Meeryn ass Traa dy Liooar, Jelune 23ss Mean Fouyir 2024 (goaill stiagh kuse jeu as nagh row traa dy liooar dy lhaih magh ad)
Choud's ta shin goll trooid ny cooishyn ain fastyr jiu, bee paart jeu haink magh ass co-haglym y Reiltys rish daa laa, Jemayrt as Jecrean shoh chaie, tra va mysh 500 dy leih kionefenish. Ren y Reiltys tayrn y vreid jeh Strateishyn as plannyn elley, vees goaill stiagh kiarail dy spaarail £10 millioon punt 'sy cherroo theayagh as cur er bun Boayrd Oltaghey noa.
Agh er-lesh Oltey yn Chiare as Feed son Rushen, yn Dr Michelle Haywood, nagh vel eh kiart son yn Reiltys dy ograghey magh reddyn gollrish shoh ayns co-haglym theayagh, gyn hoshiaght fograghey magh ad roish Tinvaal.
Ta'n Dr Haywood gra dy vod ee fakin fer jeh ny streeuaghyn ta Coonceil ny Shirveishee er chroo er-e-hon hene, liorish cummal co-haglym, dy vel ad geearree fograghey magh reddyn, dy vel ad geearree ve abyl dy insh da sleih ny t'ad dy yannoo bentyn da ny polaseeyn as ny strateishyn ta caghlaa, agh er-lhee ny vees jeant liorish shen, dy vel eh bunnys shaghney yn oardagh Tinvaal, raad ta sleih jerkal rish ny cooishyn shen dy ve cheet roish yn ard whaiyl dy ve loayrit mychione as resoonit magh. T'ee gra dy row seshoon dy chur fys rolaue jea – as v'ee loayrt mychione Jelune yn 16 Mean Fouyir, myr shoh yn laa roish chied laa y cho-haglym – T'ee gra dy row seshoon dy chur fys rolaue liorish yn Ard Shirveishagh, Alfred Cannan, mychione cre gollrish veagh y goan toshee echey, as dy row ad booisal son shen, as ren eh coardail rish rheynn orroo y teks jeh shen.
Ny yeih shen, ta'n Dr Haywood gra dy row eh baghtal dy beagh fograghyn jeant ayns daa laa y cho-haglym, as dy vel imnea eck dy vel eh jeeaghyn dy vel ad shaghney Tinvaal beggan, as traa y cho-haglym, tra cha nel yn ard-whaiyl er jeet back veih'n varney eck foast, myr shoh nagh vod feyshtyn ve currit mychione ny cooishyn shen ny doolane currit foue.
Er-lesh yn Dr Haywood dy vel yn co-haglym jannoo seose ayrn scanshoil jeh'n Reiltys, as dy vel Coonceil ny Shirveishee er n'yannoo strateish jeh dy vel eh geearree ve mooie ayns shen as loayrt rish sleih ny smoo, myr shoh dy vaik sleih show raaidey ny shirveishee as reddyn elley, as dy vel shoh eab elley er jannoo shickyr dy vel sleih clashtyn ny ta goll er dy politickagh, as dy neu-aighoil dy vel eh roish my vees Tinvaal er nakin kuse jeh ny reddyn shoh, myr shoh ta beggan dy imnea eck dy vel ad ayns aght jannoo stoyr jeh ny naightyn mie dy chur magh ec y cho-haglym, shaghey jannoo ymmyd jeh ny saaseyn cadjin dy eddyr-insh.
---oooOooo---
As eh loayrt rish Radio Vannin lurg yn cho-haglym, ta'n Ard Shirveishagh, Mnr Cannan, gra dy vel feme er yn Ellan goll er y hoshiaght, er nonney nee eh goll gour y drommey. Va fogrey mychione kiarail dy spaarail £10 millioon punt 'sy cherroo theayagh. Ta Mnr Cannan gra nagh mie lesh y goo, dy ghiarrey shirveishyn. Er-lesh dy vel feme er aa-chummey yn aght ta'n Reiltys livrey shirveishyn, as feme er toiggal vel eh cooie son toyrtys dy jeeragh veih ny tackeyderyn as eeckys son ny ardyn shoh, ny vel ayns rieughid strane dy chummagh elley son kuse jeh ny shirveishyn v'ayn 'sy traa t'er n'gholl shaghey, as foddee dy vod sleih jeeaghyn orroo nagh vel ad lane-femoil
Er-lesh Mnr Cannan dy vel ny vees scanshoil nish, shen dy vel yn Reiltys er chur er bun dean bentyn da fondid, as dy bee currym er ard oaseiryn dy obbraghey er shen, as dy dooghyssagh nee ad livrey yn aght bee shen er ny gheddyn ayns yn 12 vee shoh cheet, ny 'sy nah chlaare argidoil. T'eh gra ny dy by vie leshyn jannoo, shen jannoo ymmyd jeh'n chaa shoh dy gheddyn magh cheusthie jeh'n Reiltys hene, vel caaghyn dy aa-chummey 'sy traa giare bentyn da'n voayl ta shirveishyn goll er livrey, cre ny Rheynnyn ta livrey ad, vel caa daue ve currit cooidjagh ayns boayl elley, bentyn da livrey (a) lesh eiyrtyssyn share er y theay agh (b) bee livreit ayns aght s'breeoiley s'fondee.
Er-lesh Mnr Cannan dy vel yn trass ayrn jeh shoh, shen yn baghtalys shen as oaseirys, mychione yn aght foddee shirveishyn theayagh goll er jannoo smoo bun-earrooagh dy breeoil as dy fondagh, as dy vel mooarane dy ve jeant ayns shoh. Ta ny tosheeaghtyn chelleeragh: smaght argidoil, cur shin hene back gys y raad kiart lesh yn argid ain, as er-lheh bentyn da ceau er kiarail slaynt, as feme orrin toiggal cre gollrish lhisagh ceau er kiarail slaynt jeeaghyn dy ve choud's ta shin goll er y hoshiaght neesht, bentyn da'n aght ta sleih geeck son shen.
