ayn dy reaghey taghyrtyn elley, as ronsaghey yn aght foddee ad jeeaghyn dy ve, foddee ayns parteays lesh sleih, foddee ve goshtiu da ny pohlldal taghyrtyn elley, agh lesh conaant bentyn da stayd yn Rheynn myr goshtiu nagh vel fer er-lheh lowit as fir elley faagit mooie. Agh t'ee gra nagh vel shen dy ghra nagh vel shen yn red kiart son yn Show Reeoil, na eer Show Ard y Jiass, ny Show erbee elley dy yannoo shen; shen 'sy reaghys oc hene, as dy vel ee dy bollagh soaighey jeh'n cair oc dy yannoo shen, agh dy vel eh beggan neu-chasley rish shen my vees yn Rheynn Chymmyltaght, Bee as Eirinys ny'n Reiltys ayns aght s'lhea reaghey dy chummal taghyrt.
---oooOooo---
Y chiaghtin shoh chaie ren Barrantee Balleychashtal cur tuarastyl mychione aile ayns premmeeyn theayagh 'sy valley as aile elley ayns Pairk Poulsom er y gherrid. Ta oaseir son sauchys aile da Shirveish Mooghey as Sauail Ellan Vannin, David Dallimore, gra, ayns yn chooid smoo dy chooisyn, nagh vel sleih aegey toiggal ny gaueyn cochianglt rish foaddey aileyn. T'eh gra dy nee cronnal eh dy vel earroo smoo dy chooishyn ayns laghyn seyrey ny scoillyn. Dinsh eh da Radio Vannin dy vel skeim er ve currit er bun dy chooney dy chur paitchyn veih foaddey aileyn.
Ta Mnr Dallimore gra, dy mennick, dy vod shoh taghyrt er coontey fyssyraght, ny tra t'ad cur eab er jannoo gastey lesh caarjyn ny lesh sleih roie mygeayrt, ny foddee eh ve ny s'diuney shen, cochianglt rish trauma ny corree, myr shoh ayns rieughid t'eh ny lhie er ymmodee reddyn elley. T'eh gra dy vel y paart ec oaseir sauchys aile ayns cheet stiagh er shoh, shen ynsagh er sauchys aile as jeeaghyn er ny eiyrtyssyn jeh ny vees jeant. T'eh gra nagh vel ad cheet dy ve cochianglt rish fer erbee jeh ny ardyn psychooaylleeagh gollrish cur coyrle ny reddyn gollrish shen.
Ta Mnr Dallimore gra dy mennick dy vel fyssyraght ec sleih aegey, ny dy vel ad geearree cur cheb er feddyn magh reddyn, ny dy vel ad cloie lesh reddyn gyn toiggal y clane cummys jeu jeh ny eiyrtyssyn foddee taghyrt. T'eh gra hoshiaght dy vel ad jeeaghyn er ynsagh er sauchys aile, dy vel ad jeeaghyn er aile, as ny t'eh, as yn aght ghow eh toshiaght; yn aght ta shin jannoo ymmyd jeh aile, er yn oyr dy vod aile ve mie chammah's sie, as dy vel ad loayrt mychione shen, as dy vel ad loayrt mychione ny gaueyn neesht as ny eiyrtyssyn jeh ny vees jeant, er yn oyr, er-lesh, dy mennick dy vel sleih aegey jannoo reddyn gyn toiggal cre cho mooar oddys y ve ny eiyrtyssyn shen, cha nee ynrican veih ny ta'n aile jannoo as yn assee da sleih, agh ny eiyrtyssyn daueseyn hene myr fir er-lheh neesht.
Ta Mnr Dallimore gra dy vel cummys dy kinjagh ec aile dy yannoo jeeill mooar, as dy vel eh credjal, yn chooid smoo dy cheayrtyn, tra ta sleih foaddey ny sorchyn shoh dy aileyn beggey, nagh vel ad credjal dy jean monney taghyrt, agh dy vel ny ta shennaghys er hoilshaghey magh 'sy traa t'er n'gholl shaghey, shen dy vod eiyrtyssyn atchimagh cheet veih aile. T'eh gra, my vees aile cheet dy ve ass smaght, dy vel yn cummys echey dy yannoo jeeill trome ny dy varroo sleih. T'eh gra, myr shoh, dy vel y cummys ayn dy kinjagh, as nagh vel eh red ennagh lhisagh sleih aegey cloie lesh.