Ta Mnr Cannan gra dy vel feme ain er jeeaghyn er shiartanse jeh ny shirveishyn vees goll er livrey, as er-lheh ayns kiarail slaynt, er yn oyr dy vel currym feer eer lhean ec y traa t'ayn, as foddee dy bee feme er paart dy aa-chummey er shen, son shickyrys 'sy traa giare. T'eh gra, cooid elley ny saaseyn dy yannoo fondagh y Reiltys, vel shen dy yannoo ny sloo ardyn cheusthie jeh kuse dy Rheynnyn, as eisht claare dy yannoo ad ny smoo bun-earrooagh neesht, as dy vel feme er troggal magh shen – foddee my vees eh taghyrt ayns paartyn ennagh jeh'n Reiltys, dy vel feme er troggal seose shen gys keim syrjey, dy vod mayd ooilley toiggal dy jeeragh ny ta'n Reiltys baih argid ayn as yn aght nee shen livrey.
Ta Mnr Cannan gra dy vel yn cooish smoo scanshoil, shen dy yannoo bea ny sassey son sleih dy chooilleeney reddyn, as dy eddyr-insh rish y cherroo theayagh, as cha nhegin dooin arragh jarrood dy vel feme er shen fy yerrey ve ny eiyrtys jerrinagh son fer erbee jeh ny claareyn shoh ny troddan son fondid.
Bentyn da Kiarail Vannin, ayns ny goan echey dy osley y co-haglym, dooyrt Mnr Cannan, vel yn sheshaght smooinaghtyn nagh row argid dy liooar currit da 'sy chlaare argidoil ny dyn, dy vel feme er plan chelleeragh dy charraghey y stayd son Kiarail Vannin. T'eh gra dy vel ny coloayrtyssyn shen fo raad, as cho leah's ta coardail er y phlan shen, dy bee fys er currit magh da Tinvaal as da'n cho-voodeeys.
Bentyn da argid theayagh, va Mnr Cannan gra dy jinnagh yn Shirveishagh Tashtee soilshaghey magh y barel echey, agh dy by vie leshyn cowraghey magh da sleih yn laa shen dy beagh oaseirys Coonceil ny Shirveishee er y chlaare argidoil shoh ve ooilley-ghoaillagh as currymagh.
---oooOooo---
Ta'n Shirveishagh Tashtee, yn Fer-lhee Alex Allinson, gra dy vel yn Tashtey lane oney ayns soilshaghey magh da'n theay stayd argidoil y Reiltys. T'eh gra dy vel yn Tashtey foast freayll rick er y chooish, ga dy vel tuarastylyn jeh Rheynnyn ceau rour argid. Myr cheayll shin y cheayrt s'jerree, ta faaishnys er ve jeant dy jean Kiarail Vannin ceau £16.8 millioon punt erskyn y chlaare argidoil echey 'sy vlein argidoil shoh – red ennagh ta'n Ard Shirveishagh, Mnr Cannan, cheet er myr red ennagh nagh vel ry chummal seose er chor erbee.
Bee coontyssyn raiee clouit ayns ny shiaghteeyn shoh cheet dy hoilshaghey ny towseyn dy argid cheet stiagh as goll er ceau. Ta'n Fer-lhee Allinson shassoo er dy vel yn Reiltys ve smoo baghtal na v'eh rieau.
Ta'n Fer-lhee Allinson gra, ny vees goll er jannoo ec yn Tashtey neesht, as t'eh sheiltyn dy vel eh ayns lhing yn eddyr-lhieen tra foddee dy chooilley pheiagh goll er linney as fakin bunnys red erbee, shen dy aa-hickyryagheh sleih dy vel yn Tashtey freayll rick er yn argid, dy vel ad jeeaghyn er dy trome-chooishagh. T'eh gra dy vel eh taghyrt dy vel rour ceaut, as dy vel fys ec yn Tashtey er shen chelleeragh, nagh vel eh fuirraghtyn derrey jerrey ny bleeaney, agh dy vel ad goaill toshiaght er cur-rish chelleeragh, as dy vod ad soilshaghey magh yn aght as yn oyr t'ad dy yannoo shen.
---oooOooo---
Ta'n Lhiass Ard Vaylee Rachael Braidwood er chremmey y stayd nagh row caa jee reaghey deyrrey bentyn da fendeilagh ta fo ghaue er yn oyr nagh row boayl erbee er-e-hon dy vaghey. Jemayrt shoh chaie, yn 17 Mean Fouyir, va dooinney 28 blein dy eash roish quaiyl y Lhiass Ard Vaylee as cassid jeant er dy row shey loght jeant echey, goaill stiagh brishey stiagh ayns thie, va nhee mee-lowit echey as ren eh jeeill da shellooderys. Va Bnr Braidwood gra dy row ee geearree cur oardyr er-e-hon dy ve er prowalys, agh nagh row ee arryltagh dy yannoo shen mannagh row aaght erbee ec y fendeilagh dy vaghey ayn. Dooyrt ee nagh row ee son cur magh eh dy failleil.
Va Bnr Braidwood gra dy row y dooinney fo ghaue, as nagh row pryssoon y boayl kiart er-e-hon er chor erbee, as dooyrt ee nagh dod ee toiggal yn oyr nagh row aaght erbee echey dy gholl. Ren ee soilshaghey magh neesht dy row poagey cadlee as paalan chebbit da myr aaght, as v'ee gra nagh row shen ry hoaiaghey jeh er chore erbee.
Ren Bnr Braidwood cur shaghey cur deyrrey choud's va ronsaghtyn elley jeant, as t'ee shirrey oaseir prowalys dy ve kionefenish y nah cheayrt ta'n fendeilagh roish y whaiyl, laa ny vairagh, yn 24 Mean Fouyir.
Ta'n Rheynn Cooishyn Sthie gra dy bee arragh possan beg dy leih nagh vel cooie da'n aaght vees ry gheddyn. T'eh gra dy vel caghlaaghyn reih echey agh nagh vel ymmyd jeant jeu dy chooilley cheayrt er coontey femeyn cramp, as gaueyn as sleih ve fo ghaue. T'eh gra, rere ny criteria, dy vel ymmyd jeant jeh Thie Tromode ny aaght cooie elley vees ry gheddyn trooid Kiarail y Theay. T'eh gra dy vel entreilys neesht da thieyn aaght, spitalyn as sorchyn elley dy aaght ec cummaltee fo ghaue, as shen goaill stiagh adsyn ta goll trooid coarys ny quaiylyn ny myr yn chied cheim lurg daue faagail pryssoon.
Ta'n Rheynn gra dy vel eh gobbraghey dy chionn rish parteayssyn ayns jantyssyn elley dy gheddyn aaght son sleih fo ghaue, agh dy vel yn Rheynn cur enn er dy bee arragh possan beg dy leih ayn as femeyn cramp oc as gaueyn as adsyn fo ghaue, nagh vel ad cooie da'n aaght vees ry gheddyn. T'eh gra dy vel eh ny pharteeays da'n Boayrd er Thieys as Co-voodeeyssyn as dy vel shoh fer jeh ny cooishyn ta'n Boayrd ronsaghey myr ayrn jeh'n strateish bentyn da sleih gyn thie.
---oooOooo---
Ta'n Shirveishagh Cooishyn Sthie, Jane Poole-Wilson, gra foddee dy bee cumrail er polaseeyn noa dy ghoaill ayns laue y builley jeh druggaghyn er coontey gennid dy chouyryn. T'ee gra dy vel eh fo'n Rheynn Cooishyn Sthie dy yannoo aarloo ny treealtyssyn son soie Tinvaal Mee Houney, agh lesh gennid dy chouyryn, foddee nagh bee shen myr t'eh.
Haink toshiaght er aa-scrutaght er ny asseeyn jeant liorish druggaghyn neu-leighoil 'sy vlein 2022, lesh yn Rheynn Cooishyn Sthie cheet quail shirveishee as olteynyn Tinvaal neayr's shen dy reaghey cummey ny bun-eieyn son y pholasee. V'eh skedjalit dy beagh olteynyn Tinvaal resooney magh y chooish 'sy chied raiee jeh'n vlein shoh, agh eisht v'ee currit shaghey gys Mee Averil, roish my row ee currit shaghey reesht gys Mee Houney. Lesh gennid dy chouyryn ayn, ta gaue ayn nagh bee caa da olteynyn resooney magh y chooish Mee Houney noadyr.
Mastey fograghyn yn Reiltys ec y cho-haglym echey yn chiaghtin shoh chaie, v'eh gra, lesh plan noa dy choadey ny share caglieeyn yn Ellan, dy jig eh dy ve ny s'doillee as ny s'gaueagh son sleih dy heet gys yn Ellan son oyrnyn kimmeeys. Va Strateish Shickyraghey Nyn Ellan lhunnit yn shiaghtin shoh chaie ayns chaglym y Reiltys v'ayn rish daa laa.
Rere yn Strateish, bee tooilley scrutaght jeant jeh etleeyn preevaadjagh, jeh chymsaghey fysseree mychione sleih ta cheet stiagh ayn as ta faagail, as ymmyd jeant jeh chagnoaylleeaght vees cur enn dy hautomatagh er claareyn earroo.
Ta Bnr Poole-Wilson gra dy vel feme er jannoo red ennagh dy choadey cummaltee yn Ellan. T'ee gra, lesh yn sorch shen dy chimmeeys trome reaghit, dy mennick hig assee cochianglt rish, as myr shoh cheu-chooylloo jeh ny ard-linnaghyn ta kuse jeh ny soaighyn-er ta ry akin ayns ny pabyryn naight. T'ee gra, ny vees ry lhie cheu-chooylloo jeh shen ta skeeal jeh cur bree bentyn da lhiastynys son druggaghyn trooid saaseyn barbaragh dy liooar. Er-lhee, myr shoh, dy beagh marranys ain dy chredjal nagh vel kuse jeh ny doilleeidyn ta shin fakin ayns buill elley er roshtyn, as nagh jean ad freayll rish roshtyn y dorrys ain.
Hed slattys dy chur kied da ny meoiryn shee dy yannoo ymmyd jeh greienyn son cur enn automatagh er claareyn earroo roish Tinvaal liorish jerrey 2024. Ta'n Rheynn gra dy jean eh neesht cur billey roish yn Chiare as Feed liorish jerrey Jerrey Geuree 'sy vlein shoh cheet dy chur kied da ny meoiryn shee dy yannoo ymmyd jeh stoo bog vees cur enn er eddinyn.
Ta Bnr Poole-Wilson gra, my vees peiagh ennagh troailt dys shoh, as ta enn currit orroo 'syn aght shen, dy vel ny jantyssyn ain cur bree da'n leigh abyl dy tappee dy chur freggyrt da shen. T'ee gra nagh vel ny data shen goll er freayll dy beayn, dy vel eh caa automatagh ec yn shallid shen ayns traa dy chur fys dy bieau dy vod mayd jannoo red ennagh er coontey jeh. T'ee gra dy vel eh ass yn ymmyd keeayllagh shen, ymmyd resoonagh, jeh chagnoaylleeaght dy vel shin abyl dy yannoo ny smoo eer lesh y chouyr t'ain hannah.
---oooOooo---
Ta Stiureyder Phurt Aer Runnysvie, vees er chee faagail y startey shen, Gary Cobb, gra dy vel doilleeid ec Reiltys Ellan Vannin cummal reilleyderyn traaght aer, as t'eh gra dy vel mooarane neu-vaynrys mastey y wirran t'ayn nish. T'eh gra dy vel shoh er coontey yn towse dy noidys bentyn daue tra ta cumrail er etleeyn ny ta etleeyn scryssit magh. T'eh greinnaghey sleih dy chummal seose sleih ta traenal son yn obbyr.
Ta Mnr Cobb gra, choud's ta foast doilleeidyn ayn, as dy vel foast obbyr mooar dy liooar oc ry yannoo, ayns rieughid dy vel y jannoo oc 'sy tourey mleeaney er ve foddey ny share na vaik ad nurree, as dy treishteilagh 'sy nah vlein dy jean mayd fakin saaseyn jeh'n sorch cheddin dy hareaghey goll rhymboo, as fy yerrey lesh fwirran as cur jeenid 'sy choarys nagh vel ad arragh smooinaghtyn mychione reillys traaght aer ny cumrailyn reesht.
Ta Mnr Cobb gra, choud's nagh vel prowalys jeeragh dy vel reilleyderyn traaght aer faagail, dy vel fys echey dy vel mee-vaynrys 'sy wirran lesh yn towse dy noidys daue. T'eh gra dy vel ny reilleyderyn traaght aer ain jannoo seose paart jeh keird vees jeant oc, as dy vel dy chooilley pheiagh ta gobbraghey ayns etlagh jannoo mooar jeh ny vees jeant oc. T'eh gra dy vel fys echey nagh vel ny reilleyderyn traaght aer ain nish ginsh da peiagh erbee raad t'ad gobbraghey er yn oyr cho leah's t'ad cheet er dy jean ad geddyn moorane dy liooar dy chaartrey.