Ta Mnr Dallimore gra dy jinnagh eh coyrlaghey paarantyn ny coadeyderyn paitchey as kiareyderyn dy yeeaghyn magh son paart dy chowraghyn, dy vel ad goaill toshiaght er goll dy yeeaghyn er aile as fyssyraght oc mychione aile, my vees ad feddyn magh dy vel tuill loshtit 'sy vrat laare oc, as cronnyn lostit er cooid hie, pabyr lieh-lostit erbee ayns meillaghyn deayrtal ny coir hrustyr, ny my vees ad follaghey foaddeyderyn ny foaddanyn, foddee dy vel shen fo nyn lhiabbeeyn ny ayns cuppartyn. T'eh gra my vees paarantyn fakin aileyn gyn oyr er nyn son ayns ny thieyn oc, eisht dy vel shen cowraghyn dy yeeaghyn magh er-nyn-son, foddee dy vel y paitchey oc cleaynit ec aile.
Ta Mnr Dallimore gra my vees paarantyn ny coadeyderyn smooinaghtyn dy vel paitchey foaddey aileyn, dy vel shiartanse dy reddyn bunnidagh oddys ve jeant oc: shen dy yannoo shickyr dy vel foaddeyderyn, foaddanyn as reddyn gollrish shen ass roshtynys y phaitchey; gyn faagail paitchyn nyn lomarcan 'sy thie, eer my vees eh son traa giare; dy yeeaghyn magh son foaddeyderyn ny foaddanyn ayns y shamyr lhiabbagh oc, ayns ny poagaghyn scoill, ny red erbee gollrish shen, as my vees, dy ghoaill ersooyl ad. T'eh gra dy vel ny oaseiryn sauchys aile dy cadjin gobbraghey rish shirveishyn elley, agh dy vel ad er nobbraghey rish paarantyn roish nish, as my vees imnea ec sleih dy vel ad maynrey dy gholl dy livrey y saase oc dy heet stiagh er y chooish, dy vel eh ayns shen dy chooney lhieu, dy vel eh saase t'oc, as dy vel eh foshlit da dy chooilley pheiagh.
---oooOooo---
Ta kied phlannal er ve currit da'n cholught Dandara dy hroggal 92 hie ayns Purt ny Hinshey er thalloo liorish Coorse Golf Purt ny Hinshey, Ughtagh Glionfaba as Thie Boandyrys Reayrt y Chashtal. Ayns chaglym y ving phlannal jiu, va ny plannyn currit roish olteynyn reesht, lurg daue ve currit ry lhiattee choud's va keayrt reaghit da'n ynnyd ny s'moghey 'sy vee shoh.
Shoh y nah cheim jeh plannyn y cholught Dandara, as t'eh goaill stiagh mestey jeh thieyn as daa hamyr lhiabbagh oc, as three, kiare as queig shamyryn lhiabbagh. Bee 23 thie 'sy vrastyl jeh ve ry ordrail.
Ta kied er ve currit, ny lhie er coardail rere yn leigh. Ren three olteynyn y ving votal ayns foayr jeh ny plannyn, agh ren daa oltey votal noi oc.
---oooOooo---
Ta Barrantee Balleychashtal shirrey conaanteyder dy hroggal y nah cheim jeh lhiassaghey Cronk y Schoill. Ta'n lught-reill ynnydoil er chur kione er yn chied cheim, lesh 40 thie; 'sy nah cheim bee 48 thie; as 'sy trass cheim hig 45 thie elley. T'ad treishteil dy bee'n obbyr elley fo raad liorish Mee Averil 2025, as nagh bee ny sodjey na daa vlein ceaut er cur kione er.
Jeh ny 133 thie, bee 39 jeu creckit dy preevaadjagh; as hig 94 thie dy yannoo seose ayrn jeh sthock thieys y lught-reill ynnydoil.
---oooOooo---
Bee'n costys jeh obbraghyn dy chroo raad entreilys da'n Thie Cruinn, va troggit son Barrantee Braddan, £230,000. Va'n costys shen er ny hoilshaghey magh liorish ny Barrantee ayns chaglym Jerdein yn 12 Mean Fouyir. Lurg da'n Voayrd geddyn coardail da cur harrish y thalloo daue son y raad ec y chaglym oc Mee Luanistyn, hooar y Boayrd fogrey mychione y chostys as obbyr dy chur stiagh sornaigyn vees femoil. Ta £15,000 er ve currit ec ny Barrantee son shen.
Roish y Voayrd neesht va memorandum mychione cur er bun crossag coshee beayn harrish Raad Braddan. Ta soilshaghyn traaght shallidagh ayn dy ve biallagh da reillyn plannal, as ren y Barrantagh John Quaye gaccan dy row ad ayns boayl neu-cheeaylagh. Cooish elley cochianglt rish shoh, va'n cleragh gra nagh vel yn Reiltys as lughtyn-reill ynnydoil lowit dy ve ny pharteays da memorandum dy choardail, as myr shoh dy row mooarane jeh'n docamaid follym. Agh dooyrt yn Caairlagh, Andrew Jessop, dy vel Barrantee Braddan geeck £750 'sy chiaghtin son ny soilshaghyn ec y traa t'ayn, as dy lhisagh enmyn ve currit da'n choardail.