Ta Mnr Cobb gra nagh vel eh reillys traaght aer ynrican t'ayn; as gyn aile, gyn shickyrys, gyn obbyr y vagher aer, dy jinnagh y phurt aer dooney. T'eh gra dy vel ny deiney as mraane shoh cheet stiagh ayn dagh laa as dy vel ad jannoo ny smoo na vees jerkit, as dy vel ad shoh yn oyr ta'n phurt aer tannaghtyn foshlit choud as foddee ee. Er-lesh dy vel 75 keayrt ass 92 dy daink eh lhieu goll er erskyn ooryn conaantit, as dy vel ad jannoo dy chooilley red v'ad abyl, myr shoh gyllagh er sleih ta jannoo ny smoo na vees jerkit, jeeaghyn dy ve beggan mee-cheeayllagh ny keayrtyn, dy neu-aighoil. T'eh gra, choud's foddee ny doilleeidyn ve currit ass-lieh sleih, ass-lieh y Reiltys, er-lesh dy vel eh neu-chiart jeeraghey er sleih ta jannoo ooilley yn obbyr creoi er y linney toshee.
Er-lesh Mnr Cobb dy lhisagh sleih cummal seose yn sleih shoh ta gobbraghey 'sy phurt aer, as dy vel eh ny vargey, aynjee foddee sleih faagail as foddee ad goll gys buill elley, dy vod ad jannoo reih lesh ny cassyn oc, as my vees sleih reaghey dy yannoo reih lesh nyn gassyn as dy gholl gys ard ayn t'ad ayns ard-ghoo as er nyn oltaghey, dy beagh eiyrtys feer olk er sleih 'syn Ellan.
---oooOooo---
Ta'n Possan Vannin dy Phohlldal Surransee Kanghyr Keeagh, ren cur argid dy eeck son shamyr chiune son surransee ayns Purt Aer John Lennon Leyrphoyl, gra dy vel aa-hickyrys er jeet nagh jig yn seyraad shen dy ve dooint. Shoh boayl oddys sleih vees troailt veih Mannin gys y Reeriaght Unnaneysit son lheiys goaill fea.
Va imnea er y gherrid dy beagh yn shamyr dooint, agh ta'n Shirveishagh Bun-troggalys, as Oltey yn Chiare as Feed son Glionfaba as Purt ny Hinshey, Tim Crookall, gra dy row coip jeh post-l currit da dy ghra dy vel obbyr troggee er chee goll er jannoo 'syn ynnyd, as myr shen bee feme er scughey gys shamyr elley dy shallidagh, as ny s'anmee dy bee shamyr jeant ny share ry gheddyn son y traa ry heet. Ta'n oaseiryn Purt Aer John Lennon Leyrphoyl gra dy vel ad toiggal scansh as feeuid yn seyraad as dy vel ad currit dy slane dy reayll rish cummal shamyr er-nyn-son as ta feme oc urree.
Ta Julia Stokes jeh Possan Vannin dy Phohlldal Surransee Kanghyr Keeagh gra dy vel Kiarail Vannin cummal seose yn cheshaght ghiastyllagh dy slane, 'naght cheddin as ta'n Rheynn Slaynt as Kiarail y Theay. T'ee gra dy vel whilleen eam veih Olteynyn yn Chiare as Feed as veih dy chooilley horch dy leih. By vie lhee cur booise mooar da sleih dy vel ad pohlldal shoh.
---oooOooo---
Ta troddan noa er ve lhunnit ec jantys yn Rheynn Gastid Dellal, Cur Keayrt er Ellan Vannin, dy chur er y hoshiaght yn Ellan myr boayl son yn turryssid. Ta'n troddan, Ellan Erskyn Cadjinys jannoo seose ayrn jeh eabyn dy chleayney tooilley keayrtee da'n Ellan, as nee eh soilshaghey magh yn aght-baghee 'syn Ellan as taishbyney skeealyn as shennaghys ta cur er yn Ellan ve boayl er-lheh gyn cosoyley dy vaghey ayn, dy obbraghey ayn, dy chloie ayn as dy heet lesh shilley er.
Nee yn troddan taishbyney neesht ny immeeaghtyn rere ny imbaghyn as yn cheeayll chionnit vees ry gheddyn ayns shoh. Ta Ard Sheckter Cur Keayrt er Ellan Vannin, Deborah Heather, gra dy vel cummys feer vooar ayns shoh 'syn Ellan. T'ee gra nagh vel yn Ellan gollrish ny buill shoh as t'eh er sleih reirey y raad elley, ayn ta rour turryssid. T'ee gra dy vel ro veg dy hurryssid ayns shoh, agh dy vod mayd goaill vondeish jeh red ta dooghyssagh gyn lhiggey da cheet gys stayd ayn hig eh dy ghoaill yn feeuid ass shen ta ny cummaltee goaill soylley jeh.
---oooOooo---
Ta'n troddan noa jannoo mooar jeh Ellan Vannin myr Biosphere UNESCO, as lesh yn Ard Shirveishagh, Mnr Cannan, gra dy vel feme er y Reiltys spaarail £10 millioon punt, ta'n Shirveishagh Chymmyltaght, Bee as Eirinys, Bnr Barber, gra nagh beagh ish ayns foayr jeh spaarail paart dy argid liorish geddyn rey rish eabyn dy chummal seose stayd yn Ellan. T'ee gra dy vel shen beg dy liooar, nagh vel eh agh mysh £50,000 'sy vlein.
Er-lesh Bnr Barber dy beagh shen feer ghiare-vriwnyssagh, as dy jarroo, dy row er y gherrid oardagh er ny chummal dy chur faill dy ghoaill kiarail, as dy vel shen goll er ec y traa t'ayn. T'ee gra, jeeaghyn er ny yeearreeyn haink stiagh ayn, dy row yn chooid smoo jeusyn veih sleih as ta paart feer vooar oc cheusthie jeh'n lught dellal, ta toiggal y tarmaynys ain, ta toiggal ny caaghyn, as ta fakin shoh dy jarroo myr caa. T'ee gra dy vel ad gennaghtyn dy vel shoh ayns rieughid red ennagh bentyn da'n chormid shen.
Ta Bnr Barber gra, veih'n cheu eck hene, dy vel ee ayns coardail rish shen, as tra ta'n Rheynn loayrt rish sleih ayns kerroo y turryssid, tra t'eh loayrt rish sleih 'sy cherroo dellal, er-lhee ny keayrtyn dy vel adsyn cur enn er ayns rieughid cre cho ard-scanshoil yn aundyr as ta shoh, as er-lhee nagh vod rour trimmid ve currit er, agh dy chur enn neesht er ny caaghyn ta cheet lesh y churrym. Er-lhee dy vel eh cur eab er cur cooidjagh ooilley ny paartyn shen, jannoo shickyr nagh vel shin jannoo rour, er yn oyr dy vel shin cur enn er dy vel shoh ennym t'er ve currit orrin, as nagh vel shin agh coadeyderyn jeh as nagh vel ish ayns shoh agh rish paart dy hraa.
Ta Bnr Barber loayrt neesht mychione cur enn er, ayns rieughid tra ta sleih veih cheumooie fakin stayd UNESCO currit liorish, vel shen stayd myr eiraght yn theihll ny stayd myr thalloo freillt Biosphere, dy vel scansh mooar jeh shen currit dy kiart er shen, as tra ta sleih cheet dy vel ad greesit mychione shen, as dy vel ad toiggal, foddee ayns aght dy vel shinyn jerkal rish myr red dooghyssagh ny keayrtyn, as er-lhee dy vel shen dy mennick yn aght lesh ymmodee reddyn.
Ta Bnr Barber gra, tra t'ou cheusthie jeh red ennagh dagh laa, dy vel sleih smooinaghtyn dy vel fys oc er dy chooilley red bentyn da'n thie oc, agh ayns rieughid tra ta sleih cur cooidjagh y chengey, y cultoor, y daunse as y kiaull, liorish y dooghys, as ta dooghys breeoil dy liooar ain, as t'ee briaght cre yn boayll elley as ta kirree as kiare eairk oc, ny keayrtyn eer shey eairk, kiyt gyn arbylyn, as sharkee nagh vel gee feill, ooilley mygeayrt ny traieyn as y thalloo ain, as er-lhee dy vel eh cho scanshoil dy yannoo ard eailley jeh shen, as dy vel eh ooilley cheet cooidjagh, son tra ta ny reddyn shen jeant dy kiart, myr v'ee gra ec y toshiaght, dy vel yn tarmaynys cheet liorish.
---oooOooo---
Myr cheayll shin, 'sy cho-haglym echey, ren y Reiltys gra dy bee boayrd noa as yn dean jeh dy ghoaill ayns laue dooilleeidyn vees jannoo er kerroo yn oltaghey, as she bree noa yn Rheynn Gastid Dellal. T'eh gra dy vel deanyn smoo Boayrd Oltaghey Ellan Vannin dy ghreinnaghey sleih dy obbraghey cooidjagh, cur er y hoshiaght yn turryssid cochianglt rish bee as jough, as shirrey aghtyn dy chur-rish ny doolaneyn fo'n cherroo.
Ta fir oayllee er ve pointit veih dy chooilley ayrn y cherroo, goaill stiagh oastanyn, thieyn bee, thieyn oast, shamyryn oast, shappyn son bee dy ghoaill ersooyl as thieyn aaght, lurg da'n Rheynn Gastid Dellal cur cuirrey er sleih dy hoilshaghey magh y sym oc er shoh Jerrey Souree.
She Jamie Lewis ta Caairlagh y Voayrd, as eshyn ny oltey jeh jantys y Rheynn, Dellal Ellan Vannin, as t'eh stiureyder reiree colught 'sy cherroo neesht. Ta ny olteynyn elley -
• Andrew Gibbs (Shamyr Oast as Thie Steag Jaks, as eh chaghter Sheshaght Lught ny Thieyn Oast;
• Enzo Ciappelli (Thie bee Enzo as chaghter Sheshaght Restaurateuryn Ellan Vannin;
• Ken Kneale (Kneale Caglieeit), chaghter son cur kied;
• Robert Cowell (Kerrin Bourne), chaghter Sheshaght Lught-traghtee Ellan Vannin;
• Steven Taylor (Thieyn Oast Okell Caglieeit), oltey jeh Cur Keayrt er Ellan Vannin as chaghter ass-lieh Thieyn Oast Okell;
• Andrea Bartlett (Thie-aaght y Traie, Laksey), Neu-chrogheydagh;
• Jamie Blair (Fraueyn), Neu-chrogheydagh
• Luke Mckeown (Thie Aaght Mannin, Doolish), Neu-chrogheydagh;
• Robin Mowat (Thie Bee y Lhong Chaardee, Purt ny Hinshey as yn Oastan Vibe, Neu-chrogheydagh;
• Rory Dorling (Gelatory), Neu-chrogheydagh
• Sacha Horsthuis (Roar 360), Neu-chrogheydagh; as
• Vicky Quirk (Oastan y Varriaght), Neu-chrogheydagh.
Hig Tim Cowsill, Ard Sheckter Dellal Ellan Vannin, Deborah Heather, Ard Sheckter Cur Keayrt er Ellan Vannin, as Robert Hunter, Leaghteyr coagyragh ayns Colleish Olloo-scoill Ellan Vannin, cheet dy ve olteynyn y voayrd myr olteynyn gyn teih.
Ta'n Shirveishagh Gastid Dellal, Tim Johnston, gra dy vel eh jeant booiagh fakin Oltaghey Ellan Vannin goll er cur er bun, dy yannoo seose coraa unnaneysit son y cherroo. T'eh gra, liorish linney jeeragh rish sleih ta jannoo briwnys trooid ny jantyssyn son yn turryssid as dellal, dy jean y Boayrd shickyr dy vel geill currit da ny doolaneyn er-lheh fo'n cherroo as dy vel ad er nyn n'goaill ayns laue ec y keimyn syrjey.
Ta Mnr Johnston gra dy vel cur er bun y Boayrd shoh er jeet lurg da'n Strateish draghtit er y Tarmaynys Ynnydoil ve clouit, vees cur trimmid er y scansh jeh coraaghyn 'sy jeadys hene ayns cummey y traa ry heet 'sy tarmaynys ynnydoil, vees goaill stiagh y cherroo oltaghey. T'eh gra, chammah's shen dy jean obbyr y Voayrd jannoo seose ayrn lane-scanshoil ayns cummal seose ny vees yn Ellan chebbal 'sy turryssid, as shareaghey keeayll chionnit ny keayrtee as cur er y hoshiaght Ellan Vannin myr boayl breeoil dy gholl. T'eh gra dy vel yn Rheynn jeeaghyn roish gys ny vees yn Boayrd gra ayns stiurey y kerroo dy aase ayns aght vees ry chummal seose.
Ta Caairlagh y Voayrd noa, Jamie Lewis, gra dy vel ad greesit lesh yn towse dy hym va ry gheddyn 'syn oardagh dy phointeil, as dy by vie leshyn cur booise dauesyn ooilley ren shirrey ynnyd 'sy Voayrd. T'eh gra dy vel shoh cowraghey magh keim dy yannoo unnane ny caghlaaghyn coraa cheusthie jeh'n cherroo, veih oastanyn beggey neu-chrogheydagh gys thieyn dellal smoo, as son y chied cheayrt dy chur cooidjagh colughtyn ta jeeghyn chammah's er oltaghey son cummaltee as son keayrtee. T'eh gra liorish cur cooidjagh chaghteryn ard-scanshoil as colughtyn neu-chrogheydagh nagh vel ourys er agh dy jean ad croo undin lajer son aase as son saaseyn noa, chammah's dy lhiassaghey aghtyn-feayslee vees goll er stiurey ec y jeadys hene da doolaneyn ta fo ec y traa t'ayn.
Va chied chaglym y Voayrd noa yn 5 Mean Fouyir, as ren olteyyn reaghey dy chur er bun reesht cohirrey Kaart Bee Manninagh, va er ny chummal son y chied cheayrt ny s'moghey 'sy vlein shoh. Va caa da'n theay ceau teiy son y reih thie dellal ynnydoil oc dy yannoo ard eailley jeh coageyderyn, mesteyderyn jough, tendeilee, troareyderyn, eirinee as kiaraileyderyn 'syn Ellan. Hig y nah chohirrey Toshiaght Arree 2025 lesh caa da colughtyn dy chur stiagh yeearree dy ghoaill ayrn veih Mee Houney mleeaney.
---oooOooo---
Veih'n laa t'ayn jiu, yn 23 Mean Fouyir, bee paart jeh Raad Braddan un troa rish mysh three shiaghteeyn choud's ta eaghtyr noa goll er cur er y raad eddyr Thie Lheiys Noble as cruinnagyn traaght Balley Fletcher. Bee'n traaght goll un troa veih'n ghoal jeh Raad Balley Fletchey gys y thie lheiys. Foddee'n theay goll stiagh 'sy thie lheiys via yn imman smoo, agh tra t'ad cheet magh ass reesht bee feme orroo goll gys yn cheu yesh gys yn Strang. Bee traaght daa hroa eddyr ny cruinnagyn traaght ec y Strang as yn thie lheiys. Bee entreilyssyn elley gys y thie lheiys foast ry ymmydey.
Ec y traa cheddin, bee Raad yn Strang un troa gys Mwyllin Doo Aah veih cruinnag traaght y Strang. Cha bee entreilys son traaght dy gholl seose Raad yn Strang, as bee cowraghyn dy insh da immanee dy gholl y raad via Raad Purt ny Hinshey, Droghad Vraddan as Raad Braddan gys y thie lheiys as y Strang.
Ta'n Rheynn Bun-troggalys gra dy bee yn un earroo dy varrooseyn gys yn Strang as Thie Lheiys Noble, as nagh bee caghlaa da shirveishyn ny barroosyn son scoillyn.
Ta'n obbyr shoh jannoo seose yn chied cheim jeh shalee ayns tree ayrn dy chur eaghtyr noa er raaidyn 'syn ard. Ta'n Rheynn gra neesht dy vel ny obbraghyn er ve cummit dy yannoo ny sloo yn eiyrtys er traaghyn ta sleih troailt, vel ad nyn surransee ny olteynyn fwirran y Thie Lheiys Noble ny cummaltee yn ard.
---oooOooo---
'Sy vee shoh cheet nee'n Reiltys aa-lhunney Skeim Spaarail Bree son Thieyn Dellal, lesh ennym beggan caghlaait, dy ve Skeim Spaarail Cur Magh son Thieyn Dellal, as foddee colughtyn cosney wheesh as £100,000 veih tackeyderyn dy chooney lhieu dy heet dy ve smoo fondagh rish bree. Ta dean y skeim dy chooney lesh colughtyn jannoo ny sloo ny brooightyn dy charbon oc as dy yannoo ny sloo ny costyssyn oc son bree.
Ta'n skeim chebbal cooney argidoil veih £20,000 gys £100,000, chammah's toyrtys dy eeck 75% jeh'n chostys son aa-scrutaght bree.
Ta'n Shirveishagh Gastid Dellal, as Oltey yn Chiare as Feed son Ayrey as Maayl, Tim Johnston, gra dy vel y Skeim er ve gobbraghey rish kuse dy vleeantyn ayns cummaghyn elley dy chummal seose caghlaaghyn shalee son fondid bree ec thieyn dellal. T'eh gra dy nee scanshoil eh dy vel ny ta'n Rheynn chebbal freayll rish caghlaa as lhiassaghey, as, lurg barelyn va ry gheddyn ayns creear mastey thieyn dellal as bishaghyn er y gherrid ayns costyssyn bree, dy vel yn Rheynn er aa-lhunney y skeim lesh earroo dy haaseyn ayn dy hareaghey eh, as yn dean jeu dy chooney lesh thieyn dellal jannoo ny sloo yn towse dy charbon t'ad cur magh.
Ta Mnr Johnson gra, liorish cur roish y skeim shoh, dy vel yn Reiltys cummal seose yn aght ta'n Reiltys currit da jannoo ny sloo brooightyn carbon liorish 2050 choud's t'eh greinnaghey thieyn dellal neesht dy vel ablid smoo oc dy ve ry chummal seose liorish ve smoo fondagh bentyn da bree, as magh ass shen ta costyssyn bree sloo oc.
---oooOooo---
Ta Caairlagh noa thie jantys foalley Feillyn Ellan Vannin, Damien Corcoran, gra dy vel fys echey er ny doilleeidyn t'er ve jannoo er y cholught er y gherrid, agh dy vel eh cur barrant ayn dy jean reddyn cheet lesh 'sy traa ry heet.
Haink fogrey dy row Mnr Corcoran er ve pointit yn chiaghtin shoh chaie myr ayrn jeh caghlaa liorish yn Rheynn Chymmyltaght, Bee as Eirinys, lurg meeaghyn dy aa-scrutaght as sur-smooinaghtyn er aghtyn dy yannoo rea yn aght ta'n colught gobbraghey as jannoo shickyr y stayd son eirinee as buitchooryn, choud's t'eh shareaghey shickyrys bee son yn Ellan.
Ta Mnr Corcoran gra dy nee scanshoil eh dy cheau paart dy hraa ayns smooinaghtyn er y chooish hoshiaght. T'eh gra, ayns jannoo shen, dy vel eh fosyn ayns ny laghyn as ny shiaghteeyn ry heet, dy loayrt rish sleih ta baiht 'sy ventyr, myr shoh dy loayrt rish nyn eirinee, rish nyn muitchooryn, rish nyn myn-chreckeyderyn, as rish ooilley ny fwirranyn ta gobbraghey cheusthie jeh'n abattoir hene. T'eh gra dy vel eh dy mooar currit da eaishtagh ec y traa t'ayn, roish my vees ad jannoo briwnys dy jeeragh er yn immeeaght nee ad goaill ayns laue.
Ta queig stiureyderyn noa er ve pointit, as keeayll chionnit oc ayns myn-chreck, ayns buitchoorys as ayns eirinys. Ta'n Shirveishagh Chymmyltaght, Bee as Eirinys, as Oltey yn Chiare as Feed son Doolish Hiar, Clare Barber, er chur booise dauesyn ren shirveish myr olteynyn y Voayrd choud's nish, as t'ee gra dy vel ee cur barrant ayn dy jean yn undinys noa t'er ve currit sheese lhiggey da'n Voayrd oorit dy yeeraghey as dy chur-lesh y bree dy hroggal er ny reddyn t'er ve jeant dy gholl er y hoshiaght choud's nish, dy jig sleih cur barrant 'sy chooish, as feme dy jarroo er shen, choud's ta'n Rheynn jeeaghyn er aghtyn dy chur da eirinee, da buitchooryn as da theay Ellan Vannin y thie jantys foalley t'ad toilchin.
Lesh ny caghlaaghyn t'er ve jeant, bee shiaght oltey Boayrd y Thie Jantys Foalley nish. Ta'n Caairlagh noa, Mnr Corcoran, leeideil er myn-chreck, lesh keeayll chionnit eddyr-ashoonagh echey ayns myn-chreck, as ayns caghlaa strateishagh da sheshaghtyn. Noa-phointit neesht, ta'n buitchoor ass Rhumsaa as keeayl chionnit echey ayns feill aw, Rob Teare; Yn Dr Jonathan Birnie, ta ny fer –oayllee y tarmaynys, as ughtar smoo yn tuarastyl ooilley-ghoaillagh ve jeant er yn abattoir; Philip Birnie, ta ny fer dellal as keeayll chionnit echey ayns feill aw, lesh schlei er-lheh ayns obbraghyn ayns abattoiryn as ayns thieyn jantys foalley; as Andrew McKeown, ta ny eirinagh as ymmyrkagh as keeayl chionnit ayns yn abattoir, as er-lheh ayns kionnaghey sthock.
Chammah's ny queig olteynyn noa-phointit shen, ta daa oltey elley y Voayrd, as adsyn tannaghtyn ayn veih'n Voayrd myr v'eh, as t'adsyn Rebecca Miah, ta Stiureyder Reiree y thie jantys foalley; as Allan Skillicorn, ta stiureyder Sheshaght Sthock Roauyr Ellan Vannin.
Ta Nigel Davis as yn Dr John Taylerson er naagail y Boayrd.
---oooOooo---
Ta Barrantee Carbory as Rushen cheet er y reaghys dy gheddyn rey rish y choorse barroose gys Cregneash son oyryn argidoil myr gyn keeayll. Ta'n lught-reill ynnydoil gra dy vel eh goll noi Strateish y Reiltys son y Tarmaynys Ynnydoil, as foddee dy vel reihyn elley nagh ren yn Reiltys ronsaghey dy reayll rish yn chirveish.
Ta Barrantagh Jane Glover gra dy vel coorse yn Earroo 28 lane-femoil myr cochianglys son cummaltee, as chammah's shen son ynnyd eiraght feer scanshoil nagh lhisagh y ve faagit as treigit.
Ta'n Rheynn Bun-troggalys gra nagh vel y coorse ry chummal seose son oyryn argidoil, as ga dy row coloayrtyssyn echey rish obbreyder preevaadjagh, rish yn Rheynn Gastid Dellal as rish Eiraght Ashoonagh Vannin, va row chebbyn dy argid ry gheddyn.
Ta Bnr Glover gra dy vel ny Barrantee gennaghtyn feer lajer dy vel eh ayns rieughid roish yn traa cooie son yn Ving cour Cur Kied da Traaght Raaidey dy hur-smooinaghtyn er y yeearree son scryssey magh y coorse, er yn oyr dy vel earroo dy chaaghyn ayn nagh vel er nyn ronsaghey dy feer dy reayll yn shirveish. T'ee gra dy vel yn yeearree jannoo seose oyr son imnea mooar, fakin dy vel obbyr feer vie er bastal goll er goaill ayns laue liorish Dellal Ellan Vannin dy yannoo y Strateish son y Tarmaynys Ynnydoil, as dy vel yn Strateish shoh dy jarroo cur eam son cochianglys smoo son thieyn dellal ynnydoil, shaghey dooney yn ynrican reih ec ymmodee sleih son entreilys daue. T'ee gra dy vel y reaghys goll dy bollagh noi shen, ayns rieughid, as er-lhee dy vel ad er vograghey magh toyrtyssyn dy ghreinnaghey lheid yn obbyr, as t'ee briaght vel caa dy ronsaghey ny aghtyn shoh.
Ta Bnr Glover gra dy vel ny Barrantee gennaghtyn nagh vel eh ynrican dy vel yn shirveish varroose imbaghoil lane-femoil son colughtyn ny kiareyderyn bee ayns Cregneash as y Cheyllys, agh dy vel yn ynnyd eiraght Cregneash ayn, as dy vel Cregneash as yn Cheyllys jannoo seose paartyn cheusthie jeh ny ynnydyn eiraght vees goll er chebbal, myr shoh dy vel eh jeeaghyn dy ve gyn keeayll dy vel ad giarrey veih ny shirveishyn shoh. T'ee gra dy vel fys eck dy vel yn Rheynn Bun-troggalys er n'ghra foddee nagh yn shirveish cosney argid erbee, agh dy vel ny Barrantee gennaghtyn, dy beagh eh er ny hoilshaghey magh 'syn aght kiart, cochianglt foddee rish coorseyn elley ny rish shirveishyn traen, dy vel ayns rieughid aghtyn nagh vel er nyn ronsaghey dy chosney shaghey shoh.
Ta Bnr Glover gra dy vel fys eck dy vel doilleeidyn ec kiareyderyn bee ayns Cregneash as ec y Cheyllys lesh y wirran, er yn oyr nagh vod sleih cosney gys shen, dy vel cummaltee mollit 'syn ard ta jannoo ymmyd jeh ny barrooseyn dy chochiangley rish ny puirt. T'ee gra dy vel fys ec Barrantee Carbory as Rushen dy vel ny Barrantee elley 'sy jiass – Purt Chiarn, Purt le Moirrey – noi scryssey magh y choorse shoh, as dy vel fys oc neesht dy vel ymmodee sleih car y touree er naccan da Treisht Eiraght Rushen nagh row ad abyl dy chosney gys y Cheyllys, as dy vel eh jeeaghyn dy ve gyn keeayll tra v'ad dy jarroo clou soilsheenyn dy vel eh fer jeh ny ynnydyn ard scanshoil dy yannoo keayrt gys shen.
Ta Bnr Glover gra nagh vel yn Rheynn Bun-troggalys er jeet gys ny Barrantee dy gheddyn magh ny barelyn oc er y chooish, as t'ee goaill beggan dy yindys mychione shen. T'ee gra myr shoh dy jinnagh ny Barrantee oltaghey cumrail ayns sur-smooinaghtyn er y yeearree shoh, dy vod yn Rheynn Bun-troggalys goaill ayrn ayns coloayrtys keeayllagh rish dy chooilley pharteays t'eh jannoo er.
Ta Bnr Glover gra dy vel possan dy chummaltee er jeet cooidjagh dy jarroo dy chummal troddan noi scryssey magh y choorse. T'ee gra dy vel fys eck neesht dy vel ayns oastan y Cheyllys hene ta aghin ayn as ymmodee sleih cur nyn enmyn da. T'ee gra dy vel Boayrd Barrantee Carbory as Rushen dy feer er chur eam er y Ving cour Cur Kied da Traaght Raaidey dy hirrey urree dy vel yn yeearree currit shaghey. Veih'n cheu ecksh dy persoonagh, t'ee gra dy vel ee er chur yn ennym eck da'n aghin. T'ee gra dy vel shen yn aght ec y traa t'ayn, dy vel ad cur eab er cur er yn Rheynn Bun-troggalys dy loayrt roo.
---oooOooo---
Ta fir-oayllee yn Chaart Oarpagh son Çhengaghyn Ardjynagh ny Mynçhengaghyn gra nagh vod Reiltys Ellan Vannin cur barrant ynrican ayns arryltee as fir er-lheh ta currit da cooish ny Gaelgey dy chur er y hoshiaght ee. Ta'n Olloo Vesna Crnic-Grotic as yn Olloo Rob Dunbar olteynyn y ving t'er chur roish moyllaghyn bentyn da'n chooish.
T'ad gra dy lhisagh yn Reiltys cur argid son cooish ny Gaelgey, shaghey ynrican loayrt mychione eck. Ta moyllaghyn y ving goaill stiagh –
• skeayley-magh ymmyd jeh'n Ghaelg ayns brastylyn oikanagh as ayns ny bunscoillyn;
• cur er bun claare dy hraenal fir ynsee, dy yannoo shickyr dy vel fir ynsee ry gheddyn 'sy traa sodjey dy chur barrant dy bee ynsagh ry gheddyn 'sy Ghaelg;
• lhiassaghey cowraghyn vees ry howse son strateish y Ghaelg, 2022-2032, dy yannoo shickyr dy vod sleih sessal mie dy liooar vel ee goll er y hoshiaght, as vel reddyn dy ve jeant dy charraghey shen, as dy yannoo shickyr dy vel argid dy liooar currit stiagh aynjee dy chur bree da ny t'ee dy yannoo;
• cur er bun co-chorp stiuree as currym er son freayll arrey er yn aght ta ynsagh 'sy Ghaelg goll er y hoshiaght;
• cur er y hoshiaght studeyrys as ronsagh 'sy Ghaelg ayns olloo-scoillyn ny colleishyn jeh'n lheid cheddin;
• jannoo shickyr dy vel ny teksyn ashoonagh smoo scanshoil 'sy Ghaelg ry gheddyn;
• cur couyr dy chooney lesh skeayley-magh claareyn chellveeish preevaadjagh 'sy Ghaelg;
• goaill ayns laue saaseyn dy ghreinnaghey clou artyn 'sy Ghaelg ayns pabyryn naight;
• cummal seose traenal naighteyryn 'sy Ghaelg dy yannoo shickyr dy vel meanyn 'sy traa sodjey 'sy Ghaelg;
• cur er bun saaseyn dy chooney lesh as/ny dy ghreinnaghey ymmyd jeh'n Ghaelg ayns bea tarmaynagh as sheshoil.
Ayns freggyrt, ta'n Rheynn Ynsee, Spoyrt as Cultoor gra dy vel Ellan Vannin er baih argid dy mooar ayns jannoo shickyr dy vel yn Ghaelg tannaghyn ayn as dy vel ee aa-vioghey ayns ny jeihyn dy vleeantyn jeieanagh. T'eh gra dy vel yn Rheynn cummal seose y Vunscoill Ghaelgagh ayns Balley Keeill Eoin as dy vel yn Ghaelg goll er chebbal ayns ooilley ny bunscoillyn.
Ta'n Rheynn gra, dy dooghyssagh, dy vel feme er jannoo cormid eddyr skeayley-magh ennagh 'sy traa ry heet as curmyn elley er yn Reiltys, agh dy jean yn Rheynn loayrt mychione tuarastyl y Ving as ny moyllaghyn eck rish oaseiryn yn Rheynn, rish Culture Vannin, as rish sheshaghtyn theayagh, ta jannoo wheesh dy vishaghey as dy chur er y hoshiaght ymmyd jeh'n Ghaelg 'sy cho-voodeeys.
